1 SAMUEL 16 - Guarani Bible with DC

Samuel oñono tee mburuvicharä David

1YandeYa jei Samuel pe:

—¿Kërai yave regua pa reäpirota Saúl? Che aröɨrogüe ma ko, agüɨye vaerä güɨnoi iporookuaía Israel iñemuña reta re. Emotɨnɨe vecha kuimbae-räti asaite pe, jare eyu, romondota Isaí pɨri Belén pe, echa taɨ reta güi aiparavo cheyeupe mburuvicha guasurä.

2Jare Samuel jei:

—¿Këraita pa aja? ¡Saúl oikuaa yave, cheyukata ko!

Jare yandeYa jei chupe:

—Eraja guaka reta güi metei guaka taɨrusu vae, jare ere: “Ayu ko amee vaerä yandeYa pe mɨmba oyeyukagüe.”

3Jare eenɨi Isaí mɨmba oyeyuka oñemeea pe, jare che amombeuta ndeve reyapota vae; jare eñono tee cheve che jae ndeve vae.

4Jare Samuel oyapo yandeYa jei chupe rami, ojo oväe Belén pe yave, jókuae tëta guasu itenondegua reta oë oövaiti okɨɨye reve, jare jei reta:

—¿Reyu pa mbɨakatu peguarä?

5Jae jei:

—Jökorai ko. Ayu ko amee mɨmba oyeyukagüe yandeYa pe; peñeñono tee jare peyu che ndive mɨmba oyeyuka oñemee yandeYa pea pe.

Javoi Samuel oñono tee Isaí jare taɨ reta, jare oparea chupe reta yogüɨraja vaerä mɨmba oyeyukagüe oñemee yandeYa pea pe.

6Jare jae reta yogüeru yave, Samuel oecha Isaí taɨrɨpɨ, Eliab jee vae, jei ipɨa pe: “Kuae kuimbae ko aipo jae cheYa oiparavogüe.”

7Ërei yandeYa jei Samuel pe: “Agüɨye emae jova re, ani vi ipukugüe reño, echa che aröɨro ko; che mbaetɨ ko amae kuimbae omae vae re; echa kuimbae omae jesa róvai oï vae reño, ërei che ko amae ipɨa re.”

8Jayave Isaí oenɨi taɨ Abinadab, jare omboasa Samuel jóvai, jare jae jei:

—YandeYa mbaetɨ vi kuae oiparavo.

9Jaɨkue rupi Isaí omboasa vi taɨ Sama. Jare Samuel jei:

—YandeYa mbaetɨ vi kuae oiparavo.

10Jökorai Isaí omboasauka chiu taɨ reta Samuel jóvai; ërei Samuel jei Isaí pe:

—YandeYa mbaetɨ oiparavo kuae reta.

11Jayave Samuel jei ye Isaí pe:

—¿Jae pa opaete kuae nderaɨ reta?

Jare jae jei:

—Oata vɨteri taɨkuegua ete, vecha reta re oyangareko vae.

Jare Samuel jei Isaí pe:

—Emondo eruruka, echa mbaetɨta yakaru, ou oväe kuae pe regua.

12Jökorai omondo güeruruka. Jae ko ipireyu, jesäɨäta jare kunumi kavi.

Jayave yandeYa jei:

—Epüa jare eñono tee, echa jae ko kuae.

13Jare Samuel oipɨɨ vecha kuimbae-räti asaite güɨnoi pɨpe vae, jare opɨyere jese oñono tee vaerä tɨkeɨ reta jóvai; jare jókuae ara güive yandeYa iEspíritu ou David re. Javoi Samuel opüa jare oyerova ye ojo Ramá kotɨ.

David ombaembopu Saúl pe

14Jare yandeYa iEspíritu osɨrɨ Saúl güi, jare yandeYa omaeño espíritu ikavimbae vae oya Saúl re ombopɨakaviä vaerä.

15Jáeramo iyɨvɨrigua reta jei chupe:

—Mase, Tumpa omaeño ou nderé espíritu ikavimbae vae, jae ko ndembopɨakaviä.

16Jayave oreokuai ore nderembiokuai reta roeka vaerä ndeve oikatu ombopu arpa vae, jare mbaetɨ ndepɨakavi reï yave, ombopu vaerä arpa ndembopɨakatu vaerä.

17Jare Saúl jei chupe reta:

—Peeka cheve arpa oikatu ombopu vae, jare peru cheve.

18Jayave metei iyɨvɨrigua jei:

—Mase, che oime aecha metei Isaí Belén pegua taɨ reta güi, oikatu yae ombopu arpa vae, jëia ñeraro regua, yarakuaa katu imiari vaerä, kunumi kavi jare yandeYa oï jae ndive.

19Jare Saúl omondo ñee jerajaa reta Isaí oïa pe jei reve: “Embou cheve nderaɨ David, vecha iyangarekoa.”

20Javoi Isaí ombovoɨta imburika mbɨyape pe, metei jɨru vino pe, jare metei kavara raɨ, jare omondo Saúl pe taɨ David ndive.

21Jare David ou Saúl pɨri, jare opɨta oyeokuai chupe, jare Saúl oaɨu yae David, jare oñono jembiporu ñeraro pegua ivoɨarä.

22Jayave Saúl omondo omoñera Isaí opɨta vaerä David jae ndive, echa ombopɨakatu yae.

23Jare Tumpa omaeño ou espíritu ikavimbae vae Saúl re yave, David oipɨɨ arpa jare ombopu. Javoi Saúl ipɨakatu jare oasa chugüi ipɨakavimbae, jare espíritu ikavimbae vae osɨrɨ chugüi.