1 SAMUEL 13 - Guarani Bible with DC

Ñeraro filisteo reta kotɨ

1Saúl okuakuaa ma yave omboɨpɨ oï mburuvicha guasurä Israel pe jare mbovɨ año ma oiko mburuvicha guasurä yave,

2oiparavo tres mil kuimbae Israel iñemuña reta, kuae reta güi dos mil ñogüɨnoi Saúl ndive Micmas pe jare Bet-el iɨvɨtɨ re, jare mil ñogüɨnoi Jonatán ndive Gabaa pe Benjamín iñemuña reta iɨvɨ pe; jare opaete vae jembɨregüe reta omondo jëta jëta ae kotɨ.

3Jare Jonatán oporepeña sundaro filisteo reta jeyupa güɨnoi ɨvɨtɨ re vae re, jare kuae oikuaa ïru filisteo reta. Jare Saúl omoñeeuka mimbɨguasu opaete iɨvɨ rupi, jei reve: “Toendu hebreo reta yogüeru vaerä yandemborɨ.”

4Jare opaete Israel iñemuña reta oendu jei reta vae: “Saúl oporepeña filisteo reta jeyupa re; jare jókuae re Israel iñemuña reta oñemotareɨuka filisteo reta pe.” Jare opaete Israel iñemuña reta oyemboatɨ Saúl ndive Gilgal pe.

5Jayave filisteo reta oyomboatɨ oñeraro vaerä Israel iñemuña reta ndive. Oyomboatɨ treinta mil käretou ñeraro pegua, seis mil kuimbae kavayu regua reta, jare jeta kuimbae reta, ɨ jembeɨ pe ɨvɨkuitï jeta yae vae rami; jare oyeupi reta jare oyembojeyupa reta Micmas pe, Bet-avén güi kuaraɨ oëa kotɨ.

6Jare Israel iñemuña reta oecha opaetei oñeova ñogüɨnoi yave, oñemi reta ɨ̈aka-soro rupi, ɨvɨkua rupi, ɨ̈vavira rupi, ita guasu ipäu rupi, ɨrɨru rupi.

7Jare amogüe hebreo reta oasa ɨ̈aka Jordán, ɨvɨ Gad jare Galaad kotɨ; ërei Saúl opɨtaño Gilgal pe, jare opaete vae reta yogüɨraja jaɨkue orɨrɨi reve okɨɨye güi.

8Jare jae oäro chiu ara, Samuel jei chupe rami;1 S 10.8. ërei Samuel mbaetɨ ou Gilgal pe, jare isundaro reta oñemi ma yogüɨraja ye ñogüɨnoi chugüi.

9Jayave Saúl jei:

—Peru cheve amee vaerä Tumpa pe, mɨmba oyeyukagüe opaetei oyeapɨ vaerä vae, jare mɨmba oyeyukagüe yembopɨakatu peguarä vae.

Jare omee mɨmba oyeyukagüe opaetei oyeapɨ vae.

10Jare jae opa ma omee mɨmba oyeyukagüe opaetei oyeapɨ vae yave, ko Samuel ou oväe jare Saúl oë oövaiti, oyapo vaerä maraetei chupe.

11Jayave Samuel jei chupe:

—¿Mbae pa ko reyapo?

Jare Saúl jei:

—Aecha sundaro reta oñemi ma yogüɨraja ye ñogüɨnoi chegüi, jare aecha mbaetɨño reyu reväe ñanemiari rami, jare filisteo reta oime ma oyomboatɨ ñogüɨnoi Micmas pe jeko pegua,

12jae cheyeupe: “Yogüeruta añave filisteo reta cheve kuae Gilgal pe, jare che mbaetɨño ayerure cheYa pe iporerekua re.” Jókuae jeko pegua ko ayemongeta amee vaerä mɨmba oyeyukagüe opaetei oyeapɨ vae.

13Jayave Samuel jei Saúl pe:

—¡Mbaetɨ etei jaekavi kuae reyapogüe! Mbaetɨ reñovatu yandeYa Tumpa iporookuai, ndeokuai jese vae; echa añave omoañete eteta tëi ko ndeporookuaía Israel re jekuae avei pegua.

14Ërei añave ndeporookuaía ngaraa oiko avei. YandeYa oeka ma iyeupe metei kuimbae jae ipɨakatu jese vae,Hch 13.22. jókuae yandeYa oiparavo ma oï vaerä mburuvicharä kuae tëta jae imbae vae re, nde mbaetɨ reñovatu yandeYa ndeokuai jese vae jeko pegua.

15Jayave Samuel oyeupi Gilgal güi Gabaa kotɨ Benjamín iɨvɨ pe. Jare Saúl oipapa jae ndive ñogüɨnoi vae reta seisciento kuimbae.

16Jayave Saúl jare taɨ Jonatán jare ïru reta jae ndive ñogüɨnoi vae opɨta reta Gabaa pe Benjamín iɨvɨ pe, ërei filisteo reta oyembojeyupa Micmas pe.

17Jare filisteo reta jeyupa güi ñogüɨnoe mboapɨ yemboyao sundaro reta, metei yemboyao yogüɨraja Ofra jape rupi ɨvɨ Sual kotɨ.

18Ïru yemboyao yogüɨraja Bet-horón kotɨ, jare mboapɨa yemboyao yogüɨraja ɨvɨpe kavi Zeboim kotɨ ñuu kotɨ.

19Jare opaete ɨvɨ Israel pe mbaetɨ etei metei ave jiero pegua mbaravɨkɨ oyapo vae, echa filisteo reta yepe jei: “Agüɨye vaerä hebreo reta oyapo kɨsepuku ani mii.”

20Jáeramo opaete Israel pegua reta yogüɨraja filisteo reta pɨriño oimbeeuka vaerä metei ñavo iarao itï, iyɨɨ, iäsarou jare tembiporu hoz.

21Filisteo reta jepɨ okovara yɨɨ oimbee vae re, jare mii omboakua vae re oasa ete jepɨ okovara.

22Jare jókuae ara oñeraro reta yave Micmas pe, Saúl jare Jonatán ndive ñogüɨnoi vae reta mbaetɨ etei güɨnoi reta mii ani kɨsepuku yepe, jaeño ma jae reta mókoi güɨnoi tembiporu ñeraro pegua.

23Jare sundaro filisteo reta metei yemboyao, yogüeru oyopia reta tape Micmas kotɨ ojo vae.