2 TIMOTEO 2 - Guarani Bible with DC

Jesucristo isundaro ikavigüe

1Cheraɨ, eñemomɨ̈rata mbɨakavi Cristo Jesús omee yandeve vae rupi.

2Mbaembae re aporomboe jeta vae jovake vae re, eyókuai kuimbae jupi vae reta, oikatu vaerä omboe yoapɨ ye ïru vae reta.

3Nde, eiporara Jesucristo isundaro ikavigüe rami.

4Metei sundaro ojo oñeraro vaerä vae mbaetɨ ko oyemoinge ïru mbaembae pe, omboyerovia vaerä oiparavo sundarorä vae.

5Jaeramiño vi oñoñókuai vae, mbaetɨ osɨi yave oporombosɨi vae reta jei vae rupi kavi, mbaetɨ omongana.

6Oparavɨkɨ vae mbaetɨ oparavɨkɨ yave, ngaraa mbae oarɨvo.

7Jekuaeño ndepɨa pe eyemongeta che jae ndeve vae re. Jare yandeYa tomee ndeve arakuaa reikuaa kavi vaerä opaete.

8Nemaendúa Jesucristo, David iñemuña pegua re, kërai jae oikove ye omanogüe reta ipɨte güi, ñee ikavi vae amoërakua rami.

9Jese aiporara aiporara aï tembipɨɨrɨru pe ikavimbae iyapo rami. Ërei Tumpa iñee mbaetɨ oyeokenda oï.

10Jáeramo, aropɨa aaɨu ramo Tumpa oiparavo vae reta, jae reta vi güɨnoi vaerä yemboasa Cristo Jesús rupi, mbaemboete opambae.

11Kuae ko jae ñee añete vae:

“Jae ndive ñamano yave,

jae ndive yaikove yeta vi.

12Yaiporara yave,

jae ndive yaporookuaita vi.

Yaikuaku yave, jae vi yandekuakuta.

13Mbaetɨ yave jupi kavi yaiko,

jae iñee ombopo avei.

Jae mbaetɨ iyapu.”

Tumpa jembiokuai ikavigüe

14Emomaendúa reta kuae mbaembae re, jare emboarakuaa reta yandeYa jóvai, agüɨye vaerä oyoaka reta ñee reta osirivembae re, jókuae ngaraa etei ikavi chupe reta, jaeño güɨrokomegua oyeapɨsaka jese vae reta.

15Eñemoäta ngatu, repɨta kavi vaerä Tumpa ndive, oparavɨkɨ vae mbaetɨ mbae güi imara vaerä vae rami, eporomboe ikavi rupi ñee añete vae re.

16Ërei agüɨye eyeapɨsaka ikavimbae ñee osirivembae reta re, echa jókuae ñee reta jeiete oporogüɨrajata ikavimbae kotɨ.

17Jare jae reta iporomboe oñemoaita mbaerasɨ yanderete jou güɨraja vae rami. Jökorai ko oasa Himeneo jare Fileto;

18jae reta opia añete vae güi, jei reve omanogüe oikove ye vae oasa ma. Jökorai jae reta amogüe ombojopa iporogüɨrovia güi.

19Ërei Tumpa iñee añete ko, mbaetɨ etei ko oyepoepɨ, echa jei körai: “YandeYa oikuaaNm 16.5; Jn 10.14; 1 Co 8.3. imbae reta.” Jare: “Opaete omboete Cristo vae, tosɨrɨ ikavimbae vae güi.”

20Echa metei o tuicha vae pe mbaetɨ oime tembiporu oro pegua jare korepoti peguaño, oime vi ɨvɨra pegua jare ñaeu pegua. Amogüe reta oyeporu mbaemboete peguarä, ïru reta oyeporu mbaemboetembae peguarä.

21Jayave, amogüe oeya yave mbae ikavimbae vae, oikota tembiporu mbaemboete peguarä, ñeñono tee jare ikavigüe yandeYa peguarä, jare oïndaivita oipotagüe mbaravɨkɨ ikavi vae oyapo vaerä.

22Etekuarai taɨrusu reta jemimbota güi, ërei emomoe mbaejupi, mborogüɨrovia, mboroaɨu jare mbɨakatu, yandeYa omboete opaete ipɨa reve vae reta ndive.

23Ërei eröɨro yoaka osirivembae, echa jókuae nunga reta güeru ñoraro.

24Echa yandeYa jembiokuai mbaetɨ ko ikavi iyoakase, ërei ikavi ko ipɨakavi opaete vae pe, toikatu toporomboe, tipɨaguasu;

25tomboe oñemomichi reve oyembopɨapochɨ vae reta, echa güɨramoi Tumpa omaeñota jese reta oeya vaerä iyemongeta ikavimbae vae jare oikuaa vaerä añete vae,

26jare ojoyepe vaerä aña guasu iñuai güi. Echa pɨpe ñogüɨnoi oyapo reta vaerä aña guasu jemimbota.