ESTER (gr) 5 - Guarani Bible with DC

Ester ojo mburuvicha guasu jóvai[

1Mboapɨ ara ma oyerure oiko vae jaikue rupi, Ester opa omboi jemimonde reta oyerure peguarä omonde vae, jare omonde temimonde yemboetea pegua vae.]

1aTäta ma iyemboete oï yave opoko ye oyerure Tumpa pe, jae ko opaete mbae oecha vae jare opaete vae güɨroasayepe vae, jaema oenɨi mókoi jembiokuai reta. Metei re mbooki rupi oyepɨɨ vaerä ojo, jare ïru jaɨkue ojo vaerä, jemimonde iyapɨɨ oipɨɨ vaerä güɨraja chupe.

1bJova moropɨ̈taave kavi oyapo jaema täta ko ikavi oyeapo ojo. Jare yepe tëi, oyerovia katu jare iñee-yeaeä ñamae jese, ërei ipɨa pe täta okɨɨye ojo.

1cJare oasa ojo opaete öke reta rupi jare jökorai ojo oväe mburuvicha guasu oïa pe. Mburuvicha guasu joko oguapɨ oï iguapɨa pe, täta vi iyemboete oï jare overa ye oro güɨnoi iyé ita jepɨ vae reta yepe; oasaete ye ikavi oyekuaa oï.

1dJova, täta ipöra jare okuera katu güɨnoi vae, oyepoepɨ täta jovarasɨ oyeapo Ester oecha oike ojo rupive, jókuae jaenunga vi opa vi jova oyepoepɨ jare ou ipɨa omano vaerä, jare oyeko ma jembiokuai jenonde güɨraja vae iyatiɨ re.

1eJare jökorai rupive Tumpa ombopɨakúe mburuvicha guasu; jare jae, ipɨatɨtɨ reve, opüa jenda güi ojo oipɨɨ iyɨva pe oï kavi regua. Jaema omopɨa maia ye vi ñee ikavigüe pe, jare jei chupe:

1f—¿Maratu pa ko reiko, Ester? Agüiye ekɨɨye, che ko jae neme. Ngaraa remano. Jókuae mborookuai ko oyeapo pea kia kiaiño vae reta pegua ko. Eyu kuae kotɨ.

[

2Jaema mburuvicha guasu oipɨɨ ipopoka oro pegua vae, oñono Ester iyayu re, oiyurupɨte jare jei chupe:

—Ere cheve reipota vae.]

2aJare jae jei chupe:

—Che aecha mburuvicha rupive, Tumpa iaraɨguaecha ko cheve. Aecha jökorai rupive ou akɨɨye jare mbaetɨ ye ma aikuaa. ¡Täta chemopɨakañɨ mburuvicha, jare täta ndekavi!

2bJare Ester imiari oï ramboeveño, ipɨa omano ye. Jaema täta ma mburuvicha guasu ombopɨakaviä, jare yatɨ ma jese tembiokuai reta omoingove vaerä.

[

3Jaema mburuvicha guasu oparandu chupe:

—¿Mbae pa ko reipota, Ester? ¿Mbae pa rere reiko? ¡Yepei cheɨvɨ mbɨte reiporu cheve, ameeta ko ndeve!

4Jaema Ester jei chupe:

—Kuae ara jae ko ara ikavigüe vae chevegua. Jaema jaekavi vi ko mburuvicha pe yave, aiporu ndeve reo vaerä kuri oime añave arete ayapo aï ndevegua vae pe, jare eraja vi kuri Amán.

5Jaema jayave mburuvicha guasu jei:

—Peeka cheve jarembae pegua Amán, royapo vaerä Ester oipota vae.

Jare jökorai mókoi reve opa yogüɨraja jókuae arete Ester omombeu vae pe.

6Jaema aretea pe ma ñogüɨnoi yave, mburuvicha guasu jei Ester pe:

—¿Maratu pa ko reiko, mburuvicha Ester? Añave ameeta ndeve nde reiporugüe.

7Jaema Ester jei:

—Jaeño ma aipota jare kuae aiporu ndeve:

8Cheruvicha cheparareko ko yave, tou yevɨ pɨareve, Amán ndive, ïru vae arete ayapo yeta chupe vae pe, jare jayave ramo jaeta cheruvicha oiporu cheve vae.

Amán oyapo Mardoqueo iyeyuvɨarä

9Jare Amán oë ojo aretea güi oyerovia jare ipɨakatu reve; ërei täta iyarasɨ oecha Mardoqueo oï mburuvicha joka pe yave.

10Jaema ojo jëta pe oväe yave, omondo oeka ivɨaka reta jare Zosara, jae ko jembireko,

11jare opoko oechauka chupe reta imbaeyekou mburuvicha guasu omee chupegüe vae, jare imiari vi chupe reta kërai jae mburuvicha guasu oñono tenondeguarä oikota mburuvicha jëta pe vae.

12Jare jei ye vi:

—Jare ye, cheveño etei Ester oparea kuae ara arete oyapo mburuvicha guasu pe vae pe; joko güi oparea ye cheve pɨareve pegua ïru arete pegua.

13Ërei opaete kuae reta reve mbaetɨ ñoi chepɨakatu apɨta, aecha ramboeve jókuae judío oï mburuvicha joka rupi.

14Jaema jembireko jare ivɨaka reta jei ma chupe:

—Eyapouka chupe iyeyuvɨarä veintidó metro ɨvategüe vae, jare pɨareve ndeimbove yave eiporu mburuvicha guasu pe pembosagüɨu vaerä jese Mardoqueo. Jare jökorai peo vaerä kuri aretea pe mburuvicha guasu ndive ndepɨa-këraimbae reve.

Jare jókuae yemongeta ipöra Amán pe, jare omondo oyapouka yeyuvɨ rendarä.