1Asa jekovia pe taɨ Josafat oguapɨ mburuvicha guasurä, kuae oyemboeteuka yae Israel pegua reta pe.
2Oñono sundaro reta opaete tëta guasu reta jëguambae oï Judá pe vae rupi, jare sundaro reta omae vae opaete ɨvɨ Judá rupi, jaeramiño vi tëta guasu reta Efraín pegua tu Asa opɨ̈rogüe rupi.
3Jare yandeYa oï Josafat ndive, echa omomoe iñemuñagüe David jeko, mbaetɨ omboete tumpa-raanga baal reta,
4ërei oeka tu iTumpaño, jare oyapo iporookuai reta, mbaetɨ oiko Israel pegua reta yogüɨreko rami.
5Jáeramo yandeYa omomɨ̈rata iporookuaía chupe. Opaete Judá pegua reta omee mbota chupe, güɨnoi jeta mbaeyekou jare imboetea yae.
6Jare oñemoäta ngatu opaete ipɨa ndive yandeYa jemimbota rupi, jare omboai Judá güi mbaemboete renda reta ɨvɨtɨ rupigua jare tumpa-raanga Asera iä reta.
7Mboapɨa año ma oiko mburuvicha guasurä yave omondo iyɨvɨrigua mburuvicha reta Ben-hail, Abdías, Zacarías, Natanael jare Micaías, oporomboe reta vaerä tëta guasu reta Judá pegua pe,
8jare jae reta ndive yogüɨraja levita reta Semaías, Netanías, Zebadías, Asael, Semiramot, Jonatán, Adonías, Tobías jare Tobadonías. Kuae reta ndive yogüɨraja vi sacerdote Elisama jare Joram.
9Omondo reta omboe vaerä opaete Judá pegua reta, tembikuatía pe yandeYa iporookuai oï vae re. Jare jae reta oguata opaete ɨvɨ Judá rupi oporomboe reve jókuae re.
10Jare opaete tëtaguasu reta Judá iyɨ́vɨri ñogüɨnoi vae okɨɨye yae yandeYa güi, jáeramo mbaetɨ oipota oñeraro reta Josafat ndive.
11Ërei filisteo reta güeru mbota jare korepoti ombaemboepɨ vaerä Josafat pe, Árabe reta güeru vi mɨmba siete mil seteciento vecha kuimbae jare siete mil seteciento kavara kuimbae.
12Jare Josafat imbaepuere jeiete okuakuaa. Omopüa Judá pe ñepɨ̈roka reta jare tëta guasu reta tembíu oñeñovatu vaerä.
13Güɨnoi jeta mbaembae tëta guasu reta Judá pegua pe. Güɨnoi vi jeta sundaro reta jëia vae Jerusalén pe,
14jae kuae jee reta jëtara ñavo rupi:
Judá iñemuña pegua sundaro reta itenondegua ete Adnas tresciento mil sundaro jëia vae ndive.
15Jare jaɨkue mburuvicha Johanán dosciento ochenta mil sundaro ndive,
16kuae jaɨkue Amasías, Zicri taɨ, jaeiño oñererökuavee yandeYa pe vae, jae ndive ñogüɨnoi dosciento mil sundaro jëia yae vae reta.
17Benjamín iñemuña reta güi oï Eliada, kuimbae jëia yae vae, jare jae ndive ñogüɨnoi dosciento mil kuimbae juvɨ reve jare iyeopiaka reve reve.
18Kuae jaɨkue Jozabad, dosciento mil kuimbae oïndaivi oñeraro vaerä vae ndive.
19Jae kuae reta mburuvicha guasu isundaro reta, oyepapambae reve mburuvicha guasu oñono opaete tëta guasu reta jëguambae Judá pegua rupi vae.
Who We AreWhat We EelieveWhat We Do
2025 by iamachristian.org,Inc All rights reserved.
