SALMOS 104 - Guarani Bible with DC

SALMO 104Tumpa oyangareko opaete jembiapo reta re

1¡Tamboete cheYa opaete chepɨa ndive!

¡CheYa Tumpa, tuichagüe yae ete ko nde!

Reyemonde yemboetea pegua pe jare ikavi yae vae pe,

2reñeapeva tembipe pe,

4Ɨvɨtu reyapo neñee jerajaa ra,

jare tata ko nderembiokuarä.

5Nde reñono ɨvɨ iguapɨka reta re,

agüɨye etei vaerä omɨi jenda güi.

6Ɨguasu pe reñova ɨvɨ, temimonde pe rami,

ɨ pe reyasoi ɨvɨtɨ reta.

7Ërei nde reñeengata chupe reta yave, opa yogüɨraja;

otekuarai reta neñeeäta oendu yave.

8Oyeupi ɨvɨtɨ re,

ogüeyɨ ɨvɨtɨ päu ipe kavi vae pe,

jare ojo oï, nde rere chupea pe,

9nde reñono chupe reta jembeɨrä, agüɨye vaerä oasa,

ngaraa ye ma oñova ɨvɨ.

10Nde ko remoë ɨesaɨ reta,

ɨ osɨrɨ ɨvɨtɨ päu rupi vae reta.

11Jókuae ɨ güi oɨu opaete mɨmba ñana rupigua reta;

pɨpe omboasa iɨuve mburika ñana rupigua reta.

12Jembeɨ rupi oyemboaitɨ güɨra reta;

¡jokoropi oñee reta ɨvɨra-räka rupi!

13Nde ko remboɨu kaa reta, ɨvate reïa güi,

ama pe remboɨu kavi ɨvɨ.

14Rembokuakuaa kapii mɨmba reta peguarä,

jare temitɨ reta kuimbae reta peguarä,

güɨnoi vaerä jembiurä chugüi;

15jókuae tembíu reta, omee vaerä mɨ̈rata chupe,

vino, omboyerovia vaerä ipɨa,

jare asaite pe jova jembipe kavi vaerä oyekuaa reta.

16Jokɨ katu yandeYa iɨvɨra reta,

ɨ̈vɨrare reta jae oñotɨ Líbano pe vae.

17Jokoropi güɨra reta oyemboaitɨ,

jare ɨvɨra pino jee vae reta re oñemoëta güɨratï reta.

18Ɨvɨtɨ ɨvate vae reta kavara ñana rupigua reta peguarä,

ɨ̈vavira reta, tapiti reta ikuarä.

19Reyapo yasɨ, oyepapa vaerä ara reta;

kuaraɨ oikuaa kërai yave oiketa ojo vae.

20Rembou pɨtumimbi, pɨ̈tu vaerä,

jayave oë oguata mɨmba kaa rupigua reta.

21Yaguapope oñee jembiarä re,

jökorai oiporu Tumpa omee vaerä jembiurä.

22Ërei köe yave, opa yogüɨraja reta,

jare oputuu reta ikua rupi.

23Javoi kuimbae oë ojo iparavɨkɨa kotɨ,

oparavɨkɨ iko pe kaaru regua.

24CheYa Tumpa, ¡opa rapeä ko roipapa nderembiapo reta!

Opaete jókuae reta reyapo ndearakuaa katu reve;

¡ɨvɨ tɨnɨe oï nderembiapo reta pe!

25Joko oï ɨguasu, ipɨguasu jare puku yae vae,

jeta yae pɨpe jevae reta,

tuicha vae jare michi vae reta;

26jokoropi oguata barco reta,

joko pe oime mbaeporou Leviatán jee vae,

reyapo oyuvanga vaerä pɨpe.

27Opaete jókuae reta oäro ndegüi,

remee vaerä jembiurä iara pe kavi;

28remee chupe reta, jare jae reta jou;

ndepo reyora jare oyemoangapɨɨ reta ikavigüe pe;

29ërei, nde resɨrɨ chugüi reta yave, jae reta okɨɨye;

reekɨ ipɨ̈túe yave, jae reta omano,

opa ojo ye ɨvɨkuirä.

30Ërei rembou tekove yave, oyeapo ye,

jökorai rembopɨau ye ɨvɨ iárambo.

31¡YandeYa iyemboetea opambae ko!

¡YandeYa oyerovia omae jembiapo reta re!

32Jae omae ɨvɨ re yave, okana;

¡jae opoko ɨvɨtɨ reta yave, jätati!

33YandeYa pe tatairari aikove aï ramboeve;

cheTumpa pe atairarita salmo, aikove aiko ramboeve.

34Chekɨ̈reɨ ngatu yaeta ayemongeta ikotɨ;

che ayerovia katuta cheYa re.

35Topa tokañɨtei ɨvɨ güi iyoa vae reta,

jupimbae reta topa tokañɨtei.

¡Tamboete cheYa opaete chepɨa ndive!

¡Aleluya!