EZEQUIEL 32 - Guarani Bible with DC

Faraón oyemboyovake metei mbaeporou päicha guasu ndive

1Docea año pe, docea yasɨ re, tenondegua araa pe yandeYa jei cheve:

2“Nde kuimbae, etairari kuae tairari mano pegua pe Faraón mburuvicha guasu Egipto pegua re körai:

‘Nde reï yaguapope rami tëtaguasu reta pe;

mbaeporou päicha guasu ɨguasu rupigua rami,

remondɨpa neɨ̈aka,

repɨ̈ro ɨ jembeɨ rupi,

rembojuúmbai ndepɨ pe.’

3YandeYa Tumpa jei körai: ‘Jeta vae reta ndive amombota chepɨsa nderé, pɨpe nerenoe retata.

4Rogüɨnoeta ɨ güi, ropɨsota roeya ɨvɨ re. Ambouta güɨra reta ogüeyɨ nderé, jare mbaeporou reta jɨ̈vɨatata nderé.

5Ndesoogüe añonota ɨvɨtɨ reta re jare pɨpe amotɨnɨeta ɨvɨtɨ päu ipe kavi vae reta.

6Nderugüɨ pe amoäkɨta ɨvɨ, jare ɨvɨtɨ reta ave, ɨ̈aka raɨ reta tɨnɨeta nderugüɨ.

7Che romboai yave, ara ambopɨtumimbita, jare yasɨtata reta ogüeta, kuaraɨ amoiata amapɨtu pe jare yasɨ mbaetɨta oesape.Is 13.10; Am 8.9; Mt 24.29; Mc 13.24-25; Lc 21.25; Ap 6.12-13; 8.12.

8Ambopɨtumimbita ndereko pegua opaete ara re oesape vae reta, jare ambopɨtumimbita ndeɨvɨ. Che ndeYa Tumpa jae kuae.

9Jare ambopɨatɨtɨukata jeta vae reta, opa amondo yave tembipɨɨrä ïru tëtaguasu reta oikuaambaea pe.

10Jare amopɨakañɨ yaeta jeta vae reta ndereko pegua; juvicha guasu reta orɨrɨita okɨɨye güi, chekɨsepuku anoe ambovera yave jóvai reta. Jókuae ara neamɨri yave, opaete vae orɨrɨita okɨɨye yae güi.

11Echa yandeYa Tumpa jei körai: Mburuvicha guasu Babilonia pegua ikɨsepuku oitɨta nderé.

12Jëia vae reta ikɨsepuku rupi nerëtaɨgua reta ayukaukata, opaete jae reta ko imbaepuere yae ïru tëtaguasu reta güi vae; omboaita Egipto ipɨapochɨ jare opaete pɨpegua reta.

13Opaete mɨmba reta amboaita ɨ̈aka iyɨ́vɨri güi; jare ngaraa ye ma kuimbae reta jare mɨmba reta ombojuúmbai ipɨ pe.

14Jayave ɨ amoësakata, jare ɨ̈aka rupi ɨ oguatata asaite rami. Che Tumpa jae kuae.

15Egipto opata amboai, opɨtata ipombae, opaete joko pe yogüɨreko vae reta amokañɨtei yave, oikuaa retata che ko jae Tumpa vae.’

16Jae kuae tairari mano pegua, körai totairari kuña reta ïru tëtaguasu pegua, Egipto re jare pɨpegua reta re. Che Tumpa jae kuae.”

Egipto ikañɨtei

17Docea año pe, docea yasɨ re, quince araa pe yandeYa jei cheve:

18“Nde kuimbae, etairari tairari mano pegua pe, jeta vae reta Egipto pegua re; jare emondo jae jare tëtaguasu imbaepuere yae vae pegua reta ɨvɨgüɨ kotɨ, omanogüe reta ñogüɨnoia pe.

19¿Jae pa nde ipöra yae ïru reta güi vae? Egüeyɨ jare eyepɨso Tumpa re güɨroviambae reta ndive tɨvɨa pe.

20Ñeraro pe omano vae reta ipɨte pe omanota; kɨsepuku pe omanota. Opaete pɨpegua reta ojota jae ndive.

21Omanogüe reta ñogüɨnoia güi, jëia yae ñeraro pe vae reta imiari retata jese oñemoïru jae reta ndive vae ndive: ‘¡Yogüeru reta ma! ¡Oyepɨso Tumpa re güɨroviambae reta ñeraro pe omano vae reta ndive!’

22Joko pe ñogüɨnoi Asiria opaete isundaro reta ndive, jare jɨvɨa ñogüɨnoi iyɨ́vɨri rupi; opaete jae reta omano ñeraro pe vae ko.

23Jɨvɨa reta oñeñono ɨvɨkuasoro pe jare isundaro reta jɨvɨa ñogüɨnoi iyɨ́vɨri rupi, opaete kuae reta omano ñeraro pe; kuae reta oporomongɨɨye reta yepi ɨvɨ pe.

24Joko pe oï Elam jare iyɨ́vɨri opaete isundaro reta jɨvɨa; opaete jae reta omano ñeraro pe, jae reta ko Tumpa re güɨroviambae reta, opaete yogüɨraja ɨvɨgüɨ kotɨ. Echa oporomongɨɨye reta yepi ɨvɨ pe, ërei añave ñogüɨnoi ñemomarai pe omanogüe reta ñogüɨnoia pe.

25Isundaro reta omanogüe ipɨte pe oñeñono jɨvɨa; opaete jae reta Tumpa re güɨroviambae reta, jɨvɨa reta oyere oï jese. Echa oporomongɨɨye reta yepi ɨvɨ pe, ërei añave ñogüɨnoi ñemomarai pe omanogüe reta ñogüɨnoia pe. Oyeyukauka vae reta ipɨte pe oñeñono.

26Joko pe oï tëta Mesec jare Tubal, isundaro reta jɨvɨa ñogüɨnoi iyɨ́vɨri rupi, jae reta Tumpa re güɨroviambae reta ko, opaete omano reta ñeraro pe, echa oporomongɨɨye reta yepi ɨvɨ pe.

27Mbaetɨ oñeotɨ reta, Tumpa re güɨroviambae reta jëia yae ñeraro pe vae reta oñeotɨa pe, jae reta yogüɨraja omanogüe reta ñogüɨnoia pe jembiporu ñeraro pegua ndive, güɨnoi reve ikɨsepuku iñäka igüɨ pe, jare iyeopiaka jete re, echa oporomongɨɨye reta yepi ɨvɨ pe jeko pegua.

28Joko pe reɨ̈ta nde Egipto, Tumpa re güɨroviambae reta ipɨte pe, ndetɨvɨa oïta ñeraro pe omanogüe reta ipɨte pe.

29Joko pe ñogüɨnoi Edom pegua reta, juvicha guasu reta jare juvicha reta ndive. Yepe tëi imbaepuere yae reta, ërei ñogüɨnoi omano ñeraro pe vae reta ndive; oñeotɨ ipɨte pe, omanogüe reta ñogüɨnoia pe, Tumpa re güɨroviambae reta.

30Joko pe ñogüɨnoi opaete mburuvicha reta ɨvɨtuguasu kotɨgua, jaeramiño vi Sidón pegua reta, oporomongɨɨye yae yepi tëi reve; yogüɨraja ñeraro pe omanogüe vae reta ndive, jae reta ko Tumpa re güɨroviambae reta, ñogüɨnoi vi ñemomarai pe, omanogüe reta ñogüɨnoia pe.

31Faraón oecha kuae reta yave, ipɨakatuta jeta vae reta re, echa jae omano ñeraro opaete isundaro reta ndive. Che Tumpa jae kuae.

32Echa añono cheporomongɨɨye Faraón rupi opaete ɨvɨ pegua reta re; jáeramo Faraón jare opaete isundaro reta ave oñeotɨta Tumpa re güɨroviambae reta ipɨte pe, ñeraro pe omanogüe vae reta ñogüɨnoia pe. Che Tumpa jae kuae.”