1¡Ikavi yae ko reikoa,
cheYa Tumpa Imbaepuere yae ete vae!
2¡Aipota yae jare chekɨ̈reɨ yae
aï vaerä nderoka pe, cheYa!
¡Opaete chepɨa ndive atairari
ayerovia reve Tumpa oikove vae pe!
3Güɨra raɨ ave oväe jorä
jare tapérai jaitɨrä, omboa vaerä pɨpe
ndembae mɨmba oyeapɨ jese vae oïa pe,
cheYa Imbaepuere yae ete vae,
cheruvicha guasu, cheRu Tumpa.
4¡Oyerovia ko, ndero pe yogüɨreko vae,
jókuae ndemboete avei reta vae!
5¡Oyerovia ko, kuimbae nderé ipɨ̈rata vae,
jókuae ipɨa pe güɨnoi reta
kɨ̈reɨ ngatu oguata vaerä vae!
6Oasa ɨvɨtɨ päu ipe kavi Yaeo Renda jee vae yave,
oipoepɨ reta ɨesaɨ pe,
ama omotɨnɨe vi ɨ jɨru reta,
7okuakuaa retata imbaepuere
jare oecha retata Tumpa, Sión pe.
8CheYa Tumpa Imbaepuere yae ete vae, ¡eendu cheyerure!
¡Jacob iTumpa, eyeapɨsaka!
9CheRu Tumpa, oreyeopiaka,
emae kavi nderembiparavo re.
10¡Echa ikavi yae ko aï vaerä metei ara nderoka pe,
jeta ara ikatu rupi aiko vae güi!
Ikavi ko aiparavo aiko vaerä tupao jöke järoarä
mbaeyoa ipɨte pe aiko vae güi.
11Echa yandeYa Tumpa ko omboesape jare oporoepɨ vae;
jae omeeta mboroaɨu jare mboromboete,
ngaraa opɨ̈ro mbae ikavi vae,
ipɨa jupi rupi oguata vae güi.
12CheYa Tumpa Imbaepuere yae ete vae,
¡oyerovia ko jókuae nderé oyeko vae!
Who We AreWhat We EelieveWhat We Do
2025 by iamachristian.org,Inc All rights reserved.
