1YandeYa jei Moisés pe:
—Peyeupi che aïa pe, nde jare Aarón, Nadab, Abiú jare setenta Israel iñemuña itenondegua reta; jare chemboete mombɨrɨ güiño.
2Ërei ndeño eya cheré; jare opaete Israel iñemuña reta agüɨye toya, agüɨye toyeupi nde ndive.
3Jare Moisés ou omombeu Israel iñemuña reta pe, opaete yandeYa iñee reta jare opaete mborookuai reta; jare opaete reve metei rami jei reta Moisés pe:
—¡Toroyapo opaete yandeYa jei vae!
4Moisés oikuatía opaete yandeYa iñee reta, jare opüa pɨareve ndeimbove yave, jare omopüa metei mɨmba oyeyuka oyeapɨ jese vae ɨvɨtɨ igüɨ pe, jare oñono doce ita, Israel doce taɨ iñemuña peguarä ñavo.
5Omondo Israel iñemuña reta güi, taɨrusu vae reta omee vaerä yandeYa pe mɨmba reta oyeyukagüe opaetei oyeapɨ vae jare toro taɨrusu vae reta, mɨmba oyeyukagüe mbɨakatu pegua.
6Jare Moisés omboɨru jugüɨgüe, mbɨte rupi oñono tasa guasu pe, jare mbɨte rupi vi opa oñapiramo pɨpe mɨmba oyeyuka oyeapɨ jese vae.
7Jare oipɨɨ tembikuatía morogüɨrökuavee päve regua oï pɨpe vae, jare omongeta opaete vae reta pe, jare jae reta jei:
—Toroendu jare toroyapo opaete mbae yandeYa jei vae.
8Jayave Moisés oipɨɨ tugüɨ jare oñapiramo opaete Israel iñemuña reta iárambo, jei reve:
—Kuae ko jae tugüɨ morogüɨrökuavee päve regua,
9Jare oyeupi Moisés, Aarón, Nadab, Abiú jare setenta Israel iñemuña itenondegua reta;
10jare joko pe oecha reta Israel iTumpa; oecha reta ipɨ igüɨ pe ipe kavi, ita zafiro jee vae jembipeasɨ rami vae, ara jembipeasɨ oï rami etei vae.
11Ërei Tumpa mbaetɨ mbae oyapo Israel iñemuña juvicha reta kotɨ; oecha reta Tumpa jare mbaetɨ omano reta.
12Jayave yandeYa jei Moisés pe:
—Eyeupi eyu chekotɨ ɨvɨtɨ re, cheräro joko pe, ameeta ndeve ita ipe vae; mborookuai reta aikuatía amboe reta vaerä.
13Moisés opüa ojo jembiokuai Josué ndive. Jare Moisés oyeupi Tumpa iɨvɨtɨ re.
14Jare jei tenondegua reta pe:
—Oreräro kuae pe, royu ye pekotɨ regua; Aarón jare Hur oï pe reta ndive; oime yave maratu, pekua jae reta pɨri.
15Jayave Moisés oyeupi ojo ɨvɨtɨ re, jare amapɨtu opa oyasoi ɨvɨtɨ.
16Javoi yandeYa iyemboetea ogüeyɨ ɨvɨtɨ Sinaí re, jare amapɨtu opa oyasoi ova ara rupi; jare chiúa ara pe Tumpa oenɨi Moisés amapɨtu iyɨvɨte güi.
17YandeYa iyemboetea oyekuaa tata tuicha yae vae rami ɨvɨtɨ iyapɨte re, opaete Israel iñemuña reta jovake.
18Jare Moisés oike amapɨtu iyɨvɨte pe, oyeupi ɨvɨtɨ re; Moisés oiko ɨvɨtɨ re cuarenta ara jare cuarenta pɨ̈tu.
Who We AreWhat We EelieveWhat We Do
2025 by iamachristian.org,Inc All rights reserved.
