JUDIT 8 - Guarani Bible with DC

Judit oñemoë

1Opaete kuae mbae oasa vae oa ojo Judit iyapɨsa re. Judit jae ko Merarí tayɨ, jae ko Us taɨ, José iñemuña, jare Uziel, jare Elcías, jae ou Ananías güi, jókuae ou Gedeón güi, jare Gedeón ou Rafaín güi, jae ou Ahitud güi, Ahitud ou Elías güi, jókuae ou Hilcías güi, Hilcías ou Eliab güi, Eliab ou Natanael güi, Natanael ou Selumiel güi, Salumiel ou Surisadai güi jaema jókuae jae Israel iñemuña ma.

2Jaema Judit ime amɨri, Manasés jee vae jae ko kuae reta jëtara ma jare jaɨe ma vi ko, ërei jae ko omano cebada oyepoo ma oï yave.

3Trigo ipooa reta re omae oiko yave, kuaraɨ omombaerasɨ, jaemai oa jupa pe jare ojo omano Betulia pe, jae jëta pe. Oñotɨ reta ko iñemuñagüe reta pɨri, jae ko Dotán jare Ibleam ipäu pe.

4Jaema mboapɨ año jare irundɨ yasɨ o Judit imembae, oiko jëta pe.

5Jare jo iárambo oyapouka iyeupe iküaraɨarä. Jare jae omonde oiko temimonde jaimbe vae imemano pegua.

6Jaema jae ime omano güive ma ara ñavo ko oyekuaku oiko tembíu güi, jaeño ma mbaetɨ oyapo mbutuu iara pe ani ramo jenondeve, jare yasɨ pɨau pe jare jenondeve, jare Israel-ɨgua reta iyarete yave iyapirai iara pe.

7Jae ko kuñatai ikavigüe vae. Ime amɨri Manasés, oeya chupe opaño mbaembae reta; oro, korepoti, tembiokuai reta, mɨmba reta jare ɨvɨ. Jaema iyeí ko oiko,

8jare ko jae täta Tumpa omboete, jaema mbaetɨ etei ko kia oyemongeta pɨ̈chɨi ikotɨ.

9Judit oendu oï tëta ipo reta jeta ikavimbae jei mburuvicha Ozías kotɨ vae, echa ɨ mbaetɨ vae opa ma ombopɨtu reta güɨnoi. Jare oendu vi oï jae omeeta ko kuri tëta Asiriaɨgua reta pandepo ara oasa yave.

10Jaemai jae omondo jembiokuai tenondegua vae, ombou vaerä Cabris jare Carmis, jae ko ndechi reta jókuae tëta pegua,

11jare yogüeru oväe yave jei chupe reta:

—Peyeapɨsaka cheré, Betuliaɨgua juvicha reta: mbaetɨ ipöra aipo aramo pere tëta ipo reta pe vae, aipo perökuavee Tumpa jovake vae, pemee vaerä tëta yanderovaicho reta ipo pe pandepo araa pe Tumpa mbaetɨ yandemborɨ yave.

12¿Kia pa ko pe Tumpa peyaporai peiko vaerä mbae oyapo vaerä añave voi, jare peñeñono peiko Tumpa jekovia pe kuimbae reta ipɨte pe?

13Pe reta pemee peiko ñee Tumpa täta imbaepuere vae pe, ërei ngaraaí mbae peikuaa.

14Ngaraa pepuere peikuaa kia iyemongeta jare, këraita yera peikuaa Tumpa iyemongeta, opaete mbae iyapoa jae vae. ¿Këraita peikuaa mbae oipota oyapo vae? ¡Agüɨye jökorai cheraɨe reta, agüɨye yandeYa Tumpa pemboarasɨ yandeve!

15Jaema kuae pandepo araa pe jae mbaetɨ ko oipota yandemborɨ yave, jeseño ñaï kërai yave yandemborɨ vaerä vae, ani ramo omee vaerä opa ñamano yanderovaicho reta jovakei.

16Agüɨye peyaporai yandeYa Tumpa iyemongeta oyapo vaerä, jae ngaraa yayaporai yave oyapo, oipotagüe kuimbae rami.

17Yavaimbae, yaiporu chupe yandemborɨ vaerä. Chupegua jaekavi yave, oenduta ko yandeve.

18Añave rupi mbaetɨ etei ko ñaneñemuña pe, ñanerëtara, ñanerëta reta ani tëta guasu reta, omboete Tumpa kuimbae oyapogüe vae. Jókuae ko oiko karamboe yave,

19jókuae ramo ko yandetenondegua reta Tumpa omee mano pe jare opɨ̈rouka vaerä imbaembae reta, jaema yanderovaicho reta opa mbae omokañɨtei chugüi reta.

20Jaema añave, yande reta mbaetɨ ko ñanoi ïru Tumpa chugüi; jaeramo ko yarovia jae ngaraa yande ñaneñono ïkotɨa jare ñanerëta guasu reta.

21Echa yande ñaneamɨri yave, opaete Judea ko oata jare yandetupao re opoko retata, jare Tumpa opaete vae yandemboekota jókuae re,

22ñanerëtara reta imano re jare opaete ñanerëta okañɨtei vae re, jare yaikota tembipɨɨrä opaete tëta reta rupi. Ñanemoamɨri vae reta opukata yanderé jare yandekurata.

23Ngaraa ikavi tembiokuai yaiko, echa yandeYa Tumpa jaema ko ngaraa mboeteuka.

24Jökorai ko, cherëtara reta, yaiko kavi yanderapicha reta pe. Yanderé ko ñogüɨnoi jae reta, tupao, mbaemboete renda jare mbota renda.

25Opaete jókuae mbaembae reta re ñamee yasoropai yandeYa Tumpa pe, echa yandemboaporovai ko oï yandetenondegua reta rami.

26Pemaendúa mbae oyapo Abraham ndive vae, kërai Isaac omboaporova vae, jare kërai oasa Jacob Mesopotamia Asiria pe vae, itutɨ Labán ivecha re oyangareko oiko yave.

27Jae mbaetɨta ko ñanejäa oï tata pe jae reta, ani ramo mbaetɨ ko oyepɨ oï yanderé; jae oiporarauka ko kia oyemboya jese vae pe, jare oyapo kavi vaerä ko.

28Jaema Ozías jei chupe:

—Opaete rere vae jaekavi yae rere; ngaraa kia ipuere ndeaka.

29Jare jaeramoä ko kërai reechauka ndearakuaa; nemichi güive ko, opaete mbae reregüe vae oikuaa vae, echa nde jae kuña iyarakuaa katu vae.

30Ërei añave ko tëta reta opata ma ɨuve oyuka güɨnoi, jaema jókuae jeko pegua ko jökorai roe jare royapo jókuae oreñererökuavee, jare royapota ko.

31Ndeko metei kuña iporoaɨu vae, añave eyerure Tumpa pe oreré, yandeYa ombou vaerä ama yandeve jare opa omotɨnɨe yandeve yande ɨrɨru reta agüɨye vaerä mo yandepɨtu ñaï.

32Judit jei chupe:

—Peyeapɨsaka cheré; ayapota metei mbae ñanerëta ipo reta iñakañɨ ye mbae chugüi vae.

33Kuae pɨare pe reta peï tëta jöke pe, jare che aëta aja cherembiokuai ndive; jare ndei ara ou oväe mbove pe reta pemee vaerä tëta yanderovaicho reta pe, yandeYa chereko pegua güɨroasayepeta Israel.

34Agüɨye peparandu mbae ko ayapota vae re, jare ngaraa amombeu peve ojo oyeapo regua.

35Jaema Ozías jare ïru reta jei chupe:

—¡Ekua pɨagüiveño! ¡YandeYa tojo nderenonde oiporarauka vaerä yanderovaicho reta pe!

36Jaema jayave opa reta oë ojo Judit jëta güi jare opa ye yogüɨraja oï jenda rupi.