2 SAMUEL 2 - Guarani Bible with DC

Omboguapɨ reta David mburuvicha guasurä

1Kuae jaɨkue rupi David oparandu yandeYa pe, jei reve:

—¿Ajata pa kia nunga tëta guasu Judá pegua pe?

Jare yandeYa jei chupe:

—Ekua.

Jare David jei ye:

—¿Kia pe pa ajata?

Jare jae jei chupe:

—Ekua Hebrón pe.

2Jare David ojo jokotɨ, jare yogüɨraja jupíe jembireko reta mókoi reve; Ahinoam, Jezreel pegua jare Abigail, Nabal amɨri Carmel1 S 25.42-43. pegua jembirekogüe.

3Jare David güɨraja vi jupíe kuimbae reta yogüɨreko jae ndive vae, jo pegua ndive ndive; jare oñemoëta reta Hebrón iyɨ́vɨri rupi tëta guasu reta ñogüɨnoi vae pe.

4Jare yogüeru kuimbae Judá iñemuña reta omboguapɨ David mburuvicha guasu Judá peguarä.

Imiari reta David pe, tëta Jabes pegua reta ko oñotɨ Saúl vae,1 S 31.11-13. Tëta Jabes ko ɨvɨ Galaad pegua.

5Jayave David omondo ñee jerajaa reta tëta Jabes pegua reta kotɨ jei reve: “YandeYa tiporerekua peré, peiparareko jare peñotɨ ramo peruvicha guasu Saúl.

6YandeYa tapeparareko jare agüɨye tapereeya. Che ayapota vi peve ikavi vae, kuae peyapo vae jeko pegua.

7Añave, peñemoäta ngatu jare peñemomɨ̈rata; echa, yepe peruvicha guasu Saúl omano ko, ërei Judá iñemuña reta cheparavo aiko vaerä juvicha guasurä.”

Israel jare Judá oñoraro

8Ërei Abner, Ner taɨ, Saúl amɨri isundaro reta itenondegua ete güɨraja Mahanaim kotɨ Is-boset, Saúl taɨ,

9jare joko pe omboguapɨ mburuvicha guasurä ɨvɨ Galaad re Gesuri re, Jezreel re, Efraín iñemuña reta re, Benjamín iñemuña reta re jare opaete Israel re.

10Is-boset, Saúl taɨ cuarenta año güɨnoi omboɨpɨ oï mburuvicha guasurä Israel re yave, jare oiko mburuvicha guasurä mókoi año. Ërei Judá iñemuña reta güɨnoi David juvicha guasurä.

11Jare David oiko mburuvicha guasurä Hebrón pe, Judá iñemuña reta re chiu año jare ova yasɨ.

12Abner, Ner taɨ ojo Mahanaim güi Gabaón kotɨ, Is-boset Saúl taɨ isundaro reta ndive.

13Jare Joab, Sarvia imembɨraɨe oë vi David isundaro reta ndive, jare oñoövaiti jae reta ndive Gabaón pe, metei ɨrɨru oïa pe. Jare oñeñono reta ɨrɨru jovaicho icho pe.

14Jayave Abner jei Joab pe:

—Toñoraro kunumi reta yanderóvai.

Jare Joab jei:

—Toñoraro.

15Jayave Benjamín iñemuña reta güi ñogüɨnoe doce Is-boset isundaro, jare David isundaro reta doce vi;

16jare oyopɨɨ reta iñäka pe, oyokutu reta iñäruka pe kɨsepuku pe, jökorai opa oyoyuka reta metei rami. Jáeramo oyembojee Helcat-hazurim jókuae, kuae oï Gabaón pe.

17Yavaete ñeraro jókuae ara, Abner jare Israel pegua sundaro reta oñemoamɨriuka David isundaro reta pe.

18Jare ñogüɨnoi joko pe Joab, Abisai jare Asael, jae ko Sarvia imembɨraɨe reta. Jare Asael yepe iñäkua yae, guasu iñäkua kaa rupi osɨi vae rami,

19jae omboɨpɨ oaɨkuemoña Abner, mbaetɨ opia ketɨ ave chugüi.

20Jare Abner oyerova omae yave, oecha jare jei:

—¿Asael ko nde no?

Jare jae jei:

—¡Jae ko che!

21Jayave Abner jei chupe:

—Agüɨye mo chemoña, eipɨɨ metei sundaro jare epɨ̈ro chugüi imbaembae.

Ërei Asael mbaetɨ omaeño jese.

22Abner jekuae jei ye chupe:

—¡Agüɨye mo chemoña! Royuka yave, ¿këraita pa aja ye nderɨkeɨ Joab jóvai?

23Ërei Abner oecha Asael mbaetɨ oipota oeya ramo oikutu jɨe pe imii itï pe, jare oë ojo ikupe kotɨ, jare Asael omano oa joko pe voi. Jare opaete oasa jokoropi vae opɨta omae jese.

24Ërei Joab jare Abisai jekuae güɨrave oaɨkuemoña Abner; jare kuaraɨ oa ma yave opa yogüɨraja oväe ɨvɨtɨ Amma jee vae re, kuae oï Gía jóvai, tape ojo Gabaón iñuu kotɨ vae jembeɨ pe.

25Joko pe Benjamín iñemuña reta oñemoïru metei ramiño Abner ndive; jare oñepɨ̈ro reta jókuae ɨvɨtɨ iyapɨte re.

26Jayave Abner osapúkai Joab pe jei reve:

—¿Jekuae ñotai pa omano vae? ¿Mbaetɨ pa reikuaa kuae rupi outa yandeve mbɨatɨtɨ jasɨ katu yae vae? ¿Kërai yave pa rereta ndesundaro reta pe, agüɨye mo vaerä oaɨkuemoña jëtara reta?

27Jare Joab jei:

—YandeYa jee re tae ndeve, mbaetɨ neñee remoë yave, chesundaro reta jekuaeñota ko oaɨkuemoña viña jëtara reta köe regua.

28Jupiveiño Joab omoñeeuka vecha kuimbae-räti jare opaete vae mbaetɨ ma oaɨkuemoña Israel iñemuña reta jare mbaetɨ ma vi oñeraro reta.

29Jare jókuae pɨ̈tu Abner jare isundaro reta iköe oguata ñuu Arabá rupi; ombosɨmbi reta tape Jordán jare Bitrón rupi, jare opa yogüɨraja reta oväe Mahanaim pe.

30Jare Joab mbaetɨ ma oaɨkuemoña Abner yave, omboatɨ isundaro jare oipapa, jayave oecha oata diecinueve David isundaro reta güi Asael ndive.

31Ërei David isundaro reta oyuka Benjamín iñemuña reta güi jare Abner isundaro reta güi tresciento sesenta kuimbae.

32Javoi oipɨɨ reta Asael jëogüegüe jare güɨraja reta oñotɨ tu jɨvɨa oïa pe, Belén pe. Jare jókuae pɨ̈tu Joab jare isundaro reta iköe oguata, jare köe ma yave opa yogüɨraja oväe reta Hebrón pe.