ESTER 8 - Guarani Bible with DC

Asuero omee mborookuai oepɨ vaerä Judáɨgua reta

1Jókuae ara voi mburuvicha guasu omee Ester pe Amán imbaembaegüe jare jogüe, jae ko Judáɨgua reta re oyemboyovaicho vae; jare Mardoqueo ou mburuvicha guasu jóvai, echa Ester yepe omombeu ma chupe jae ko itutɨ vae.

2Jare mburuvicha guasu oekɨ ipoäka güi moäka-vera opɨ̈ro ye Amán güi vae jare omee Mardoqueo pe. Jare Ester omee Mardoqueo ipo pe opaete mbaembae Amán imbaegüe.

3Ester jekuae imiari ye mburuvicha guasu ndive, oyetavatɨka reve itindɨasɨ jae ipɨ re, oyaeo jare omoñera reve omboai vaerä Amán Agag iñemuña omee mborookuai ikavimbae yae vae, agüɨye vaerä jókuae oyeapo oï Judáɨgua reta kotɨ vae oyembopo.

4Jayave mburuvicha guasu ipopoka oro pegua güɨropövee Ester kotɨ, jare jae opüa oyemboɨ mburuvicha guasu jóvai.

5Jare jei:

—Mburuvicha guasu, jaekavi ndeve yave jare ndepɨakatu chekotɨ, jare aiporu vae rerovia jaekavi yave, jare nde añetete cheraɨu yave, toyekuatía metei mborookuai omboai vaerä Amán, Hamedata taɨ Agag iñemuña oyapogüe, opa vaerä Judáɨgua reta oñemokañɨtei opaete tëta reta rupi vae.

6Echa, ¿këraita pa aropɨa cherëtaɨgua reta pe ou oväe ikavimbae vae? ¿Këraita pa aropɨa opa oñemokañɨtei vae?

7Jayave mburuvicha guasu Asuero jei jembireko Ester pe jare Mardoqueo Judáɨgua pe:

—Mase, ko amee Ester pe Amán jo, jare jae oeterasa reta ɨvɨra re, echa jae oyemongeta pɨ̈chɨi ramo Judáɨgua reta kotɨ.

8Peikuatía Judáɨgua reta pe, peikuaa rupi cheree re, jare pemboyeɨ jese chepoäka-vera; echa mborookuai mburuvicha guasu jee re oyekuatía jare ipoäka-vera oyemboyeɨ jese yave, ngaraa ye ma oyemboai.

9Jayave oenɨiuka mburuvicha guasu pe ombaekuatía vae reta, veintitré ara mboapɨa yasɨ pe, jae ko Siván, jare oyekuatía Judáɨgua reta pe Mardoqueo oporookuai rami, ɨvɨ iyangarekoa reta pe, sundaro ruvicha reta pe, mburuvicha tenondegua tëta ñavo ñogüɨnoia pe, tëtaguasu India güive tëtaguasu Etiopía kotɨ, ciento veintisiete ɨvɨ oyemboyao vae reta; tëta ñavo imbaekuatía ae pe, jare iñee ae pe, jökoraiño vi Judáɨgua reta pe imbaekuatía ae pe jare iñee ae pe.

10Jare oikuatía mburuvicha guasu Asuero jee re, jare ipoäka-vera omboyeɨ jese, jare omondo kuatía jerajaa reta ndive kavayu iñäkua vae re, mburuvicha guasu ikavayu reta re;

11pɨpe mburuvicha guasu jei Judáɨgua reta ñogüɨnoi opaete tëta guasu rupi vae oyemboatɨ vaerä, oporepeña jese reta vae güi oyeepɨ vaerä; toyuka jare topa tomokañɨtei oipotagüe tovaicho yogüeru tëta güi ani ïru ɨvɨ güi vae, kuña jare michia reta vi jare toyemombae imbaembaegüe reta re,

12metei jeia pe jókuae ara toyeapo, yasɨ Adar pe, jae ko yasɨ docea ara trece pe.

13Kuatía mborookuai oñemoërakua tëta ñavo rupi pɨpe vae, jare oikuaauka opaete pe vae, Judáɨgua reta ñogüɨnoi kavi vaerä jókuae ara, oyepɨ vaerä jovaicho reta re.

14Tupapire jerajaa reta opo kavayu iñäkua yae vae re, jarembae pegua güɨraja mburuvicha guasu mborookuai omee vae; jókuae mborookuai oñemoërakua vi Susa pe, kuae tëta güi mburuvicha reta oporookuai.

15Mardoqueo oë mburuvicha guasu oïa güi temimonde mburuvicha pegua jovɨ jare tïi vae ndive, jare äka-regua oro pegua tuicha vae ndive, jare oñeapeva lino pegua pɨ̈ta vae pe. Jayave tëta guasu Susa pegua reta oyerovia yae jare oyekou.

16Jare Judáɨgua reta güɨnoi mbɨakatu, yerovia jare omboete yae reta vae.

17Opaete tëta ñavo mburuvicha guasu iporookuai ojoa rupi, Judáɨgua reta oyerovia yae jare ipɨakatu, jare oyapo reta arete okaru vaerä jókuae ara. Jare jeta jókuae tëtaɨgua reta oyeapo Judaɨguarä, echa okɨɨye reta Judáɨgua reta güi.