JOB 30 - Guarani Bible with DC

Job güɨroäse oiporara oï vae

1Ërei añave cheyóyai kunumi reta taɨrusu yae chegüi vae,

tu reta aröɨro añono cherɨmba iyangarekoa reta ipɨte pe.

2¿Mbae pe ra chemborɨta?

Jae reta ave mbaetɨve ma ipuere,

3paravete jare yɨmbɨaɨ jeko pegua oguata reta jae aeño,

otekuarai reta ipombaea kotɨ pɨtumimbía kotɨ, ñuu kotɨ.

4Omonoo reta güɨrakɨyo ñana pɨte rupi,

mangara jou reta.

5Oyemombouka reta jeta vae reta ipɨte güi,

jeta vae reta osapúkai ikotɨ imonda vae re rami.

6Yogüɨreko reta ɨ̈aka iñɨ̈vɨa rupi,

ɨvɨkua rupi jare itakua rupi.

7Oyeendu reta ipu ñana pɨte rupi,

oyemboatɨ reta yuu reta igüɨ rupi.

8Osirivembae reta, mbaragüe reta,

tëta güi oyemombogüe reta.

9Añave jae reta cheyóyai yóyai,

opuka reta cheré vaeräño aiko.

10Oyuguaru reta jare osɨrɨ reta chegüi,

ondɨvɨ reta cherova re.

11Echa Tumpa oyora ichikote jare oiporarauka cheve,

jáeramo mbaetɨ chemboete reta.

12Cheakatu kotɨ opüa cheve chemboeko vae reta,

chereitɨ reta, oipota cheyuka reta.

13Cherape oyopia reta chemokañɨtei vaerä,

mbaetɨ kia oyopia reta vaerä.

14Yogüeru reta öke ipɨguasu vae rupi rami,

oyere reta aiporara aï vae re.

15Chemongɨɨye yae reta,

ɨvɨtu rami ojo chegüi anoita tëi vae,

aiko kavi vae oasa chegüi amapɨtu rami.

16Añave mbaetɨ ma aipota aiko vaerä,

tembiporara reta chemoamɨri.

17Mbae jasɨ ojo chekägüe reta pe oväe;

mbaetɨ oasa chegüi jasɨ vae pɨ̈tu yave.

18Tumpa chepɨɨ cheayu rupi,

jare omotumo cheremimonde ipɨ̈rata yae pe.

19Jae chereitɨ tuyuapo pe,

ɨvɨkúi ani tanimbu rami.

20Chetumpa, asapúkai ndeve yave mbaetɨ reendu cheve,

ayu nderóvai jare nde mbaetɨ remae cheré.

21Ndepɨapochɨ reyeapo chekotɨ,

ndembaepuere pe reiporarauka cheve.

22Chererajauka ɨvɨtu pe,

jare chemboaiuka ɨvɨtuai pe.

23Echa che aikuaa ko chereraja mano kotɨ,

opaete oikove vae reta yogüɨraja ñogüɨnoia kotɨ.

24Ërei ngatu, che amborɨ paravete vae,

aepɨ osusere oï vae.

25Aäpiro oiporara vae,

aiparareko mbae oata chupe vae.

26Aäro ikavi vae yave, ou cheve ikavimbae;

aäro tembipe, ou cheve pɨtumimbi.

27Chembopɨanduku aputuumbae,

ou oväe cheve ara reta mbɨatɨtɨ pegua.

28Cherüu aguata, ërei mbaetɨ kuaraɨ cherapɨ güi,

opaete vae jovake aiporu yemborɨ.

29Ayu apɨta aguarayaɨmba rami,

yandu reta ïrurä.

30Chepire opa moroü jare osururu,

jare chekägüe jasɨ cherete jaku jeko pegua.

31Arpa reta jare mimbɨ reta iñee,

oyepoepɨ cheve yaeo mbɨatɨtɨ pegua pe.