JOB 24 - Guarani Bible with DC

Job güɨroäse Tumpa mbaetɨ ikavimbae ombopɨa-kërai vae

1¿Maera ra Imbaepuere yae ete vae mbaetɨ oñono ara oporojäa vaerä,

ipuere vaerä oikuaa vae reta oecha jae iporojäa?

2Jeko kavimbae reta güɨrosɨrɨ

iɨvɨ jembeɨ ïru iɨvɨ kotɨ,

oñomi reta mɨmba, omoïru vaerä jɨmba reta.

3Tɨ̈reɨ reta imburika güɨraja chugüi,

imemano vae igüeye opɨ̈ro reta chugüi.

4Oyerure mbae re vae reta osɨrɨ oïa güi,

jare opaete paravete vae reta oñemi.

5Paravete vae reta mburika ñana rupigua rami ñuu rupi,

ndei köe mbove oë reta oeka jembiurä,

kaa ipombae vae rupi oeka reta tembíu taɨ reta peguarä.

6Oyevɨka reta ko ambuae vae rupi,

oyevɨka reta jeko pɨ̈chɨi vae reta iuvarupa rupi.

7Pɨ̈tu yave oke reta iyasoyambae,

mbaetɨ oyasoi reta iroɨ güi.

8Ɨvɨtɨ rupi opa ama omoäkɨ reta,

jare oñemi reta ita igüɨ rupi.

9Jeko kavimbae reta opɨ̈ro

imemano vae reta güi imembɨ raɨ,

jare paravete vae reta güi opɨ̈ro imbaembae.

10Paravete vae oguata nandi,

yɨmbɨaɨ güɨraja ramboeve trigo.

11Omboyere reta ita ombaeso vae oekɨ reta vaerä asaite,

opɨ̈ro reta uva re oñetɨamía pe, oyapo vaerä vino,

jare ɨuve oyuka reta.

12Tëta guasu güi jäse omano pota vae reta,

jare ipere vae reta oiporu yemborɨ,

ërei Tumpa mbaetɨ oendu chupe iyerure.

13Oime amogüe reta güɨröɨro tembipe,

mbaetɨ oipota oikuaa reta Tumpa jape,

mbaetɨ opɨta reta jape pe.

14Oporoyuka vae ndei köe mbove opüa oyuka paravete vae,

jare pɨ̈tu yave omaeñomi.

15Menda re oyuvanga vae oäro pɨtumimbi vae,

oñova kavi jova,

oyemongeta jayave ngaraa kia oikuaa.

16Imonda vae oike pɨ̈tu yave o reta rupi,

ara pe oyeokenda reta o pe,

tembipe jovaicho reta ko.

17Chupegua reta ara jembipe vae pɨtumimbi yae vae rami ko;

oipota reta mbae ikavimbae pɨ̈tu pegua.

Zofar:

18Ɨ güɨraja jeko pɨ̈chɨi vae reta,

iɨvɨ opɨta yepopeyu igüɨ pe,

jare mbaetɨ ye kia oparavɨkɨ iuvarupa reta pe.

19Jakuvo yae mbaetɨ okɨ jeko pegua, iroɨ tɨkui;

jare tɨvɨa pe iyoa vae okañɨ.

20Ichɨ iñakañɨta chugüi;

taso reta opata jou,

ngaraa ye ma kia imaendúa jese,

ɨvɨra oyeasɨa ramita iyoa vae reta.

21Echa kuña reta imembɨmbae jare imemano vae reta re,

oyuvanga katu avei, mbaetɨ omborɨ.

22Ërei Tumpa imbaepuere pe omboai imbaepuere vae reta.

Jae opüa yave, mbaetɨ kia ipuere ojoyepe.

23Tumpa omaeño oiko pɨagüive reta,

ërei jae omae opaete oyapogüe reta re.

24Michi raɨ pegua oiko kavi jeko pɨ̈chɨi vae reta,

ërei jarembae mbaetɨ ma oiko,

ipiru ñana oyeapomondoro rami,

avati oyemboyeapa vae rami.

25Kuae mbaetɨ yave jökorai,

¿kia pa ipuere oechauka cheve cheapu ko aï vae,

ani ayavɨ ko vae?