1CheYa, eyeapɨsaka cheyerure re,
¡tojo toväe ndeve chesapúkai!
2Agüɨye chereeya chepɨatɨtɨ aï yave,
emboɨke ndeapɨsa chekotɨ;
¡jarembae voi emboyevɨ cheve roenɨi yave!
3Echa cherekove opa oï chegüi tätati rami;
jare chekägüe reta opa ókai tatasɨgüe rami.
4Chepɨa ipuere veä ma,
ñana opa ipiru vae rami aï;
¡jáeramo, cheakañɨ tembíu güi ave!
5Aiporara yae jeko pegua,
chekägüe yepeaiño ma.
6Surumbukuku ñuu rupigua jaeño vae rami ko che,
suinda oñemoëta ogüe reta rupi rami ko che.
7Mbaetɨ chepuere ake,
güɨra jaeño oguapɨ o iárambo rupi vae rami ko che.
8Ara ñavo cherovaicho reta oyapo ikavimbae cheve,
jare iyarasɨ chekotɨ vae reta oyomboemboe cheré.
9Jáeramo, jëe ngatúa cheve tembíu chepɨatɨtɨ güi,
jare cheresaɨ oyea rami cheɨgua ndive.
10Ndearasɨ yae jeko pegua,
chereupi jare chemombo ɨvɨ re.
11Ara reta oasa ojo oiko chegüi,
küaraɨa oasa ramiño;
ñana ipiru ojo oiko rami aiko.
12Ërei nde cheYa, reiko avei vae ko;
¡nderee re imaendúa jekuae avei vae ko!
13Epüa jare eiparareko mo Sión,
echa oväe ma ko ara;
¡oväe ma ko neɨ̈ro chupe vaerä!
14Nderembiokuai reta oaɨu omae jëtagüe ita reta re,
¡ipɨatɨtɨ omae reta jëtagüe opa oyemboai vae re!
15Opaete tëtaguasu reta jare mburuvicha guasu reta
oipoɨuta yandeYa jee imboetea yae vae güi.
16YandeYa omopüa ye Sión yave,
oyekuaa iyemboetea yave,
17oendu yave ipuerembae oyeepɨ vae reta iyerure,
oendu yave iyerure chupe reta.
18Toyekuatía kuae, taɨkue rupi yogüɨrekota vae reta peguarä,
jókuae ndei vɨteri oa vae reta omboete vaerä yandeYa.
19Echa yandeYa omae oï ɨvate güi,
jae omae ara güi ɨvɨ re,
20oendu vaerä tembipɨɨrɨru pe jäse ñogüɨnoi vae reta,
oyora vaerä omano vaerä ma ñogüɨnoi vae reta;
21jërakua vaerä Sión pe yandeYa jee,
oyemboete vaerä Jerusalén pe,
22oyemboatɨ yave opaete tëtaguasu reta ketɨ ketɨ güi,
metei rami oyeokuai reta vaerä yandeYa pe.
23Jae chepɨ̈rata ombopɨtu chegüi;
mbaetɨ omaeño aiko puku.
24Jare jae: “CheRu Tumpa,
agüɨye chereekɨ ndei etei ɨma aikove aiko mbove.”
¡Nde neaño reta opambae ko!
25Iyɨpɨ ete pe nde ko reyapo ɨvɨ,
jare ara jae ko nderembiapo.
26Jae reta opata ko okañɨtei,
ërei nde reiko aveita;
opaete jókuae reta temimonde rami ko indechita;
¡temimonde rami reipoepɨta, jare oyepoepɨ retata!
27Ërei ngatu nde ko oyepoepɨmbaei vae,
neaño reta opambae vae ko.
28Nderembiokuai taɨ reta yogüɨrekota oipoɨumbae reve,
jare iñemuña reta yogüɨreko aveita nderóvai.
Who We AreWhat We EelieveWhat We Do
2025 by iamachristian.org,Inc All rights reserved.
