ÉXODO 5 - Guarani Bible with DC

Moisés jare Aarón Faraón jóvai

1Kuae jaɨkue rupi Moisés jare Aarón yogüɨraja jei Faraón pe:

—OreYa, Israel iTumpa jei körai: “Emaeño toyogüɨraja chembae vae reta ñuu kotɨ oyapo vaerä cheve arete mbaemboete pegua.”

2Ërei Faraón jei:

—¿Kia pa jókuae “peYa”, ayeapɨsaka vaerä iñee re jare amaeño vaerä yogüɨraja Israel iñemuña reta? Che mbaetɨ ko aikuaa peYa, ngaraa vi amaeño yogüɨraja Israel iñemuña reta.

3Jayave jae reta jei:

—Ore hebreo reta iTumpa oyekuaa oreve; añave, rojota ñuu kotɨ mboapɨ ara roguatata, jare romeeta mɨmba oyeyukagüe oreYa Tumpa pe, agüɨye vaerä güeru oreve mbaerasɨ ovakatu vae ani tovaicho.

4Jayave mburuvicha guasu Egipto pegua jei chupe reta:

—Moisés jare Aarón, ¿maera pa pembova kuimbae reta iparavɨkɨ güi? ¡Pekua ye peparavɨkɨa pe!

5Faraón jei ye vi chupe:

—Mase, kuae ñemuña reta jeta yae ma kuae ɨvɨ pe, ërei añave pe reta peipota peeyauka chupe reta iparavɨkɨ.

6Jókuae ara voi Faraón oyókuai mbaravɨkɨ re oyangareko vae reta jare oparavɨkɨ vae reta itenondegua:

7—Kuae ara güive agüɨye mo pemee kapii chupe reta oyapo reta vaerä ladrillo, añave rupi pemee peiko chupe reta rami. ¡Toyogüɨraja jae reta etei togüeru iyeupe kapii!

8Ërei tenonde rupi ladrillo oyapo yogüɨreko ramiño peyapouka chupe reta. ¡Agüɨye etei toata toyapo reta! Echa iyakɨ reta ko, jáeramo jei reta: “¡Yaja ñamee mɨmba oyeyukagüe ñaneTumpa pe!”

9Pemee jeta jókuae kuimbae reta iparavɨkɨrä; jokuaeño oyapo reta vaerä, agüɨye vaerä oyeapɨsaka reta apu re.

10Jayave mbaravɨkɨ re omae vae reta jare oparavɨkɨ vae reta juvicha reta yogüɨraja jei oparavɨkɨ vae reta pe:

—Faraón omee mborookuai agüɨye vaerä ma oñemee peve kapii.

11Peota pe reta etei peru kapii peyeupe peväea güi. Ërei agüɨye etei toata, jókuae ara ñavo peyapose vae güi.

12Jayave Israel iñemuña reta oñemoai opaete ɨvɨ Egipto rupi oeka reta vaerä ɨtɨ, kapii jekovia pe.

13Jare mbaravɨkɨ re omae vae reta omoangeko jei reta reve:

—Opa peyapo peparavɨkɨ, ara ñavo peyapota vae, kapii oñemeese peve yave peyapo rami.

14Jare Faraón iparavɨkɨ re omae vae reta oinupa Israel iñemuña reta güi mbaravɨkɨ re oyangareko vae reta, jei reve chupe reta:

—¿Maera pa kárumbo jare añave ave mbaetɨ opa peyapo ladrillo ara ñavo peyapota vae, tenonde rupi peyapose rami?

15Jare Israel iñemuña reta güi mbaravɨkɨ re oyangareko vae reta yogüɨraja Faraón pɨri, jei reta reve chupe:

—¿Maera pa körai oreapo ore nderembiokuai reta?

16Mbaetɨ ma oñemee oreve kapii, jeseve jei reta oreve royapo vaerä ladrillo, jare nderembiokuai reta orenupa. ¡Nderembiokuai reta ko güɨnoi teko!

17Jare Faraón omboyevɨ ñee chupe reta:

—¡Pe reta jae ko peparavɨkɨsembae! Jáeramo pere: “Yaja ñamee mɨmba oyeyukagüe yandeYa pe.”

18¡Pekua peparavɨkɨ! Ngaraa ma oñemee peve kapii, ërei jekuae ñotai peyapo ladrillo tenonde rupi peyapose rami.

19Jayave Israel iñemuña reta güi mbaravɨkɨ re oyangareko vae reta ipɨatɨtɨ, Faraón jei chupe reta yave: “Agüɨye etei toata ara ñavo ladrillo peyapose vae güi.”

20Jare oñoväe reta Moisés jare Aarón ndive, Faraón ndive imiari yogüɨrekoa güi ñogüɨnoe reta güire, echa kuae reta oäro yogüɨreko jokoropi,

21jare jei reta chupe:

—YandeYa tomae peyapogüe re jare tapejäa; echa pe reta oremotareɨuka Faraón pe jare jembiokuai reta pe, kɨsepuku peñono ipo pe rami ko, oreyukauka vaerä.

Moisés iyerure

22Jayave Moisés jei iyerure rupi yandeYa pe:

—CheYa, ¿maera pa ikavimbae rupi rereko kuae tëta? ¿Maera pa chembou?

23Echa, nderee re ayu chemiari Faraón ndive güive mbaetɨ ikavi güɨreko ndembae vae reta; jare nde mbaetɨ etei mbae reyapo reepɨ vaerä.