NÚMEROS 13 - Guarani Bible with DC

Doce temimondo oporopïaro vae reta(Dt 1.19-33)

1YandeYa jei Moisés pe:

2“Emondo kuimbae reta omae vaerä ɨvɨ Canaán re, che amee Israel iñemuña reta pe vae; emondo ñemuña ñavo güi metei kuimbae, tenondeguarä ñogüɨnoi ipɨte pe vae reta.”

3Jare Moisés omondo reta ñuu Parán güi, yandeYa jei chupe rami; jare opaete jókuae kuimbae reta Israel iñemuña reta juvicha ko,

4jae kuae reta: Rubén iñemuña reta güi, Samúa, Zacur taɨ.

5Simeón iñemuña reta güi, Safat, Horí taɨ.

6Judá iñemuña reta güi, Caleb, Jefone taɨ.

7Isacar iñemuña reta güi, Igal, José taɨ.

8Efraín iñemuña reta güi, Oseas, Nun taɨ.

9Benjamín iñemuña reta güi, Palti, Rafú taɨ.

10Zabulón iñemuña reta güi, Gadiel, Sodi taɨ.

11José iñemuña reta güi: Gadi, Manasés iñemuña, Susi taɨ.

12Dan iñemuña reta güi, Amiel, Gemali taɨ.

13Aser iñemuña reta güi, Setur, Micael taɨ.

14Neftalí iñemuña reta güi, Nahbi, Vapsi taɨ.

15Gad iñemuña reta güi, Geuel, Maqui taɨ.

16Jae ko kuae kuimbae reta Moisés omondo omae vaerä ɨvɨ re vae jee reta; jare Moisés ombojee Oseas, Josué pe; jae ko Nun taɨ.

17Moisés omondo omae reta vaerä ɨvɨ Canaán re, jei chupe reta:

—Pekua kuae güi ɨvɨ Neguev rupi jare peyeupi ɨvɨtɨ reta rupi,

18pemae kavi kërai etei ko ɨvɨ vae, jare joko pegua tëta re, imbaepuere yae reta ra, ani ipɨtu yae reta ra, jeta yae reta ra, ani mbovɨño ra vae.

19Kërai ra jókuae ɨvɨ yogüɨreko reta pɨpe vae, ikavi ra ani ikaviä ra; jaeramiño vi kërai etei ra tëta yogüɨreko pɨpe vae, teyupaño ra ani tëta oñekëse kavi yae vae ra;

20jare kërai etei ra ɨvɨ vae, ikavi ra temitɨ peguarä ani mbaetɨ ra, oime ra ɨvɨra pɨpe ani mbaetɨ ra vae; peñemoäta ngatu jare peru mbaagüɨye jókuae ɨvɨ pegua.

Echa uva yagüɨyerɨpɨ iara pe ko kuae.

21Jare jae reta yogüɨraja omae jókuae ɨvɨ re, ñuu Zin güive Rehob kotɨ, Hamat pe yaiketaa pe.

22Omboɨpɨ oike reta Neguev rupi, yogüɨraja oväe Hebrón pe; joko pe yogüɨreko Ahimán, Sesai jare Talmai, Anac iñemuña reta. Tëta Hebrón yepe oyeapo chiu año ndei oiko mbove tëta Zoán Egipto pegua.

23Yogüɨraja oväe ɨ̈aka raɨ Escol pe, joko pe oyasɨa reta metei uva iagüe, jare mókoi kuimbae oyóvai ɨvɨra re jese güeru vaerä; güeru reta vi granada jare ɨva iagüe.

24Jókuae ɨvɨtɨ päu ipe kavi vae ombojee reta Escol, Israel iñemuña reta oyasɨa uva iagüe joko güi güeru vae jeko pegua.

25Cuarenta araa pe oyerova reta ye ɨvɨ re opa yogüɨraja omae vae kotɨ güi.

26Yogüeru reta ye Moisés jare Aarón jare opaete Israel iñemuña reta yatɨ ñogüɨnoia pe, Cades pe, ñuu Parán pe, jare imiari reta chupe jare opaete yatɨ vae reta pe iguata re, jare oechauka chupe reta mbaagüɨye güerugüe.

27Imiari reta Moisés pe körai:

—Rojo roväe jókuae ɨvɨ oremondo romae jesea pe; añetete yepe ɨvɨ ikavi yae; kuae ko jae joko pegua temitɨ iagüe.

28Ërei ngatu jókuae ɨvɨ pegua reta imbaepuere yae vae ko, tëta tuichagüe ko jare oñekëse kavi yae vae reta ko; jare roecha vi joko pe Anac iñemuña reta.

29Amalec iñemuña reta oime ñogüɨnoi Neguev pe, heteo reta, jebuseo reta jare amorreo reta ñogüɨnoi ɨvɨtɨ reta re, jare cananeo reta ñogüɨnoi ɨguasu jare ɨ̈aka Jordán ipäu pe.

30Jayave Caleb omokïrii opaete vae Moisés jóvai ñogüɨnoi vae, jare jei:

—¡Yaja ɨmambae, jare ñapɨ̈ro; echa yandepuere ko ñamoamɨri reta!

31Ërei ngatu jókuae kuimbae reta jae ndive yogüɨraja vae jei:

—¡Ngaraa yandepuere ñaporepeña jókuae ɨvɨ pegua reta re! Echa imbaepuere yae reta ko yandegüi.

32Jare jókuae ɨvɨ re yogüɨraja omae vae reta mbaetɨ imiari kavi Israel iñemuña reta pe, jókuae ɨvɨ oechagüe re, jei reta:

—Jókuae ɨvɨ rojo romae jese vae ipo reta oyomondo yepembae ko; opaete joko pegua reta ipukugüe katuai ko.

33Jare roecha vi joko pe kuimbae ipukugüe,Gn 6.4. Anac iñemuña reta, kuimbae puku vae iñemuña reta; jare ore romae oreyé tuku rami jae reta jóvai, jare jökorai vi jae reta omae oreré.