ISAÍAS 25 - Guarani Bible with DC

Tairari mbaemboete pegua yandeYa kotɨ

1CheYa, nde ko jae cheTumpa;

tambotuicha jare tamboete nderee,

echa reyapo jeta mɨakañɨ,

ndeyemongeta arakae güive voi ma reyapo vae, añete vae ko jare oyembopo vae ko.

2Echa tëta guasu opa reeya jendagüeño,

tëta guasu oñekëse kavi yae vae opɨta jendagüeño;

tovaicho mburuvicha reta jo kavi opa remboai,

jare ngaraa ye ma oñemopüa pɨau ye.

3Jáeramo ko, tëta imbaepuere yae vae reta ndemboete,

jare kuimbae reta jëia vae, oipoɨu ndegüi.

4Echa, nde ko jae paravete vae iñepɨ̈roka,

nde reepɨ oiporara oï vae,

okɨrai yave nde ko ñemía,

araku yae yave nde ko küaraɨa.

Echa kuimbae ipɨapochɨ vae reta iyarasɨ,

okɨrai vae oa ovapetea re vae rami ko.

5Okɨmbaea rupi araku vae rami.

Jökoraita ko remomichi tovaicho reta ipɨayemboete,

jare amapɨtu omoröɨsa araku vae ramita ko remoröɨsa ipïrimbae reta iyarasɨ.

6Ɨvɨtɨ Sión re yandeYa Imbaepuere yae ete vae,

oyapota arete opaete ɨvɨ pegua reta peguarä,

tembíu kavi ndive jare vino ikavigüe ndive,

tembíu jëe ngatugüe ndive jare vino oyeambae ndive.

7Kuae ɨvɨtɨ re yandeYa opata omboai ñeapevaka rami vae,

tëta guasu reta oñeapeva ñogüɨnoi pɨpe vae,

tëtaguasu reta oyeasoi ñogüɨnoi pɨpe vae;

8jae ko mano,

jare omboaita ɨvɨ iárambo güi, tëta imbae vae iñemomarai.

YandeYa ko jei jökorai.

9Jókuae ara jei retata:

“Kuae ko jae ñaneTumpa ñaäro yaiko vae,

jese yarovia jare jae yandemborɨta.

Yayerovia jare yavɨa, echa jae ko yandemborɨta.”

10YandeYa ko oyangarekota ɨvɨtɨ Sión re,

ërei MoabIs 15.1—16.14; Jer 48.1-47; Ez 25.8-11; Am 2.1-3; Sof 2.8-11. re opɨ̈rota,

kapii re oñepɨ̈ro ɨtɨapɨ pe rami.

11Jare Moab oipɨsota iyɨva

oɨtai vae oɨtai vaerä oipɨso rami,

ërei oɨtai ñavo

ojota ɨ rugua kotɨ iyembotuicha,

jare iyererovia katu.

12YandeYa opata oitɨ chugüi ikësea ɨvategüe jare yandambusu vae,

opata oitɨ oeya chugüi ɨvɨ pe.