1Nde kuimbae, eipɨɨ metei adobe eñono nderóvai, jare eyapo jese tëta guasu Jerusalén iä.
2Javoi eroyere jese sundaro reta iä jare tembiporu ñeraro pegua, emopüa tëta ikësea iyɨ́vɨri rupi yeupika, eñono tembiporu tëta ikësea imbosururúa; eñono jóvai teyupa iä, tëta oñeova oï vae rami toï.
3Eipɨɨ metei jiero ipe vae, jare eñono tëta guasu ikësea jekovia pe, nde jare tëta guasu ndive toï peve mbɨte pe, javoi eñeñono tëta guasu re reñemopüa rami. Kuae ko jae oyembojaanga vaerä Israel iñemuña reta pe.
4Jare nde reyapakuata ndeɨke ndeasu re, jare eñono ndeyé Israel pegua reta jeko ikavimbae. Ara ñavo reke ramboeve jókuae ndeɨke re, rerajata jae reta jeko ikavimbae;
5jae ko tresciento noventa ara; metei ara vae jae ko metei año Israel pegua reta jeko re. Jökorai rerajata Israel iñemuña reta jeko ikavimbae;
6opa yave remboapɨ jókuae ara reta, reyapakuata ndeɨke ndeakatu re ma, jare eñono ndeyé Judá pegua reta jeko ikavimbae cuarenta ara rupi. Metei ara vae jae ko metei año jae reta jeko re.
7Javoi reyerovata remae Jerusalén re, tovaicho reta oñova güɨnoi vae kotɨ; nderemimonde iyɨva remboapúa reve ere ikotɨ maratuta oasa vae.
8Mase, che roäpɨtita, mbaetɨta ndepuere reyemboyere ketɨ ave, remboapɨ regua ara reta reiporarata reï vae.
9Eipɨɨ añave voi ndeyeupe mbovɨ trigo, cebada, haba, lenteja, mijo jare avena, jare eñono metei mbaerɨru pe; jare jókuae reta güi eyapo ndeyeupe mbɨyape. Jókuae reuta reiko reyapakua ramboeve ndeɨke ndeasu re, tresciento noventa ara rupi.
10Rekaruta iora pe kavi, ara ñavo reuta kilo mbɨte vae güi mbɨte rupi.
11Jaeramiño vi reuta ɨ iora pe kavi, ara ñavo reuta metei litro güi mbɨte rupi.
12Jare reuta mbɨyape cebada pegua tanimbu pe oyemboyɨ vae, jae reta jovake remboyɨta tata tepoti pegua pe.”
13Jare yandeYa jei: “Jókuae nunga tembíu ikɨa vae ko, Israel iñemuña reta jouta, ïru tëtaguasu reta rupi, che amombo retata vae rupi.”
14Jare che jae chupe: “¡Atataɨ cheYa!, che aikove aiko ramboeve mbaetɨi apoko mbae ikɨa oï Tumpa jóvai vae re; mbaetɨi jau mɨmba omanoiño vae isoo, ani mbaeporou jembia, mbaetɨi jau soo ikɨa oï Tumpa jóvai vae.”
15Javoi jei cheve: “Jayave tamaeño eiporu guakarepoti, tepoti güi, remboyɨ vaerä ndeyeupe mbɨyape.”
16Kuae jaɨkue rupi jei cheve: “Nde kuimbae, amboatata tembíu Jerusalén pe. Ojäañota mbɨyape jou reta, jare ipɨatɨtɨ reve jou retata; ojäañota ɨ jou reta, jare okɨɨye reve jou retata.
17Jare oata chupe reta ɨ jare tembíu yave, omae retata oyoe okɨɨye reve. Omano retata iyoa jeko pegua.”
Who We AreWhat We EelieveWhat We Do
2025 by iamachristian.org,Inc All rights reserved.
