SAN MARCOS 3 - Guarani Bible with DC

Kuimbae ipo jovaicho tɨpa vae(Mt 12.9-14; Lc 6.6-11)

1Jesús oike ye judío reta itupao pe, jare joko pe oï metei kuimbae ipo jovaicho tɨpa vae.

2Jare joko pe fariseo reta ñogüɨnoi vae oïndaivi ñogüɨnoi, oecha vaerä Jesús ombogüerata ra ara mbutuu pe, ipuere vaerä omboeko reta.

3Jayave Jesús jei kuimbae ipo jovaicho tɨpa vae pe:

—Epüa eyemboɨ mbɨte pe.

4Javoi Jesús jei joko pe ñogüɨnoi vae reta pe:

—¿Jaekavi pa ara mbutuu reta pe yayapo vaerä ikavi vae ani ikavimbae vae, yaporoepɨ ani yaporoyuka vaerä?

Ërei jae reta kïriiño opɨta.

5Jayave iyarasɨ reve Jesús omae iyɨpɨ rupi ñogüɨnoi vae reta re, jare ipɨatɨtɨ yae jae reta ipɨatäta ramo, jei kuimbae pe:

—Emopüa ndepo.

Jayave kuimbae omopüa ipo jare okuera voi.

6Jare fariseo reta ñogüɨnoe judío reta itupao güi yave, oyomboemboe herodiano reta ndive Jesús kotɨ oyuka vaerä.

Jeta vae yatɨ ɨguasu jembeɨ pe

7Jayave Jesús jare jemimboe reta yogüɨraja ɨguasu kotɨ,

8jare yogüɨraja jaɨkue jeta yeyé vae Galilea güi, Judea güi, Jerusalén güi, ɨvɨ Idumea güi, Jordán jovaicho kuaraɨ oëa kotɨ güi, jare tëta guasu Tiro jare Sidón iyɨvɨrigua reta, oendu reta yave opaete mbae tuichagüe Jesús oyapo vae regua.

9Jáeramo Jesús oyókuai jemimboe reta omokätɨro avei vaerä barco raɨ chupe, agüɨye vaerä oyopɨ yatɨ vae reta,

10echa jae ombogüera jeta vae; jáeramo opaete imbaerasɨ vae reta oñomoaña moaña yogüeru ikotɨ, oipota ramo kërai yepe opoko jese. oecha Jesús yave, oyetavatɨka jae jóvai jare iñeeäta reve jei:

—¡Nde ko jae Tumpa Taɨ!

12Jare Jesús oñeengata chupe reta agüɨye vaerä omombeu kia ko jae vae.

Jesús jemimboe reta iyeparavo(Mt 10.1-4; Lc 6.12-16)

13Jayave Jesús ojo ɨvɨtɨ re, oenɨi jae oipota oiparavo vae retaño; jare jae reta yogüeru jae oïa pe.

14Jare oiparavo doce kuimbae reta yogüɨreko vaerä jae ndive. Jare omondo vaerä omoërakua reta Tumpa iñee.

15Omee vi chupe reta mbaepuere ombogüera vaerä imbaerasɨ vae reta jare ombosɨrɨ vaerä aña reta oya jese vae reta güi.

16Kuae ko jae oiparavo vae reta jee: Simón, oero Pedro pe vae,

17jare Zebedeo taɨ reta Jacobo jare Juan, kuae mókoi reta oero Boanerges. (Kuae tee oipota jei: “Ara rɨapu”)

18Jare Andrés, Felipe, Bartolomé, Mateo, Tomás, Jacobo Alfeo taɨ, Tadeo, Simón cananita,

19jare Judas Iscariote, jae ko omee Jesús jovaicho reta ipo pe vae.

Jei reta ikavimbae yae vae Espíritu Santo kotɨ(Mt 12.22-32; Lc 11.14-23; 12.10)

Jayave Jesús ou ye metei o pe jae reta ndive.

20Jare oyemboatɨ ye jeta vae jese ramo, Jesús jare jemimboe reta mbaetɨ ipuere okaru.

21Jesús jëtara reta kuae oikuaa yave, yogüeru güɨraja vaerä tëi, echa jei reta:

—¡Imbokere ma!

22Jare mborookuai re oporomboe vae yogüeru Jerusalén güi vae reta jei: “Aña guasu Beelzebú jee vae oya ma jese, jae aña guasu imbaepuere rupi ko ombosɨrɨ aña reta oya jese vae reta güi.”

23Jayave Jesús oenɨi reta, jare jei chupe reta ombojaanga reve: “Ngaraa Satanás jaeiño oyembosɨrɨ kuimbae güi.

24Metei mborookuaía pegua reta oyovaicho oyoupii yave, oyemboaita ko.

25Jaeramiño vi metei o pegua reta oyovaicho oyoupii yave, opata ko oyemboai.

26Jökoraita vi Satanás oñemopüa iyé aeño jare oyemboyao yave, ngaraa ma oiko, okañɨta ma ko.”

27Ngaraa kia ipuere oike kuimbae ipɨ̈rata vae jo pe opɨ̈ro vaerä imbaembae chugüi, oipokuata räri ko kuimbae ipɨ̈rata vae. Jayave ramo ipuereta opɨ̈ro imbaembae chugüi.

28Añete che jae peve, Tumpa iñɨ̈rota opaete ɨvɨ pegua reta iyoa re jare opaete jei ikavimbae yae Tumpa kotɨ vae re.

29Ërei Tumpa ngaraa etei iñɨ̈ro jei ikavimbae yae Espíritu Santo kotɨ vae pe.Lc 12.10. Oyemboekota jekuae avei pegua.

30Echa tenonde yave jae reta jei:

—Aña oya ma jese.

Jesús ichɨ jare tɨvɨ reta(Mt 12.46-50; Lc 8.19-21)

31Jayave Jesús ichɨ jare tɨvɨ reta yogüeru oväe Jesús oïa pe, opɨta reta ikatu pe jare joko güi omondo oenɨiuka.

32Jare oguapɨ ñogüɨnoi iyɨpɨ rupi vae reta jei chupe:

—¡Ndesɨ jare nderɨvɨ reta oka pe ñogüɨnoi! Jare ndereeka reta.

33Jare Jesús jei chupe reta:

—¿Kia pa ko jae chesɨ jare cherɨvɨ reta?

34Jayave omae iyɨpɨ rupi oguapɨ ñogüɨnoi vae reta re, jei:

—Kuae reta ko jae chesɨ jare cherɨvɨ reta.

35Opaete Tumpa jemimbota oyapo vae reta ko jae cherɨvɨ, chereindɨ jare chesɨ.