1Josafat güɨnoi jeta mbaeyekou jare imboetea yae; oñemoëtara Acab ndive.
2Oasa ma mbovɨ año yave ou Samaria pe opou vaerä Acab pɨri, jare Acab oyuka chupe reta jeta vecha jare toro omboarete vaerä Josafat jare jupiegua reta, jare omoñera jae ndive oporepeña vaerä tëta Ramot, Galaad pegua re.
3Jare Acab mburuvicha guasu Israel pegua jei Josafat mburuvicha guasu Judá pegua pe:
—¿Nekɨ̈reɨ pa yaja che ndive ñaporepeña vaerä tëta Ramot, Galaad pegua re?
Josafat jei chupe:
—Che jare chesundaro reta ndive roï nde ndive jare ndesundaro reta ndive rojo vaerä roñeraro.
4Jare jei ye vi Josafat mburuvicha guasu Israel pegua pe:
—Ërei tenonde eparandu räri yandeYa pe.
5Jayave mburuvicha guasu Israel pegua omboatɨ cuatrociento ñeemombeúa reta, jare oparandu chupe reta:
—¿Ikavi pa roporepeña tëta Ramot, Galaad pegua re ani mbaetɨ pa?
Jae reta jei chupe:
—Peporepeña jese echa Tumpa omeeta pepo pe.
6Ërei Josafat oparandu ye chupe:
—¿Mbaetɨ pa kuae pe yandeYa iñeemombeúa, jae rupi yaparandu vaerä?
7Mburuvicha guasu Israel pegua jei chupe:
—Oime metei, jupi yandepuere yaparandu yandeYa pe. Jae ko Micaías, Imla taɨ. Ërei amotareɨ ko, echa mbaetɨi omombeu mbae ikavi vae cheve jaeño ikavimbae vae.
Jare Josafat jei chupe:
—Agüɨye jökorai ere mburuvicha guasu.
8Jayave mburuvicha guasu Israel pegua oenɨi metei sundaro ruvicha jare jei chupe:
—¡Ekua embou jarembae Micaías, Imla taɨ!
9Jare mburuvicha guasu Israel pegua jare Josafat mburuvicha guasu Judá pegua metei ñavo oguapɨ ñogüɨnoi iguapɨa pe, oyemonde reve temimonde kavi mburuvicha pegua pe, oka pe Samaria pe yaikea pe, jare opaete ñeemombeúa reta omoërakua ñogüɨnoi jae reta jóvai.
10Sedequías, Quenaana taɨ yepe oyapo iyeupe guakaräti reta iä jiero pegua, jare osapúkai: ¡Körai jei yandeYa: “Kuae reta pe peporepeña Siriaɨgua reta re opaetei pemokañɨtei regua”!
11Jökorai vi opaete ñeemombeúa reta omombeu, jei reta: “Peporepeña tëta Ramot, Galaad pegua re, pemoamɨrita ko, echa yandeYa omeeta pepo pe.”
12Jare jókuae ojo Micaías ombou vae, jei chupe:
—Mase, opareve ñeemombeúa reta omombeu ikavi vae mburuvicha guasu pe. Romoñera rere vaerä jae reta rami ikavi vae.
13Micaías jei chupe:
—¡YandeYa jee re, jaeño cheYa jei cheve vae amombeuta!
Jare ou mburuvicha guasu jóvai.
14Jare mburuvicha guasu oparandu chupe:
—Micaías, ¿ikavi pa roporepeña tëta Ramot, Galaad pegua re ani mbaetɨ pa?
Jare Micaías jei:
—Peporepeña jese, pemoamɨrita ko, echa Tumpa omeeta pepo pe.
15Ërei mburuvicha guasu jei ye chupe:
—¿Mbovɨ ye pa jaeta ndeve yandeYa jee re remombeu vaerä cheve añete vaeño?
16Jayave Micaías jei:
“Aecha Israel iñemuña reta
opaetei oñemoai ɨvɨtɨ rupi,
vecha reta iyangarekoambae rami.
Jare yandeYa jei:
‘Kuae reta mbaetɨ iya,
metei ñavo toyerova jo kotɨ ipɨakatu reve.’ ”
17Jayave mburuvicha guasu Israel pegua jei Josafat pe:
—¿Jaeä pa ndeve kuae kuimbae mbaetɨi omombeu mbae ikavi vae cheve, jaeño omombeu ikavimbae vae?
18Micaías jei ye:
—Peyeapɨsaka yandeYa iñee re: Aecha oguapɨ oï iguapɨka re, jare opaete araɨgua ñogüɨnoi jae ndive iyakatu kotɨ jare iyasu kotɨ.
19Jare yandeYa oparandu: “¿Kia pa ojota Acab mburuvicha guasu Israel pegua omokɨ̈reɨ, oporepeña vaerä tëta Ramot, Galaad pegua re jare omano joko pe?” Metei jei körai toiko, jare ïru jei ambuaeyee.
20Jayave metei espíritu ou oyemboɨ yandeYa jóvai jare jei: “Che taja tamokɨ̈reɨ.” Jare yandeYa oparandu chupe, këraita ra oyapo vae.
21Jare jae jei chupe: “Ajata amee ñee apu pegua opaete ñeemombeúa mburuvicha guasu pe oyeokuai vae reta pe.” Jare yandeYa jei: “Ekua eyapo jökorai jare embotavɨuka.”
22Añave reikuaa ma yandeYa oñono espíritu apu pegua ndembae ñeemombeúa reta iyuru pe, nemokañɨteiuka vaerä.
23Jayave Sedequías, Quenaana taɨ oya katu Micaías re jare oovapete jare jei:
—¿Kerupi pa oasa chegüi yandeYa iEspíritu imiari vaerä ndeve?
24Jare Micaías jei chupe:
—Reikuaata ko kuri jókuae ara reike ike o ñavo rupi reñemi yave.
25Jayave mburuvicha guasu Israel pegua jei:
—¡Peipɨɨ Micaías, jare peraja mburuvicha Amón tëta guasu pegua jóvai jare cheraɨ Joás jóvai!
26Jare pere chupe reta, toñoña tembipɨɨrɨru pe, jare michi tembíu toñemee chupe jare ɨ, ayerova ye regua chepɨakatu reve.
27Jare Micaías jei:
“Nde reyerova ye ko ndepɨakatu reve yave,
yandeYa mbaetɨ ko jayave imiari cherupi.”
Jei ye vi: “Peendu opaete vae.”
28Jökorai mburuvicha guasu Israel pegua jare Josafat mburuvicha guasu Judá pegua oporepeña tëta Ramot, Galaad pegua re.
29Jare mburuvicha guasu Israel pegua jei Josafat pe:
—Che ayemondeta ambuaeyee aike vaerä ñeraroa pe, jare nde emonde nderemimonde aeño mburuvicha pegua.
Jökorai mburuvicha guasu Israel pegua oyemonde ambuaeyee jare oike ñeraroa pe.
30Ërei mburuvicha guasu Siria pegua oyókuai yepe isundaro ruvicha reta ikäretou ñeraro pegua, agüɨye vaerä oñeraro reta oipotagüe ndive, jaeño mburuvicha guasu Israel pegua ndive.
31Jayave kuae reta oecha yave Josafat, oyemongeta reta jae ko mburuvicha guasu Israel pegua javoi oñova reta oñeraro vaerä jae ndive. Jayave Josafat osapúkai yandeYa pe, jare jae omborɨ. Tumpa ombosɨrɨ chugüi jovaicho reta;
32jare jae reta oecha yave jaeä ko Israel pegua reta juvicha guasu, omaeño jese.
33Ërei metei sundaro omondoiño uvɨ ɨvate rupi, jare jókuae uvɨ oñɨvo mburuvicha guasu jemimonde ñeraro pegua iyoapɨa rupi. Jayave jei ikäretou imboguataa pe:
—Eroyerova käretou, cherenoe kuae ñeraroa güi, tuicha yae chepere.
34Jókuae ara jeiete yae oñeraro reta, jáeramo mburuvicha guasu Israel pegua ikaaru oyemboɨ ikäretou ñeraro pegua pe Siriaɨgua reta jóvai ñeraroa pe; jare omano kuaraɨ oike ma yave.
Who We AreWhat We EelieveWhat We Do
2025 by iamachristian.org,Inc All rights reserved.
