PROVERBIOS 9 - Guarani Bible with DC

Arakuaa katu jare arakuaambae

1Arakuaa katu oyapo jorä, omopöra chiu okɨta pe;

2oyuka mɨmba arete peguarä,

omboyea vino, ikavi yae vaerä,

oñono kavi imesa,

3jare omondo jembiokuai kuña reta osapúkai vaerä,

tëta guasu pe ɨvate yaea güi,

4jei reta: “¡Peyu kuae kotɨ, yarakuaambae reta!”

Omondo jei mbaetɨ oyemongeta kavi vae reta pe:

5“Peyu pekaru,

jare peu vino amboyea kavigüe.

6Peeya mo ïkotɨa pearakuaambae, jare peikoveta;

peiko mo arakuaa katu rupi.”

7Oporoyóyai yóyai vae omboarakuaa vae, oñemomaraiukata ko;

iyoa vae pe omboeta vae, oyapo ko iyeupe tovaicho.

8Agüɨye emboeta oporoyóyai yóyai vae pe, agüɨye vaerä nemotareɨ;

emboarakuaa iyarakuaa katu vae, jare jae nderaɨuta.

9Emee arakuaa iyarakuaa vae pe, jare iyarakuaa yae eteta;

emboe jupi vae, jare oñemoïruta chupe iyarakuaa.

10Arakuaa katu jae ko yandeYa güi yaipoɨ u vae;

Iyoambae yaikuaa vae, jae ko arakuaa katu.

11Echa che arakuaa katu re ko reiko pukuta,

jare oñemoïruta ndeve ɨma año reiko vaerä.

12Ndearakuaa katu ko yave, ndeyeupegua ko;

ërei ndeporoyóyai yoyaise ko yave, nde aeño ko reiporarata.

13Kuña iyarakuaambae tekorai iyapoa ko,

mbaetɨ etei ko yarakuaa.

14Jöke pe oguapɨ metei siya pe,

tëta guasu pe ɨvatea pe,

15oyepoeru vaerä oguata vae reta pe,

tape rupi sɨmbi oasa vae reta pe,

16jei yarakuaambae pe: “¡Eyu kuae pe!”

Jei mbaetɨ oyemongeta kavi vae reta pe:

17“Ɨ oñeomigüe ko jëe ngatu yae;

tembíu yau vɨari vae ko jee ngatu yae.”

18Ërei jae reta mbaetɨ oikuaa,

ñogüɨnoi ma ko omanogüe reta ñogüɨnoia pe,

jókuae oyeparea chupe vae reta.