ISAÍAS 66 - Guarani Bible with DC

YandeYa iporojäa jare Sión ikavi yaeta vae

1YandeYa jei körai:

“Ara ko jae cheguapɨa jenda,

jare ɨvɨ ko jae chepɨ jenda;

jayave, ¿ketɨ pa pepuereta peyapo cherorä?,

jare ¿ketɨ pa peñonota cheputuúa rendarä?

2¡Che ko ayapo opaete kuae mbaembae,

jáeramo ko oime opaete kuaekuae reta!

Che, peYa ko jae.

Che ayangarekota jókuae kuimbae oyemombaravete jare oñemomichi ipɨa pe vae re,

cheñee omboete vae re.

3Toro oyuka omee cheve vae,

kuimbae oyuka ramiño ko;

vecha oyuka omee cheve vae,

yaɨmba oñaseokɨ̈ti vae ramiño ko;

mbota temitɨ jäɨgüe omee cheve vae,

kuchi jugüɨgüe omee vae ramiño ko;

mbota mbae ikäti kavi vae incienso omee cheve vae,

tumpa-raanga reta omboete vae ramiño ko.

Echa kuae mbaembae iyapoa reta, jae reta aeño,

oiparavo yogüɨreko vaerä ikavimbae rupi,

ipɨa oaɨu yae kuae mbaembae ikavimbae vae.

4Jayave, che aiparavota vi tembiporara chupe reta,

aruta chupe reta, jae reta okɨɨye yae chugüi vae.

Echa aporoenɨi tëi yave mbaetɨ kia omboyevɨ cheve,

cheñee amoë tëi yave, mbaetɨ kia oendu cheve;

ikavimbae oyapo reta cheróvai,

oiparavo reta iyeupe, mbaetɨ etei ipöra cheve vae.”

5Pe, pemboete yandeYa iñee vae,

peendu iñee:

“Amogüe, kuae perëta pegua reta pemotareɨ vae,

jare opa pemombo iyeugüi reta

perovia cheré vae jeko pegua, jare jei reta:

‘Toyekuaa, yandeYa imbaemboetea,

omee vaerä peve yerovia.’

Ërei, jae reta oñemomaraiukata opɨta.

6Tëta guasu pe jeta jäsembaiecha vae,

tupao pe ñee oyeendu,

jae ko yandeYa iñee

oiporarauka vaerä jovaicho reta pe, jeko re.

7Ndei imembɨ iara oa vaerä tëi mbove, oa ma,

ndei imembɨrasɨ mbove, oa imembɨ kunumi.

8¿Kia pa oendu jókuae nunga?

¿Kia pa oecha jókuae nunga?

¿Oyeapota ra metei ara pe tëtaguasu?

¿Oyeapota ra metei ara pe tëta?

Ërei Sión, omboɨpɨ imembɨrasɨ yave,

oa voi imembɨ reta.

9¿Maera pa mbaetɨta amaeño oa?

Echa, che peYa ko amee oa vaerä michia.”

Jei yandeYa.

10“Opaete pe reta peaɨu Jerusalén vae,

peyerovia jae ndive;

opaete pe reta pepɨatɨtɨ jese vae,

pevɨakatu jae ndive;

11peu jare peyemoangapɨɨ iporombopɨakatu re.

Peu jare peyekou iyemboetea jembipe re.”

12Echa che peYa, körai ko jae:

“Ko aru jese mbɨakatu,

ɨ̈aka pe ɨ ou oväe rami,

jare tëtaguasu reta imbaeyekou reta,

ɨ̈aka pe ɨ jembeɨ oyepɨyere rami.

Jae reta pemongaruta jare pereruta iyɨva re,

jare täpapau pe pemboyaru yaru retata.

13Kia omboresive mbɨakatu ichɨ güi rami,

che pombopɨakatuta,

Jerusalén pe pepɨakatuta.”

14Peechata jare oyeroviata pepɨa,

jare perete, ñana jokɨ pɨau vae ramita.

YandeYa oechaukata imbaepuere, jembiokuai reta pe,

ërei oechaukata iyarasɨ, jovaicho reta pe.

15Echa, ko yandeYa outa tata re,

jare ikäretou reta kusumirou rami,

oitɨ vaerä iyarasɨ jare iporonupa,

tata jendɨ rami.

16YandeYa ojäata opaete kuimbae reta tata rupi,

jare kɨsepuku rupi;

jeta yaeta omano vae.

17YandeYa jei:

“Ko raɨ rupi, oyoaɨkue yoaɨkue

oñeñono tee jare oyetɨo,

omboete vaerä itumpa-raanga reta vae;

kuchi jare anguya isoo jou vae reta,

jare ïru soo oyeumbae vae jou vae reta,

opata amokañɨtei ete voi.” Jei yandeYa.

18“Echa che aikuaa nderembiapo reta,

jare ndeyemongeta reta.

Oväeta ara, amboatɨ vaerä

opaete tëtaguasu jare ñee ambuae mbuae pe imiari vae reta,

yogüeruta jare oecha retata cheyemboetea.

19Jare amokañɨmaata chupe reta:

Chugüi reta ojoyepegüe,

amondota tëtaguasu reta kotɨ,

jae ko: Tarsis, Fut jare Lud pe;

kuae tëtaguasu Lud pegua reta oikatu oiporu uvɨ,

Tubal jare Javán kotɨ,

jare matɨ rupi tëtaguasu reta

ñogüɨnoi ɨguasu jembeɨ rupi vae,

jókuae mbaetɨ oendu reta cheregua vae,

jare mbaetɨ vi oecha reta cheyemboetea;

jae reta omoërakuata cheyemboetea tëtaguasu reta pe.

20Jare güeru retata opaete perëtara reta,

tëtaguasu ñavo pe oime vae,

güeru retata kavayu re,

käretou pe, voɨka pe,

mburika guasu re

jare camello re.

Güeru retata mbotarä cheve

tëta Jerusalén pe,

ɨvɨtɨ oñeñono tee vae re.

Israel iñemuña reta güeru chero pe

mbota mbae ikɨambae vae pe rami.”

Che, peYa ko jae kuae.

21“Jare chugüi reta aiparavota vi

sacerdote retarä jare levita retarä,

omborɨ reta vaerä sacerdote reta.”

22YandeYa jei vi:

“Echa ara ipɨau vae,

jare ɨvɨ ipɨau vae

23Yasɨ pɨau iarete ñavo pe,

jare ara mbutuu iara ñavo

yogüeruta opaete vae chemboete.

Che peYa ko jae kuae.

24Yogüeruta oecha reta,

kuimbae reta oyembopɨapochɨ chekotɨ vae reta jëogüegüe.

Echa taso reta jou jetegüe vae mbaetɨta omano,

jare mbaetɨta vi ogüe tata, ókai reta ñogüɨnoi pɨpe vae.

¡Yavaete yaeta oyekuaa reta opaete vae pe!”