PROVERBIOS 13 - Guarani Bible with DC

1Yarakuaa vae, oyeapɨsaka tu iporomboarakuaa re;

ërei oporoyóyai yóyai vae, ñäteɨ oyeapɨsaka yemboeta re.

2Kia ñavo iñee kavi vae, oarɨ vota ikavi vae,

ërei mborookuai oyapombae reta yogüɨrekota ikavimbae rupi.

3Iñee mbaetɨ omoë vae, ikavi vae ko oyapo iyeupe;

ërei iñee omoë voi vae, iyeupeguarä aeño ko oyapo ikavimbae.

4Iyakɨ vae oipota tëi mbae, ërei ngaraa oväe;

ërei jäta ngatu vae, güɨnoita opaño mbaembae.

5Jupi vae, güɨröɨro apu reta;

ërei iyoa vae oiko ñemotareɨ rupi jare oiko imboeteambae.

6Mbaejupi oñovatu, kuimbae jupi rupi kavi oiko vae;

ërei ikavimbae omokañɨtei, kuimbae iyoa vae.

7Amogüe paravete vae oikokatugüe nunga oiko;

amogüe oikokatu vae paravete vaeecha oiko.

8Oikokatu vae, oyereroasayepe imbaeyekou reta rupi;

ërei paravete vae, mbaetɨ güɨnoi mbae pe ave oyereroasayepe vaerä,

9Jupi vae reta, mechero omoembipe kavi vae rami ko;

ërei iyoa vae reta, mechero ogüe vae rami ko.

10Pɨayemboete, güeru ñeraro;

ërei yemboarakuaa oendu vae, yarakuaa katu.

11Mborombotavɨ rupi oyemboikokatu jarembae vae güi, jarembae opa yeta;

ërei iparavɨkɨ rupi omboatɨ mbegüe mbegüe vae pe, oñemoïruta.

12Mbae oñeäro vae oväe raivimbae vae, oporombopɨatɨtɨ yae,

ërei oyembopo vae, oporomboyerovia.

13Mborookuai güɨröɨro vae, oiporarata ko;

mborookuai jeigüe oyapo vae, oyekouta ko.

14Yarakuaa katu vae iporomboe, tekove katu ko,

jare oporogüɨ roasayepe mano güi.

15Iyemongeta ikavi vae, oporombopɨakatu,

ërei oyembopɨapochɨ vae reta, oepeña kañɨtei.

16Opaete kuimbae oyeandu katu vae, oyapo mbae yarakuaa katu rupi kavi,

ërei yarakuaambae reta jaeño oyeechauka.

17Ñee jerajaa imiari kavimbae, oporombosusere,

ërei ñee jerajaa jupi vae oporombopɨakatu.

18Paraveteta jare oñemomaraita yemboarakuaa güɨröɨro vae;

ërei yemboeta oendu vae imboeteata.

19Temimbota kavi oyembopo vae, oporomboyerovia ko,

ërei yarakuaambae reta pe, ikaviä etei oeya vaerä ikavimbae.

20Yarakuaa vae reta ndive oñemoïru vae, yarakuaata;

ërei yarakuaambae reta ndive oñemoïru vae, oiporarata.

21Iyoa vae reta, yogüɨrekota ikavimbae rupi;

ërei jupi vae reta, yogüɨreko kavita.

22Ipɨakavi vae, oeyata jɨmɨmino reta pe mbaeyekou,

ërei iyoa vae reta imbaeyekou, opɨtata jupi vae reta imbaerä.

23Iparavete vae reta iko pe oime jeta tembíu,

ërei okañɨ, jupigüe mbaetɨ jeko pegua.

24Taɨ oinupambae jeko re vae, omotareɨ ko;

ërei taɨ oaɨu vae, ndei güive voi ma ombosɨmbi.

25Jupi vae okaru jɨ̈vɨata regua,

ërei iyoa vae oiporarata yɨmbɨaɨ.