PROVERBIOS 23 - Guarani Bible with DC

- 6 -

1Reguapɨ rekaruta reï yave metei kuimbae tuichagüe ndive,

emae kavi kia nunga jóvai ko reguapɨ reï vae.

2Yepe tëi ndeyɨmbɨaɨ yae reï,

agüɨye eñemoamɨriuka yɨmbɨaɨ pe;

3agüɨye eyúe rai voi emae jembíu kavi re,

echa ndembotavɨta ko.

- 7 -

4Agüɨye eyemoambeko reyemboikokatu vaerä; ndearakuaa ndeyeupe, agüɨye eipota.

5¿Reipotata pa remae mbaeyekou re, mbaeä etei vae re?

Echa ipepo ramita ko, ɨmambae opata oveve, güɨraké oveve rami.

- 8 -

6Agüɨye ekaru jäkateɨ vae ndive,

agüɨye eyúe emae jembíu kavi re ave,

7echa iyuru peño ko: “Ekaru jare jeu vino”, jei ndeve,

ërei mbaetɨ ko ipɨa katu nderé;

8nemogüëeta ko jókuae reugüe,

ngaraa osirive ndeve jókuae ñee reta ikavigüe rere vae.

- 9 -

9Agüɨye emboarakuaa yarakuaambae,

echa güɨröɨrota ko ndeyemongeta kavi reta.

- 10 -

10Agüɨye erosɨrɨ ndeɨvɨ jembeɨ oyembojaangaño mai oï vae;

agüɨye eroike ndeɨvɨ jembeɨ tɨ̈reɨ reta iɨvɨ pe ave,

11echa jae reta jepɨa, jae ko Ipɨ̈rata yae vae,

jae ko oëta jae reta ipoepɨka pe ndekotɨ.

- 11 -

12Eñono ndepɨa mboromboe kotɨ,

jare ndeapɨsa reta ñee arakuaa pegua kotɨ.

- 12 -

13Agüɨye eipoɨu embosɨmbi kunumi;

echa reinupa yave ɨvɨra raɨ pe, ngaraa omano;

14einupa ɨvɨra pe, jare reroasayepeta mano güi.

- 13 -

15Cheraɨ, ndepɨa arakuaa katu ko yave,

chepɨa remboyerovia yaeta vi ko;

16ayerovia yaeta ko, aendu yave nemiari jupi rupi kavi.

- 14 -

17Agüɨye ndepɨa pe emotareɨ iyoa vae reta;

eipoɨu avei yandeYa güiño;

18jökorai yave reiko kavita

mbaembae reä ro vae ngaraai oyemboai ndegüi.- 15 -

19Cheraɨ, eyeapɨsaka kavi, jayave ndearakuaata;

eñemoäta ngatu reiko kavi vaerä.

20Agüɨye neïru pota okau vae reta ndive,

ani okaru kavi vae reta ndive ave,

21echa kau regua reta jare okaru kavi vae reta iparavete yaeta ko,

jare iyakɨ vae reta oyemonde temimonde ipächagüe pe.

- 16 -

22Eyeapɨsaka nderu iñee re, jókuae chugüi reñemuña vae re;

agüɨye eröɨro ndesɨ itɨ̈aro ma yave.

23Eväe añetete vae, arakuaa,

mboromboe jare arakuaa katu, jare ¡agüɨye emee!

24Jupi vae, omboyerovia yae tu,

yarakuaa vae, ombovɨakatu yae ko tu.

25¡Emboyerovia nderu jare ndesɨ!

¡Embovɨakatu ndesɨ!

- 17 -

26Cheraɨ, eyeapɨsaka ndepɨa reve cheré,

jare emae kavi kërai ko che aiko vae re;

27echa kuña iyaguasa pota vae, ɨvɨkua kɨ̈pe yae jare ipɨmii yae vae rami ko;

28oporopïaro ko imonda vae rami,

jare jeta kuimbae reta omokañɨteiuka.

- 18 -

29¿Kia peguarä pa täse?

¿Kia peguarä pa mbaejasɨ?

¿Kia peguarä pa ñoraro reta?

¿Kia peguarä pa yaeo reta?

¿Kia peguarä pa yembopereiño vae? ¿Kia peguarä pa tesakuaovɨ reta?

30Okau reteiño vae reta peguarä ko;

jókuae jekuaeñoi oeka reta vino

oyemboyeagüe jou reta vaerä vae.

31Agüɨye emae vino re,

pɨ̈ta kavi kopa pe oyekuaa oï yave;

jare jëe ngatu oñemókoi yave vae.

32Ërei jaɨkue rupi mboi oporosuu vae rami ko;

moitini iporosuu ramita ko jasɨ.

33Reechata opaño mbaembae,

jare rereta opaño mbae ndepɨa pe renoi vae;

34ɨguasu mbɨte pe oyapakua oï vae ramita ko reiko,

ani metei ɨvɨra puku vae iyapɨte re oyapakua oï vae rami,

35jare rereta:

“Chembopere reta, ërei mbaetɨ jasɨ cheve;

chenupa reta, ërei mbaetɨ ayandu;

akuera ye yave, aeka ye ñotai ko.”