Daniel (dc) 11 - Guarani Bible with DC

1Che amoäta ngatu jare amborɨ vi Miguel, Darío Mediaɨgua tenondegua año oiko mburuvicha guasurä yave.

Ɨvɨtuguasu jare arayevɨ kotɨgua mburuvicha guasu reta

2Añave aikuaaukata ndeve añetete vae:

Oimeñota räri mboapɨ mburuvicha guasu reta Persia pe, ërei irundɨa mburuvicha guasu oikokatu yaeta jókuae mboapɨ tenondegua reta güi. Jókuae jeta imbaeyekou vae rupi imbaepuere yae ma yave, omopüata opaete vae, tëtaguasu Grecia pegua mborookuaía kotɨ.

3Ërei jaɨkue rupi opüata metei mburuvicha guasu jëia yae vae, jae güɨnoita mbaepuere opaete vae re jare oyapota jae jeigüe.

4Ërei oï kavi yae ma yave, iporookuaía oyemboaita jare oyemboyaota irundɨ yemboyao pe. Ërei kuae mborookuaía reta mbaetɨta oasa iñemuña reta pe, mbaetɨta vi jökorai imbaepuere yae tenonde yave rami, echa oyemboyaota opɨta jare jekovia pe ïru vae reta ñogüɨnoita mburuvicharä.

5Jare mburuvicha guasu arayevɨ kotɨ oï vae imbaepuere yaeta, ërei metei isundaro ruvicha tenondegua ete imbaepuere yaeta chugüi jare imbaepuere tuicha yaeta.

6Ërei oväeta año oñomoïru reta vaerä: Mburuvicha guasu arayevɨ kotɨgua omeeta tayɨ mburuvicha guasu ɨvɨtuguasu kotɨgua pe jembirekorä, jökorai oyapo reta vaerä oyoupe mbɨakatu. Ërei jókuae mbɨakatu ngaraa oyeapo chupe, echa jae jare imembɨ reta, ime jare imoïrúa reta opata oyeyukauka.

7Ërei ngatu metei iñemuña pegua oguapɨta jekovia pe, jae oporepeñata mburuvicha guasu ɨvɨtuguasu kotɨgua re, opɨ̈rota mburuvicha guasu jo kavi jare jupiegua reta oyemombaeta jae jeigüe re.

8Opɨ̈rota güɨraja Egipto kotɨ itumpa-raanga reta, mbae iä reta jiero oyemondɨkui oyeapo vae pegua jare jembiporu reta ipöra yae vae korepoti pegua jare oro pegua. Ërei mbovɨ año rupi jae oyembosɨrɨta oiko mburuvicha guasu ɨvɨtuguasu kotɨgua güi,

9mburuvicha guasu ɨvɨtuguasu kotɨgua oporepeñata mburuvicha guasu arayevɨ kotɨgua re, ërei jekuae oyerova yeta iɨvɨ ae kotɨ.

10Ërei mburuvicha guasu ɨvɨtuguasu kotɨgua taɨ reta iyarasɨ yaeta jare omboatɨ retata jetagüe sundaro reta. Metei vae chugüi reta oporepeñata isundaro reta ndive mburuvicha guasu arayevɨ kotɨgua re, opaeteita omboai, ɨporu oporomboai rami; jaɨkue rupi jekuae oporepeña reta yeta oväe reta regua mburuvicha guasu arayevɨ kotɨgua iñepɨ̈roka pe.

11Kuae jeko pegua mburuvicha guasu arayevɨ kotɨgua iyarasɨ yaeta jare oëta oñeraro mburuvicha guasu ɨvɨtuguasu kotɨgua ndive, jókuae jetagüe isundaro ndive oporepeña vae ndive, jare opaeteita omoamɨri.

12Jare oporomoamɨri jare jeta yae oporoyuka jeko pegua oyembotuichata, ërei imbaepuere ngaraa ɨma oiko.

13Ërei mburuvicha guasu ɨvɨtuguasu kotɨgua omboatɨ yeta jeta yeyé sundaro tenonde yave vae güi, jókuae güi mbovɨ año rupi oporepeña yeta arayevɨ kotɨgua mburuvicha guasu re, jetagüe isundaro reta ndive jare jetagüe tembiporu ñeraro pegua ndive.

14Jókuae ara rupi jeta yaeta vae oyovaicho arayevɨ kotɨgua mburuvicha guasu re. Jókuae reta ipɨte pe oñemopüata vi kuimbae ipɨarai vae reta Israel pegua, jókuae oyekuaa vae oyembopo vaerä, ërei ñamɨri retata.

15Mburuvicha guasu ɨvɨtuguasu kotɨgua outa jare omopüata iyeupikarä tëta guasu ikësea ikupe rupi jare opɨ̈rota. Arayevɨ kotɨgua mburuvicha guasu isundaro reta ngaraa ipuere jare sundaro jëia yae vae reta ave ngaraa ipuere jovaicho reta re.

16Jókuae oporepeña jese vae oyapota jae jeigüe, mbaetɨ eteita kia ipuere jese, opɨtata jókuae ɨvɨ ikavi yae vae pe, jare opata omboai.

17Jaeramiño vi oyeapo kavita opɨ̈ro vaerä opaete ɨvɨ arayevɨ kotɨgua; jokuaerä oyapota morogüɨrökuavee päve joko pegua mburuvicha guasu ndive jare omeeta tayɨ jókuae mburuvicha guasu jembirekorä, omboai vaerä chugüi iporookuaía; ërei ngaraa oë kavi chupe iyemongeta.

18Jaɨkue rupi oporepeñata tëta guasu reta ɨguasu jembeɨ rupigua re, jare jeta opɨ̈rota; ërei metei sundaro ruvicha omboapɨta chugüi imbaeyuvanga, omomarai yaeta oeya.

19Joko güi jókuae mburuvicha guasu oyerova yeta iɨvɨ pegua ñepɨ̈roka reta pe; ërei iñamɨrita jare omanota, jökorai ngaraa ye ma jërakua jesegua.

20Jekovia pe oguapɨta ïru mburuvicha guasu; jae oñonota okovara vae oyemboikokatu yae vaerä; ërei mbovɨ añoa peño oyuka retata, mbaetɨta arasɨ rupi ani ñeraro pe.

21Jae jaɨkue rupi oguapɨta mburuvicha guasurä metei kuimbae jeko kavimbae yae vae, oiko potaä tëi mburuvicha guasurä vae; jae mbaetɨta oechauka ikavimbae oyapota vae, ërei oguapɨta mburuvicha guasurä yembotavɨ rupi.

22Opaeteita oyuka ikotɨ oyovaicho vae reta, ɨporu jeta oporoyuka rami; opaeteita omokañɨtei mburuvicha morogüɨrökuavee päve iyapoa ave.

23Ombotavɨta vi jae ndive morogüɨrökuavee päve oyapo tëi vae reta, jökorai mbovɨ yae sundaro güɨnoi reve oporomoamɨrita.

24Jókuae ɨvɨ pegua reta yogüɨreko pɨagüive yae jare yogüɨreko kavi yave, oike retata jare oyapo reta iñemuñagüe reta mbaetɨi oyapo vae: Omboyaota isundaro reta pe mbaembae, mbae jepɨ vae opɨ̈rogüe. Oyemongeta oporepeña vaerä tëta guasu reta oñekëse kavi yae vae re, yepe tëi mbovɨ año peguaño.

25Oyererovia katu yae jeko pegua oporepeñata jeta isundaro ndive mburuvicha guasu arayevɨ kotɨgua re. Ërei jae oyeapo kavita chupe jare oëta jeta sundaro reta ndive oñeraro jae ndive; ërei ngaraa ipuere jese, echa oyembotavɨukata.

26Jae ndive etei okaru vae reta oñemopüata ikotɨ; isundaro reta ñamɨrita jare jeta yeyé omanota.

27Jayave jókuae mókoi mburuvicha guasu reta oyemongetata oyapo vaerä oyoupe ikavimbaeño, oguapɨ retata okaru päve metei mesa pe jare imiarita oyoupe apu rupi, ërei mbaetɨta metei pe ave oë kavi, echa ndeiño oväe ara.

28Mburuvicha guasu ɨvɨtuguasu kotɨgua oyerova yeta iɨvɨ kotɨ jeta mbaembae ñeraro pe opɨ̈rogüe ndive; jare oyembopɨapochɨta morogüɨrökuavee päve rupi oñeñono tee vae reta kotɨ, oyapota jae jeigüe, javoi oyerova yeta iɨvɨ kotɨ.

29Jare oväe ma jókuae año yave, jekuae ou yeta oporepeña isundaro reta ndive arayevɨ kotɨ; ërei ngaraa ma oporomoamɨri tenonde yave oporomoamɨri rami.

30Echa oporepeñata jese reta barco pe Quitim pegua reta jare okɨɨye retata, javoi opa yeta oyerova reta iɨvɨ kotɨ. Jayave mburuvicha guasu ɨvɨtuguasu kotɨgua iyarasɨta morogüɨrökuavee päve rupi oñeñono tee reta vae kotɨ jare oyapota jae jeigüe, oyomborɨta morogüɨrökuavee päve omboetembae reta ndive.

31Isundaro reta mbaetɨ eteita omboete o mbaemboetea jare ikësea, oyopia reta agüɨye vaerä ma oñemee mɨmba oyeyuka oñemee ara ñavo vae jare oyapo retata joko pe ikavimbae yae vae.Dn 9.27; 12.11; Mt 24.15; Mc 13.14.

32Mburuvicha guasu iñee-yukɨ rupi omokɨ̈reɨ morogüɨrökuavee päve omboetembae reta, ërei Tumpa kotɨ iporogüɨrovia vae reta yogüɨrekota jupi rupi jare oeka retata kërai yogüɨreko vaerä mbaemboavai pɨte rupi.

33Tëta guasu pegua yarakuaa vae reta omboeta jeta vae; ërei jaɨkue rupi omano retata kɨsepuku pe, oapɨ retata, opɨ̈rota chugüi reta opaete mbae güɨnoigüe jare opata güɨraja reta tembipɨɨrä ïru ɨvɨ pe. Kuae oikota mbovɨ año rupi.

34Mbaesusere rupi ma yogüɨreko yave, omboresive retata mbovɨ yemborɨ, jare jeta oñemoïruta jae reta ndive, ërei mbae oipota reta jeko peguaño.

35Jökoraiño amogüe yarakuaa vae reta oiporarata oyetɨo, oyeyoe jare oñemotïi vaerä, ara iyapɨ Tumpa omoërakua vae oväe regua.

36Mburuvicha guasu ɨvɨtuguasu kotɨ oyapota opaete jae jeigüe. Oyererovia katuta imbaepuere yae ete ko opaete tumpa reta güi vae,2 Ts 2.3-4. jare jeita ikavimbae yae vae Tumpa kotɨ;Ap 13.5-6. opaete oë kavita chupe, Tumpa oiporarauka chupe regua, echa Tumpa jei oyapota vae, oyapota ko.

37Kuae mburuvicha guasu mbaetɨta omboete iñemuña reta itumpa, kuña reta itumpa-raanga reta ave mbaetɨta omboete, ïru tumpa reta ave mbaetɨta omboete, echa oyembotuicha yaeta opaete vae güi.

38Ërei ngatu omboeteta mbaepuere ñeraro pegua; omboeteta jókuae iñemuñagüe reta mbaetɨ omboete vae; omboeteta oro pe, korepoti pe, ita reta ipöra yae vae jare mbaembae jepɨ yae vae pe.

39Jëta guasu ikësea oepɨ reta vaerä güɨnoita kuimbae reta omboete tumpa ambuae reta vae; opaete mbaemboete omee mburuvicha guasu pe vae reta, jae ombotuicha yaeta vi, omeeta chupe reta mbaepuere jare omboyaota chupe reta ɨvɨ.

40Ërei ou ma oväe ara iyapɨ yave, mburuvicha guasu arayevɨ kotɨgua oporepeñata mburuvicha guasu ɨvɨtuguasu kotɨgua re; ërei kuae opüata chupe ama ɨvɨtuai reve rami, käretou reta ndive, kavayu regua reta ndive jare jeta barco reta ndive; omboaita opaetei arayevɨ kotɨgua reta iɨvɨ.

41Oiketa vi ɨvɨ ikavi yae vae pe jare oyukata jeta yeyé kuimbae reta; ërei oasayepeta chugüi reta Edom pegua reta, Moab pegua reta jare jeta Amón pegua reta.

42Isundaro reta opɨ̈rota ïru tëtaguasu reta jare ɨvɨ Egipto ave ngaraa omboasayepe.

43Opɨ̈ro retata mbaembae oro pegua jare korepoti pegua jare opaete mbaembae jepɨ yae vae ɨvɨ Egipto pegua; javoi Libia pegua reta jare Etiopía pegua reta oñemoïru jae ndive.

44Ërei jërakuata mbae chupe reta kuaraɨ oëa kotɨ güi jare ɨvɨtuguasu kotɨ güi, jókuae omongɨɨye retata; jayave jae reta iyarasɨ yaeta oë oporomokañɨtei jare oporoyuka vaerä jeta rupi iyemongeta pe,

45omopüata jeyupa ɨguasu jare ɨvɨtɨ guasu iyemboetea yae vae jare oñeñono tee vae ipäu pe. Ërei joko pe oväeta omano vaerä, jare mbaetɨta kia omborɨ vae.