ESTER (gr) 9 - Guarani Bible with DC

Judío reta iporomoamɨri

1Trece ara ma doce yasɨa pe yave, jae ko Adar pe yeero vae, ou oväe mborookuai mburuvicha guasu ombou vae.

2Jókuae ara opa okañɨtei judío jovaicho reta, jare mbaetɨ etei kia oñemopüa chupe reta.

3Jaema provincia rupigua mburuvicha vicha reta, jare región ñavo oï vae mburuvicha reta jare opaete mburuvicha pe ombaekuatía vae reta opa omboete judío reta Mardoqueo güi okɨɨye güi jeko pegua,

4echa ou chupe reta mborookuai mburuvicha guasu güi oiko vaerä mbaemboete opaete mburuvicha iɨvɨ rupi.

6Jaema Susa tëta pe judío reta oporoyuka quiniento ma;

7jare oyuka reta ko Farsanestáin, Delfón, Fasga,

8Faradata, Barea, Sarbaca,

9Marmasima, Arafeo, Arseo, jare Zabutaitán,

10jae ko payandepo Amán taɨ reta, judío reta jovaicho, jare opa vi imbaembae opɨ̈ro chugüi reta.

11Jókuae ara voi, mburuvicha guasu oikuaa jókuae mano re yave,

12jei Ester pe:

—Emase judío reta kuae Susa tëta peño quiniento ma oporoyuka, ¿avɨte pa ïru provincia rupi? ¡Añave ere cheve mbae pa reipota ye, che ameeta ko ndeve!

13Jaema Ester jei chupe:

—Toñemee judío reta pe pɨareve oyapo vaerä kuae añave oyapo ñogüɨnoi rami vae, jare tombosagüɨu reta yeyuvɨka re jókuae payandepo Amán taɨ reta jetegüe.

14Jare mburuvicha guasu omee jökorai oyeapo vaerä, jare toyereru chupe jókuae payandepo Amán taɨ reta jëogüegüe oyembosagüɨu vaerä.

15Jare opaete judío reta yogüɨreko Susa pe vae opa oyomboatɨ catorce araa pe Adar iyasɨ re, jare joko pe oporoyuka reta ye tresciento; ërei mbaetɨ opoko reta imbaembaegüe reta re.

16Jaema provincia rupi ñogüɨnoi vae judío reta opa vi oyemboatɨ ara trece pe jókuae yasɨ reño oyeepɨ vaerä jare opa vaerä jovaicho reta omokañɨtei iyeugüi; jare oporoyuka reta ko jayave quiniento mil, ërei mbaetɨ imbaembae re opoko reta.

17Jaema ara catorcea pe oputuu reta, jare opoko oyemboarete reta yerovia ndive.

18Jare Susa pegua judío reta oyemboatɨ vi jókuae ara catorce pe, jaema mbaetɨ vi ko oputuu reta jókuae ara, ërei ara quince pe omboarete reta vi oyerovia reve.

19Jókuae ramo, judío reta provincia rupi ñogüɨnoi vae ara catorce pe vi Adar iyasɨ re opoko vi oyemboarete yerovia reve, arete iara vae rami, jare metei tei ñavo oyombopota reta mbae pe. Ërei, ïru tëta guasu rupi ñogüɨnoi vae reta ara quince pe ramo oyomboarete reta yerovia reve, arete iara vae rami, jare oyombopota reta vi metei ñavo mbae pe.

Purim iyarete

20Jare Mardoqueo opoko oikuatía opaete jókuae regua, jare omondo vi tembikuatía jókuae regua opaete provincia ñavo rupi Artajerjes iɨvɨ ojo iyapɨa rupi, köiño oï vae reta rupi jare matɨ rupi ñogüɨnoi vae reta rupi, jei vaerä chupe reta güɨreko vaerä iyeupe reta kuae arete iara jare oyapo avei vaerä ara catorce pe jare ara quince pe Adar iyasɨ re,

22echa jókuae ara pe judío reta opa oyuka iyeugüi jovaicho reta, jare jókuae ramo Adar iyasɨ re oyapo reta arete echa jókuae yasɨ pe jae vae reta ipɨatɨtɨ opa oyepoepɨ chupe reta yerovia pe jare arete pe. Jaema jókuae yasɨ re jae ko oyapo avei reta vaerä arete opaete yerovia ndive, jare ombopota reta vaerä opaño mbae pe ivɨaka vae reta jare paravete vae reta.

23Jare judío reta oipɨɨ jókuae yemongeta Mardoqueo oikuatía chupe reta vae,

24echa jókuae tembikuatía pe jei chupe reta kërai Amán Macedonioɨgua opokota tëi jese reta, jare opata tëi omokañɨtei reta vae

25jare kërai ojo tëi oike mburuvicha guasu pe oiporu vaerä Mardoqueo oyuvɨuka vaerä vae; ërei jókuae ikavimbae Amán oipota tëi oyapo judío reta pe vae, jesei oa, jare jókuae güi Amán opaete imichia reta reve opa oyeyuvɨuka yeyuvɨ renda re.

26Jaema jókuae jeko pegua ko kuae ara oyeero Purim pe, jókuae oiko vae jeko pegua. Jare judío reta iñee pe ko jökorai oyeero jókuae Purim pe, jaema jókuae ramo ko jökorai jei tembikuatía pe jókuae oiko.

27Jaema judío reta, jökorai oyapo oyoupe jókuae teko güɨreko avei vaerä güɨreko oyoupe jare jaɨkuegua reta reve, ani ramo kia oipota judíorä oyeapo oiko vae pegua vi: Oasambae oyapo vaerä vi oiko jókuae arete metei yemomaendúa rami, kuri oiko vae reta peguarä vi, opaete tëta ñavo rupi, ñoëtara reta oïa rupi jare región ñavo rupi.

28Jaema jökorai kuae Purim iyarete oyemboarete avei oiko vaerä, agüɨye vaerä okañɨ kuri oiko vaerä reta rupi vi.

29Jare mburuvicha kuña Ester, Aminadab tayɨ, jare judío Mardoqueo, opoko reta oikuatía opaete jókuae oasa vae regua, omoërakua vaerä jókuae tembikuatía rupi Purim arete regua.

31Jaema jókuae jae reta oyapo vae jae ko jae reta jekove oñono jesegüe vae ko.

32Jaema Ester oyapo jókuae mborookuairä oiko vaerä, metei yemomaenduarä oiko vaerä.