2 SAMUEL 13 - Guarani Bible with DC

Amnón jare Tamar

1Tamar jae ko Absalón, David taɨ jeindɨ, jae ko maepöra yae, Amnón, David taɨ ichɨ tee vae iporopota jese,

2jare Amnón oyemombaerásɨti jeindɨ Tamar re, echa Tamar ndei kuimbae ndive oasa vae ramo, yavai oyapo vaerä mbae chupe.

3Ërei Amnón oime ivɨa-ïru Jonadab jee vae, jae ko Simea, David tɨkeɨ taɨ; Jonadab ko kuimbae ipoki yae oporombotavɨ vaerä vae.

4Metei ara Jonadab oparandu chupe:

—¿Maratu pa reiko mburuvicha taɨ? ¿Maera pa ara ñavo jeieteño ma ndepiru? ¿Mbaetɨta pa remombeu cheve?

Jare Amnón jei chupe:

—Cheporopota ko aiko cherɨvɨ Absalón jeindɨ Tamar re.

5Jayave Jonadab jei chupe:

—Eyapakua nderupa pe, eyemombaerasɨ raanga; jare nderu ojo omae nderé yave, ere chupe ou vaerä ndereindɨ Tamar oyapo mbae reu, reecha vaerä jare reu jae omee ndeve vae.

6Jare Amnón oyapakua jupa pe, jare oyemombaerasɨ raanga; jare mburuvicha guasu ojo omae jese yave jei chupe:

—Tou mí chereindɨ Tamar toyapo mbɨyape kuae pe cheve, tomee tau jae etei.

7Jare David omondo tayɨ Tamar, Amnón jo pe, jei chupe:

—Ekua ndekɨvɨ Amnón pɨri jare eyapo mbae tou.

8Jare Tamar ojo ikɨvɨ Amnón pɨri, jae oyapakua oï; oipɨɨ trigo ikuigüe jare oyapo mbɨyape ipïreriasɨ vae jare omboyɨ;

9javoi güɨnoe sartén jare omee jou vaerä; ërei Amnón mbaetɨ oipota; jare jei ñogüɨnoe vaerä joko güi opaete joko pe ñogüɨnoi vae.

10Jare opaete joko pe ñogüɨnoi vae ñogüɨnoe joko güi yave, Amnón jei Tamar pe:

—Eru tembíu akea pe jare eñono takaru.

Jayave Tamar oipɨɨ jókuae oyapogüe güɨraja ikɨvɨ pe, ikea pe.

11Ërei omeeta ma jou yave Amnón oipɨɨ jeindɨ jare jei chupe:

—Eyu, eyapakua che ndive.

12Jayave jae jei chupe:

—Agüɨye chekɨvɨ, agüɨye eyapo ikavimbae cheve; mbaetɨ ko kuae nunga oyeapo Israel pe. ¡Agüɨye eyapo ikavimbae!

13Echa, ¿ketɨ pa ajata chemara güi? Jare nde kuae Israel pe ngaraa nerërakua kavi. Romoñera nemiari vaerä mburuvicha guasu ndive, jae ngaraa jäkateɨ cheré ndeve.

14Ërei Amnón mbaetɨ oipota oyeapɨsaka jese, oipɨɨ oipotambae reve jare oasa jae ndive.

15Javoi jaɨkue rupi Amnón omotareɨ omae jese; oasa ete omotareɨ tenonde yave oaɨu tëi vae güi. Jei chupe:

—¡Epüa jare ekua!

16Ërei Tamar jei chupe:

—¡Agüɨye jökorai, kuae reyapo cheve vae güi oasa ete ko ikaviä cherenoe yave chemombo añave!

Ërei jae mbaetɨ oipota oyeapɨsaka jese;

17oenɨi jembiokuai jare jei chupe:

—¡Enoe kuae güi cheve kuae kuña, javoi eyokenda öke chugüi!

18Jare jókuae tembiokuai güɨnoe joko güi jare oyokenda öke chugüi. Tamar jemimonde ko temimonde ipïra jeta vae, kuae nunga temimonde ko omonde mburuvicha guasu tayɨ reta ndei etei kuimbae ndive oasa vae.

19Jayave Tamar oipɨɨ tanimbu jare oñono iñäka re jare omondoro jemimonde jeta ipïra vae, jare ipo oñono reve iñäka re jäse oyaeo ojo oiko.

20Jayave ikɨvɨ Absalón oparandu chupe:

—¿Ndekɨvɨ Amnón pa jayave jökorai ndeapo? Agüɨye emombeu chereindɨ, echa ndekɨvɨ ko. Agüɨye ndepɨatɨtɨ mbatee kuae re.

Tamar ipɨatɨtɨ yae opɨta ikɨvɨ Absalón jo pe.

21Jare mburuvicha guasu David oikuaa kuae regua yave iyarasɨ yae; ërei mbaetɨ mbae jei Amnón pe, echa oaɨu yae ko taɨ tenondegua ramo.

22Absalón mbaetɨ etei mbae jei Amnón pe, ërei omotareɨ omae Amnón re, opoko ramo jeindɨ Tamar re.

Absalón oyuka Amnón

23Mókoi año oasa güire, metei ara Absalón jembiokuai reta oñapi ñogüɨnoi ivecha reta chupe Baal-hazor pe, kuae ko oï Efraín iñemuña reta iɨvɨ iyɨpɨ pe, Absalón oparea opaete David taɨ reta pe.

24Oparea vi mburuvicha guasu David pe, jei chupe:

—Oime cherembiokuai reta oñapi vecha reta ñogüɨnoi ramboeve aipota reo mí nde jare opaete ndemborɨa reta ndive chépɨri aretea pe.

25Ërei mburuvicha guasu jei chupe:

—Mbaetɨta orepuere opaete rojo cheraɨ, agüɨye vaerä reyemoambeko mbatee.

Jare yepe tëi Absalón omoñera jeta, ërei jae mbaetɨ oipota ojo, ërei jei ñee kavi chupe.

26Jayave Absalón jei:

—Mbaetɨta jökorai yave, emaeño tojo orerupíe cherɨkeɨ Amnón.

Jayave mburuvicha guasu jei:

—¿Maera pa reipota ojo nderupíe nderɨkeɨ Amnón?

27Ërei Absalón jeta omoñera ramo, David omaeño ojo vaerä jupíe Amnón jare opaete ïru tɨvɨ reta.

28Absalón yepe jei jembiokuai reta pe: “Pemae kavi, Amnón osavaɨpo ma oï yave, che jaeta peve peyuka vaerä yave, peyuka; agüɨye pekɨɨye, echa che ko jae peve. Jayave peñemomɨ̈rata jare peñemoäta ngatu.”

29Jáeramo Absalón jembiokuai reta oyuka Amnón, Absalón jei chupe reta rami. Jayave opaete mburuvicha guasu taɨ reta opüa, opo reta imburika guasu re jare opa otekuarai.

30Jare jae reta oime vɨteriño tape rupi yogüeru yogüɨreko yave, ou jërakua David pe, Absalón opa ko oyuka mburuvicha guasu taɨ reta vae jare kërai mbaetɨ etei metei ave jembɨre.

31Jayave David opüa jare omondoro jemimonde ipɨatɨtɨ güi jare oyapakua ɨvɨ pe, jare opaete imborɨa reta ñogüɨnoi jae ndive vae reta omondoro vi jemimonde;

32ërei Jonadab, Simea taɨ, David tɨkeɨ jei:

—Agüɨye jökorai toyemongeta cheya, mbaetɨ ko opa reta oyuka opaete nderaɨ reta, Amnónño ko oyuka reta, echa jökorai ko Absalón iyemongeta Amnón oasa jeindɨ Tamar ndive güive.

33Jáeramo, agüɨye cheya togüɨrovia jókuae Absalón opa ko oyuka mburuvicha guasu taɨ reta, jei vae re, Amnónño ko oyuka reta.

34Absalón otekuarai. Jayave kunumi omae vaerä oï vae, omae ikupe kotɨ yave, oecha ɨvɨtɨ kotɨ güi tape ou vae rupi jeta ogüeyɨ yogüeru vae.

35Jare Jonadab jei mburuvicha guasu pe:

—Joko ma yogüeru nderaɨ reta cheruvicha, che jae rami etei.

36Jare opa mi ramo imiari yave yogüeru ma oväe mburuvicha guasu taɨ reta, jare täta jäse oyaeo reta. Mburuvicha guasu jare opaete imborɨa reta täta oyaeo reta vi.

37-38Absalón otekuarai, ojo Talmai, Amiud taɨ pɨri, jae ko mburuvicha guasu Gesur pegua,2 S 3.3. jare opɨta joko pe mboapɨ año. David oäpiro oiko taɨ Amnón ara ñavo,

39ërei ipɨakatu ye ma taɨ imano güi yave, oipotaecha oecha taɨ Absalón.