ISAÍAS 51 - Guarani Bible with DC

Ñee reta yembopɨakatu pegua Sión peguarä

1“Peyeapɨsaka cheré opaete,

pe reta peiko jupi rupi vae,

pe yandeYa peeka vae reta.

Pemaendúa, mbae nunga ita guasu güi ko peyeekɨ vae,

mbae nunga ɨ̈vavira güi ko peñerenoeuka vae.

2Pemae peñemuñagüe Abraham re,

jare Sara re, chugüi peñemuña vae.

Abraham aenɨi yave, jaeño etei oiko yepi,

ërei cheporerekua jese, jare jeta oñemuña.

3Ambopɨakatuta Sión,

tëta guasu opaetei oyemboai oï vae.

Iɨvɨ ipombae oï vae amopörata,

Edén pe ko raɨ añono rami.

Joko pe oimeta yerovia jare vɨakatu,

tairari mbaemboete pegua.

4Peyeapɨsaka cheré tëta chembae,

peendu cheñee tëtaguasu chembae:

Amoërakuata cheporookuai reta,

jare jókuae omboesapeta tëta reta peguarä.

5Köi yae ma oï aï vaerä mburuvicharä,

cheporogüɨroasayepe oyemboɨpɨ ma;

chembaepuere rupi aïta mburuvicharä tëta reta re.

Tëtaguasu reta ɨguasu jembeɨ rupigua cheräro ñogüɨnoi,

chembaepuere re oyeko retata.

6Pemae ara kotɨ,

pemae ɨvɨ re;

echa ara ipo reta opata okañɨ tätati rami,

ɨvɨ indechita temimonde indechi vae rami,

jare pɨpegua reta jaeramiño vi opa eteita okañɨtei.

Ërei cheporogüɨroasayepe jekuae aveita,

jare cheporojäa ngaraai iyapɨ.

7Peyeapɨsaka, pe reta peikuaa jupi vae re vae,

cheporookuai rupi peiko vae reta.

Agüɨye pekɨɨye kuimbae reta iñeeasɨ katu güi,

agüɨye peyembopɨtu iporoangao jeko pegua,

8echa temimonde opa kupii jou vae ramita ko,

vecharaagüe opa taso jou vae ramita.

Ërei cheporojäa oiko aveita,

cheporogüɨroasayepe jekuae aveita.”

9Epüa, epüa cheYa, eyemonde mbaepuere pe;

epüa, arakae tenonde rupi repüa rami,

arakae reyapo rami.

Nde ko opa rembojaɨ jaɨ Rahab,

mbaeporou ɨguasu rupigua;

10opa ko remondɨpa ɨguasu,

ɨguasu rupi reyapo tape,

reyoragüe reta oasa vaerä jokoropi.

11Añetete, yandeYa oyoragüe reta oyerova yeta,

otairari reve oyerova reta yeta Sión kotɨ;

jova, oyerovia katu avei retata;

ovɨa jare oyerovia katu retata,

mbaeporara jare yaeo opata okañɨ.

12“Che ko jae pombopɨakatu vae.

¿Maera pa pekɨɨye kuimbae güi?,

jae ko omano vae.

¿Maera pa pekɨɨye kuimbae kapii ramiño vae güi?

13Peakañɨ peYa peApoa güi,

ara jare ɨvɨ iyapoa güi,

ara ñavo pekaaru aru pekɨɨye oporombopɨatɨtɨ vae reta güi,

oyemongeta pemokañɨtei vaerä yave.

Ërei, ¿jama pa jókuae oporombopɨatɨtɨ vae reta iyarasɨ?

14Oyeyorata ete ma tembipɨɨ oiporara yae oï vae;

ngaraa ma omano tembipɨɨrɨru ɨvɨkua pegua pe,

ngaraa ma oata chupe mbɨyape.

15Echa che ko ndeYa,

amomembe ɨguasu vae,

jare ambojɨapu ɨaparúa.

Che ko neTumpa,

ndeYa Imbaepuere yae ete vae,

jae ko cheree.

16Ndeyuru pe añono cheñee reta,

roñovatu chepo iä pe,

che, ara iyapoa,

jare ɨvɨ amboguapɨ iguapɨka re vae

jare Sión pe jae vae: ‘Chembae vae ko nde.’ ”

17Epa jare epüa Jerusalén.

Reiporara yandeYa iyarasɨ,

okau vae, opaetei jou kopaJer 25.15; Ap 14.10; 16.19. pegua vae

osavaɨpo opɨta rami.

18Opaete nemembɨ reta güi,

mbaetɨ metei ave ndereraja vaerä;

opaete nemembɨ reta rembokuakuaa vae güi,

mbaetɨ metei ave ndepoko ndereraja vaerä.

19Kuae mókoi susere ou ndeve:

Opa mbae oñepɨ̈ro jare oyemboai ndegüi,

karuai jare ñeraro.

¿Kia pa ndepararekota?

¿Kia pa ndembopɨakatuta?

20Nemembɨ reta opa ogüɨapi ñogüɨnoi,

tape oyoasaa ñavo rupi oyepɨso ñogüɨnoi,

guasuovɨ ñuai pe oa vae rami.

YandeYa iporojäa rupi oiporara reta,

neTumpa iporombosɨmbi rupi.

21Jáeramo, nde tëta guasu oiporara yae vae,

osavaɨpoecha oï vae, ërei mbaetɨ vino pe;

22körai jei ndeYa Tumpa,

tëta imbae vae oepɨ vae:

“Mase, ko aekɨta ndepo güi,

jókuae kopa reyembosavaɨpo pɨpe vae;

ngaraa ye ma reu kuae chearasɨ oï kopa pe vae.

23Jare añonota jókuae kopa, oiporarauka ndeve vae reta ipo pe,

jei reta yepi ndeve:

‘Eyapakua, roasata ndeárambo rupi’;

jare nde reyapakua ɨvɨ re,

javoi jae reta oasa, tape rupi rami.”