1¡Kërai yandeYa opa oñova pɨtumimbi pe,
tëta Sión pegua reta iyarasɨ rupi!
Ɨvate güi oitɨ tëta Sión ipöra yae vae, ara güi oitɨ ɨvɨ pe rami;
iyarasɨ iara pe, mbaetɨ imaendúa itupao re.
2YandeYa oporomboai, iñɨ̈rombae reve,
iyarasɨ rupi omboai opaete Jacob
iñemuña reta jo guakapi pegua,
opa omboai ñepɨ̈roka reta Judá pegua.
Opa omomichi mborookuaía reta jare mburuvicha reta.
3Iyarasɨ rupi omboai opaete Israel imbaepuere,
oyembosɨrɨ chugüi reta, tovaicho reta oporepeña jese yave.
¡Jacob iñemuña reta kotɨ iyarasɨ oyepota, tata jendɨvuku vae opa mbae omboai rami!
4Metei tovaicho omoata kavi igüɨrapa vae rami,
oyapo katu iyɨva, metei tovaicho oyeapo katu rami,
jare omboai, ipöra yae yepi vae;
iyarasɨ ombou tata rami,
Sión pegua reta jeyupa re.
5YandeYa oyemboyovaicho Israel pegua reta re, jare opa omboai;
opaetei ombosururu jo kavi reta,
opa omboai ñepɨ̈roka reta,
ombojeiete mbɨatɨtɨ jare yaeo Judá pegua reta pe.
6Jo guakapi pegua omboai, küaraɨa ñairaka pegua oyemboai rami;
yemboatɨa renda opa omboai.
YandeYa opa omoakañɨ Sión pegua reta arete reta
mbaemboete pegua güi jare ara reta mbutuu pegua güi.
Iyarasɨ jeko pegua opa omombo mburuvicha guasu jare sacerdote.
7YandeYa opa omombo, mɨmba oyeyuka oyeapɨ jese vae,
güɨröɨro jo mbaemboetea;
omee tovaicho ipo pe tëta guasu ikësea.
Jare jae reta, ¡arete pe jeta yae vae oyeendu sapúkai rami yandeYa jo pe!
8YandeYa jei opa vaerä
ombosururu tëta guasu Sión ikësea.
Ombojaanga ma opa vaerä ombosururu,
mbaetɨ etei oputuu opa ombosururu regua.
Tëta guasu ikësea reta oyokupe vae, jae opa oñono mbɨatɨtɨ pe,
opa osururu metei rami.
9Jöke reta jare iyokendaka reta opa oyemboai,
¡jare opa oyeitɨ ɨvɨ rupi!
Juvicha guasu jare mburuvicha reta ñogüɨnoi, tëtaguasu reta mbaetɨ güɨnoi Tumpa iporookuai vae ipɨte rupi.
¡Ñeemombeúa reta ave mbaetɨ ma oecha mbae yandeYa güi!
10Tëta Sión pegua ndechi reta oguapɨ kïrii ngatu ɨvɨ pe;
ɨvɨkúi oñono reta iñäka re jare oyemonde reta temimonde mbɨatɨtɨ pegua pe.
Jerusalén pegua kuñatai reta oyetavatɨka itindɨasɨ reve ɨvɨ re.
11Cheresaɨ veä ma ayaeo mbatee güi, cheɨvɨte pe etei ayandu,
jare chepɨa jëogüe yae,
aecha ramboeve oyemboai cherëtaɨgua reta jëta guasu;
michia okambu vae reta ave omano tëta guasu joka guasu rupi.
12Michia reta jei ichɨ pe: “¿Jama pa tembíu yau vaerä?”
Omano reta ramboeve tëta guasu joka rupi iperegüe rami,
ichɨ jäpapau pe oyekɨi reta.
13¿Kia ndive pa romboyovaketa ani rombojaangata, Jerusalén?
¿Mbae re pa ambojaangata ndeve, rombopɨakatu vaerä tëta chembae vae Sión?
Echa ɨguasu tuicha yae rami resusere;
¿kia pa ndembogüerata?
14Ñeemombeúa reta oechagüe omoërakua ndeve vae,
jaangaño ko jare mbokereño ko.
Mbaetɨ ndeyoa omboyekuaa reta ndeve, echa omboyekuaa yave, mbaetɨta tëi reo tembipɨɨrä;
ërei omombeu reta ndeve mbae maratuta vae añetembae, jare güɨroviauka reta jese ndeve.
15Opaete tape rupi oasa vae reta oyepopete ndeyóyai yóyai reve;
otɨvɨñee jare iñäka ombovava oyóyai reve Jerusalén, jei reta:
“¿Jae pa kuae, tëta guasu ikavi yae opaete güi kuae ɨvɨ pe jei chupe reta vae?”
16Opaete nderovaicho reta jei mbae ndekotɨ.
Ndeyóyai yóyai jare jäi ombokɨrɨrɨu reve jei reta ndekotɨ:
“¡Opaetei yamboai!
¡Kuae ko jae ɨma ara rupi ma ñaäro yaiko vae!
¡Yayu yaupitɨ jare yaecha!”
17YandeYa jei oyapo vaerä vae, oyapo;
ombopo iñee, jókuae arakae güive ma jei oiko vaerä vae;
oporomboai iñɨ̈rombae reve;
omaeño nderovaicho reta ndeyóyai yóyai vaerä,
jare omee nderovaicho reta imbaepuere yae vaerä.
18¡Sión, esapúkai yandeYa pe!
¡Emaeño tosɨrɨ nderesaɨ ara rupi jare pɨ̈tu rupi, ɨ̈aka rupi rami!
¡Agüɨye topɨta nderesaɨ!
19Epüa, esapúkai pɨ̈tu-ɨpɨ güive;
nemiari opaete ndepɨa reve yandeYa pe;
eupi ndepo ikotɨ jare eyerure chupe nemembɨ reta re,
jovaruru ma tëta guasu ikaye rupi vae reta re.
20Emae cheYa Tumpa, mbaetɨi ko kia jökorai reyapo.
¿Kuña reta jouta pa imembɨ raɨ ovoɨ vae?
¿Sacerdote jare ñeemombeúa oyeyukaukata pa o mbaemboetea pe?
21Michia reta jare ndechi reta oyoa jëogüe ikatu rupi;
kuñatai reta jare kunumi reta opa omano kɨsepuku pe.
Opa reyuka reta ndearasɨ iara pe, reñaseokɨ̈tiuka, ¡neɨ̈rombae reve chupe reta!
22Rembou cheve ketɨ ketɨ güi kɨɨye,
metei arete ikavía pe yogüeru vae rami;
cheYa, ndearasɨ iara pe mbaetɨ kia oasayepe ndegüi vae.
Che ambokuakuaa vae jare ayangareko jese vae reta,
cherovaicho reta opa oyuka.
Who We AreWhat We EelieveWhat We Do
2025 by iamachristian.org,Inc All rights reserved.
