1 MACABEOS 16 - Guarani Bible with DC

Simón taɨ reta omoamɨri Cendebeo

1Juan ojo Gezer güi omombeu tu Simón pe Cendebeo jembiapo.

2Simón oenɨi mókoi reve taɨ tenondegua reta, Judas jare Juan, jare jei chupe reta: “Cherëtara reta ndive, jare opaete cheru iñemuña reta ndive, oretaɨrusu güive ma jeta roñoraro Israel jovaicho reta kotɨ, jare jeta royora Israel tovaicho reta güi.

3Che añave chendechi ma, ërei Tumpa iporoparareko rupi, pe reta petaɨrusu peï. Peiko cherekovia jare petutɨ jekovia pe, jare peñoraro yandeɨvɨ re. ¡Tumpa tapemborɨ!”

4Simón oiparavo jëta pe veinte mil ñoraro regua ɨvɨ rupigua jare kavayu regua reta, oë vaerä oñoövaiti Cendebeo ndive. Omboasa reta ma yave pɨ̈tu Modín pe,

5opüa reta ndeimboveasɨ yogüɨraja ñuu kotɨ. Joko pe oë reta japerä pe jetagüe vae sundaro ɨvɨ rupigua jare kavayu regua reta. Metei ɨ̈aka guasuño omboyao reta oyougüi.

6Juan jare isundaro reta opa oyemboenda tovaicho jóvai, ërei oecha ma yave isundaro reta okɨɨye oasa ñogüɨnoi ɨ̈aka, Juan räri oasa. Oecha reta ma yave, ikuimbae reta jaema etei ñogüɨnoi vi jaɨkue.

7Tovaicho kavayu regua reta jeta yae ramo, Juan omboyao isundaro ɨvɨ rupigua reta mókoi pe jare kavayu regua reta oñono ipäu rupi.

8Omoñee reta mimbɨguasu, jare Cendebeo jare isundaro reta opa iñamɨri. Jeta yae omano chugüi reta, jare oasayepegüe reta opa otekuarai ñepɨ̈roa kotɨ.

9Joko pe Judas oyekutuuka, Juan jëtara. Juan oaɨkuemoña otekuaraigüe reta, güɨrajai güɨroväe Cedrón pe, jae ko Cendebeo omopüa ye ramo vae.

10Tovaicho reta oñepɨ̈ro vi o ɨvate reta Azoto pegua rupi, ërei Juan oyatapɨ jókuae tëta re. Omano jayave dos mil rupi tovaicho reta, joko güi Juan oyerova ye jete maraëɨ reve katu reve Judea kotɨ.

Oyuka reta Simón tavɨ rupi

11Tolomeo, Abub taɨ, ombojee reta sundaro ruvicharä ñuu Jericó pegua pe. Kuae mbɨa oiko katu yae oro jare korepoti pe,

12echa jae ko sacerdote ruvicha jovaya;

13jare imbaepota rai yae vi jáeramo oipota oyemboiya opaete tëta guasu re. Jayave oyemongeta oyuka vaerä Simón jare taɨ reta tavɨ rupi.

14Jókuae ara reta rupi Simón omae oiko tëta ñavo rupi, oikuaa vaerä jae reta iyemboavai, ojo oväe Jericó pe taɨ reta Matatías jare Judas ndive, yasɨ pandepo meteia pe, jae ko Sebat yasɨ pe, año ciento setenta y siete pe.

15Abub taɨ oövaiti reta oyerovia katu reve jaanga ñepɨ̈roa Doc jee vae pe, jae omopüagüe joko pe oyapo reta chupe arete tuicha vae. Ërei yepe oime ma omoñemi vɨari jokotɨ mbovɨ ikuimbae reta,

16jaema ko Simón jare taɨ reta opa ma osavaɨpo yave, Tolomeo jare taɨ reta oipɨɨ jembiporu jare oike jókuae kaúa pe. Okua Simón re jare oyuka reta mókoi reve taɨ reta ndive jare amogüe jembiokuai reta.

17Körai Tolomeo omboekovia ikavimbae rupi teko kavi, oporoyukaasɨ katu yae jókuae mbɨa.

18Tolomeo omombeu kuatía rupi mburuvicha guasu pe, jare oiporu chupe ombou vaerä sundaro reta, omee vaerä chupe mbaepuere opaete ɨvɨ re.

19Omondo vi Gezer kotɨ mbovɨ mbɨa reta oyuka vaerä Juan, jaeramiño vi oikuatía tupapire sundaro ruvicha reta pe, pɨpe oiporu oñemoïru reta vaerä jae ndive jare güɨrökuavee chupe reta oro, korepoti jare ïru mbota reta.

20Omondo vi mbovɨ reta oyemboiya vaerä Jerusalén jare itupao re.

21Ërei katu, metei kuimbae oyembotenonde chugüi reta, jare imiari Juan pe tu jare jëtara reta opa omano vae re, jare oime ko Tolomeo ombou oyukauka vi jae.

22Kuae oendu yave, Juan iyarasɨ yae, jare opaetei oyuka jókuae mbɨa reta ojo tëi oporoyuka joko pe vae, echa oikuaa ma chugüi reta iyemongeta.

23Ïru tembiapo reta Juan oyapogüe, jae ko iñoraro reta jare iparavɨkɨ reta, oguambɨ guasu omopüa vae, jare ïru tembiapo apo reta,

24oyekuatía oï jesegua tembikuatía pe, tu jekovia pe oguapɨ güive sacerdote ruvicharä.