1 CORINTIOS 14 - Guarani Bible with DC

Miari ñee ambuae pe

1Peiko avei mboroaɨu rupi; jare peeka mbaembae Espíritu pegua, ërei pembotenonde pemoërakua vaerä mbae maratuta vae re.

2Echa ambuae ñee reta pe imiari vae, mbaetɨ ko imiari kuimbae reta pe, imiari ko Tumpa pe. Echa mbaetɨ kia oikuaa mbae jei vae, jae imiari Espíritu Santo rupi yaikuaambae vae re.

3Ërei omoërakua mbae maratuta vae, imiari ko ïru vae reta pe, omomɨ̈rata, omboarakuaa jare ombopɨakatu vaerä.

4Ñee ambuae pe imiari vae jae aeño oñemomɨ̈rata. Ërei mbae maratuta vae re omoërakua vae, omomɨ̈rata oporogüɨrovia vae reta.

5Che aipotaecha opaete pe reta pemiari vaerä ambuae ñee reta pe. Ërei aipota yae vae jae ko pemoërakua vaerä mbae maratuta vae re. Echa Tumpa güi omoërakua vae oyapɨraa ambuae ñee pe imiari vae; ërei ñee ambuae vae omombeu kavi mbae ra oipota jei vae yave, oporogüɨrovia vae reta pe omomɨ̈ratata.

6Jáeramo, cherɨvɨ reta, che aja yave pépɨri chemiari reve ambuae ñee reta pe, ¿osiriveta pa peve, mbaetɨ yave aikuaauka peve Tumpa oechauka cheve vae, arakuaa katu, Tumpa güi amoërakua vae ani mbaetɨ pomboe yave?

7Temimbɨ, ani arpa raɨ, oyembopuiño yave, ¿këraita pa yaikuaa mbae nunga tairari ra oyembopu oï pɨpe vae?

8Mimbɨ guasu, oñemoñeeiño yave, ¿oyeapokatuta pa sundaro reta ñeraro peguarä?

9Jaeramiño vi pe reta pemiari yave ambuae ñee reta yaikuaambae vae pe, ¿këraita pa ïru vae reta oikuaa? Pemiariiño ma ko ɨvɨtɨ pe.

10Añete ko, oime jeta ko ñee reta kuae ɨvɨ pe, jare opaete vae oikuaa kavi iñee ñee ae.

11Jáeramo che mbaetɨ aikuaa yave ïru vae iñee, ketɨgua rami aïta chemomiari vae pe, jare jae ketɨgua ramita vi cheve.

12Jaeramiño vi pe reta peipota yae penoi vaerä Espíritu pegua. Peeka jókuae pɨpe ïru oporogüɨrovia vae reta pemomɨ̈rata vaerä vae.

13Jáeramo ambuae ñee pe imiari vae, toyerure Tumpa pe ipuere vaerä omombeu mbae oipota jei jókuae ambuae ñee vae.

14Echa che ayerure yave Tumpa pe ñee yaikuaambae pe, cheespirituño ko oyerure, ërei mbaetɨ aikuaa mbae ko jae vae.

15¿Kërai pa jayave? Tayerure espíritu rupi jare tayerure vi aikuaa reve kavi. Jaeramiño vi tatairari espíritu rupi jare tatairari vi aikuaa reve kavi.

16Echa nde remboete yave Tumpa ndeespíritu peño, ñee nemiari pɨpe vae oikuaambae vae ngaraa ipuere oñemoïru nde ndive, yasoropai Tumpa pe remee yave. Echa mbaetɨ oikuaa mbae ko rere vae.

17Añete ko, ikavi yae nde remee yasoropai Tumpa pe, ërei jókuae ïru vae mbaetɨ remomɨ̈rata pɨpe.

18Che amee yasoropai Tumpa pe, jeta chemiari ambuae ñee reta pe opaete pegüi reta vae re.

19Ërei oporogüɨrovia vae reta ndive aï yave, chekɨ̈reɨ chemiari mbovɨ ñeeño yaikuaa reve kavi vae pe, amboe vaerä ïru vae reta, jeta ambuae ñee reta pe jae vae güi.

20Cherɨvɨ reta, agüɨye peyemongeta michia reta rami. Jaeño peiko michia rami ikavimbae oikuaambae rami. Ërei peyemongeta pe, okuakuaagüe oyemongeta rami.

21Mborookuai pe oyekuatía oï körai: “Amomiarita kuae ɨvɨ pegua reta ambuae ñee pe, ambuae ɨvɨ pegua reta iñee pe. Ërei jeseve ngaraa oyeapɨsaka cheré, jei yandeYa.”Is 28.11-12.

22Jáeramo ambuae ñee reta pe ñanemiari vae ko yaikuaauka vaerä oporogüɨroviambae vae reta peño. Ërei Tumpa güi ñamoërakua vae ko yaikuaauka vaerä oporogüɨrovia vae reta pe.

23Jáeramo opaete peporogüɨrovia vae reta peyemboatɨ yave, jare opaete pe reta pemiari yave ambuae ñee reta pe, javoi oike yave pepɨte pe kuae nunga ñee reta oikuaambae vae reta ani oporogüɨroviambae vae reta, jae reta jeita pembokere ko.

24Ërei opaete pe reta Tumpa güi pemoërakua yave, jare oike pepɨte pe oporogüɨroviambae vae ani oikuaambae vae, jae oikuaata iyegua jae ko iyoa vae jare omaeta iyé, oendu yave opaete pere vae;

25jökorai oyekuaata chupe opaete ipɨa pe oï vae, jare oyetavatɨkata omboete reve Tumpa, jare jeita kërai añetete Tumpa oiko pepɨte pe.

Peyapo kavi opaete sɨmbi rupi kavi jare jenda pe kavi

26Jáeramo, cherɨvɨ reta, ¿kërai pa jayave? Peyemboatɨ yave, metei ñavo pepuere petairari, peporomboe ani pemiari ambuae ñee pe, ani peikuaauka ïru reta pe Tumpa oikuaauka peve vae, ani pemombeu kavi mbae oipota jei ambuae ñee pe vae. Ërei toyeapo opaete peñomomɨ̈rata vaerä.

27Oime yave kia reta imiari ambuae ñee reta pe vae, timiari mókoi ani mboapɨño, jare toñoäro metei ñavo, ërei metei tomombeu kavi mbae oipota jei ambuae ñee reta vae.

28Ërei joko pe mbaetɨ kia omombeu kavi vaerä mbae oipota jei ambuae ñee reta vae yave, agüɨye kia timiari yemboatɨa pe ambuae ñee reta pe. Timiari iyeupe aeño Tumpa ndive.

29Jaeramiño vi timiari mókoi ani mboapɨ ñeemombeúa reta, jare oyeapɨsaka vae reta toecha jae kavi ra jei reta vae.

30Ërei Tumpa oikuaauka yave mbae oguapɨ oï vae pe, imiari oï vae tikïrii.

31Echa jökorai opaete pe reta pepuere pemoërakua Tumpa güi metei metei rupi, opaete vae peyemboe vaerä jare pemboarakuaa vaerä.

32Jare Tumpa güi omoërakua vae reta oime mbaepuere güɨnoi iyé ae;

33echa Tumpa mbɨakatu pegua ko, mbaetɨ ko yembojopa pegua.

Opaete oporogüɨrovia vae reta oyemboatɨa ñavo pe,

34tikïrii kuña reta. Echa mbaetɨ ko jaekavi imiari vaerä. Metei ñavo toiko ime jeia re, echa jökorai jei mborookuai pe.

35Jare oime yave mbae kuña oipota oikuaa vae, toparandu ime pe jëta pe. Echa mbaetɨ ko jaekavi peyemboatɨa pe kuña imiari yave.

36Pemaendúa kërai pegüi retaä ko oyemboɨpɨ oñemoërakua Tumpa iñee, jare pe retañoä ko peendu Tumpa iñee.

37Güɨramoi kia oyemongeta iyé jae ko metei ñeemombeúa ani Espíritu pegua ko vae. Jókuae nunga toikuaa kërai kuae mbaembae aikuatía peve vae yandeYa iporookuai reta ko.

38Ërei mbaetɨ oipota oikuaa yave, topɨta oikuaambae.

39Jáeramo, cherɨvɨ reta, peeka pemoërakua vaerä Tumpa güi, jare agüɨye peyopia oipota imiari ambuae ñee reta pe vae.

40Ërei peyapo kavi opaete sɨmbi rupi kavi jare jenda pe kavi.