1Jayave Salomón jei:
“CheYa, nde rere,
reyekuaambae ko reikota vae.
2Ërei che amopüa o ndeveguarä,
pɨpe eiko jekuae avei pegua.”
3Javoi mburuvicha guasu oyerova omae Israel iñemuña reta yatɨ ñogüɨnoi vae kotɨ, jare jei ñee kavi ikotɨ reta; jare opaete Israel iñemuña reta oyemboatɨ vae oyemboɨ ñogüɨnoi.
4Jei reve: “Toyemboete yandeYa, Israel iTumpa, jae ombopo iñee güɨrökuavee cheru David pe vae, jei reve:
5‘Jókuae ara anoe güive chembae vae reta ɨvɨ Egipto güi, mbaetɨ aiparavo metei ave tëta guasu ñemuña reta güi Israel pe, pɨpe oñemopüa vaerä tupao guasu joko pe oiko vaerä cheree, ani mbaetɨ vi aiparavo metei kuimbae oiko vaerä mburuvicharä chembae reta Israel re.
6Ërei aiparavo Jerusalén, joko pe oï vaerä cheree, jare aiparavo David oï vaerä tëta chembae vae Israel juvicharä.’
7Jare cheru David oyemongeta omopüa vaerä tupao guasu yandeYa Israel iTumpa pe jee re.
8Ërei yandeYa jei cheru David pe: ‘Ndepɨa pe reyemongeta remopüa vaerä tupao guasu cheree re vae ikavi ko;
9ërei nde mbaetɨta remopüa, nderaɨ renoita vae, jae omopüata tupao guasu cheree re.’
10Jare yandeYa ombopo iñee jeigüe vae. Echa che apüa cheru David jekovia pe, jare aguapɨ Israel pe mburuvicha guasu iguapɨa pe yandeYa jei rami, jare amopüa tupao guasu yandeYa pe, Israel iTumpa jee re.
11Jare kuae tupao guasu pe añono Tumpa ikäjou, pɨpe oï yandeYa iporogüɨrökuavee päve oyapo Israel iñemuña reta ndive vae.”
12Javoi Salomón oñeñono mɨmba oyeyuka oyeapɨ jese vae yandeYa imbae jóvai, opaete Israel iñemuña reta jóvai, jare omopüa ipo.
13Echa Salomón oyapo metei oñemoñee jese vaerä jiero iyu vae pegua, mókoi metro y medio pukugüe jare ipɨgüe, jare metei metro treinta y cinco centímetro ɨvategüe, kuae oñono tupao guasu joka mbɨte pe, jare jókuae re oyetavatɨka Israel iñemuña reta jóvai jare omopüa ipo ara kotɨ jare jei:
14“CheYa, Israel iTumpa, mbaetɨ Tumpa nde rami vae ara pe ani ɨvɨ pe, rembopo morogüɨrökuavee päve reyapo vae jare reiparareko nderembiokuai ipɨa reve kavi oyeokuai ndeve vae reta;
15nderembiokuai cheru David pe rembopo rerökuavee vae; neñee pe rerökuavee vae ndembaepuere rupi rembopo añave oyekuaa oï vae.
16Jáeramo cheYa, Israel iTumpa embopo neñee cheru David pe rerökuavee vae, echa rere: ‘Ngaraa oata kuimbae neñemuña reta güi oguapɨ vaerä mburuvicha guasurä Israel re, nderaɨ reta yogüɨreko kavi yave jare oyapo reta cheporookuai nde reiko rami cheróvai yave.’
Who We AreWhat We EelieveWhat We Do
2025 by iamachristian.org,Inc All rights reserved.
