1Amae ngatuta jare aïndaivita,
omaeäro vae rami, aärota,
mbae ra jaeta cheYa pe
cheñeengeta chupe vae re.
2YandeYa jei cheve körai:
“Eikuatía tuyuapo oyemboipegüe re aechaukata ndeve vae,
omongeta vae oecha kavi vaerä.
3Ndei vɨteri oväe oyembopo vaerä kuae oyekuaa vae;
ërei ngaraa oasa oyembopombae.
Nde eäro, yepe tëi ara oväe raiviä,
echa ouño täi ko iara pe.
4Eikuatía, mase,
jeko kavimbae reta oyembotuicha,
ërei jupi vae reta oikoveta jupi rupi yogüɨreko vae re.”Oporogüɨrekoasɨ katu vae reta regua
5Mbaepuere oipota vae oporombotavɨ ko,
kuimbae ipɨapochɨ vae ngaraa oiko avei,
oeka reta ikueraimbae reve, jare oipota ye.
Iyuru, tëogüe-rɨru rami;
yangapɨɨmbae ko, mano rami,
jáeramo oë opɨ̈ro opaete tëtaguasu reta.
6Ërei opaete tëtaguasu oñepɨ̈rogüe
ñeeräño güɨreko retata, jeita chupe reta:
“¡Paravete, oyemboikokatu mbae ambuae pe vae!
¿Kërai yave regua pa remboatɨta mbae oyeeya mbia re vae?”
7Güɨramoiño yogüeruta ndeve mbae iya reta,
opüata nderé jare nde rerɨrɨita rekɨɨye güi,
jare ndereeyata ndepogüɨrai.
8Echa nde repɨ̈ro jeta mbaembae tëtaguasu reta güi,
jáeramo tëtaguasu reta jembɨregüe oyomboatɨta ndekotɨ,
omboepɨuka vaerä ndeve opaete reyukagüe,
nepïrimbae tëta guasu reta re jare pɨpegua reta re vae re.
9¡Paravete, omotɨnɨe jo
mbaembae oñomigüe pe vae,
ombokavi jo oasayepe vaerä ikavimbae güi!
10Jökorai reipɨɨ ñemomarai ndero peguarä jare reyapo
ndeyeupe aeño rekañɨtei vaerä, jeta tëta guasu reta remokañɨtei ramo,
ndeyoa nderekove kotɨ.
11Ita reta tëta guasu oñekëse pɨpe vae reta ave
oñeapota nderé.
12¡Paravete, omopüa tëta guasu
oporoyuka reta vae rupi jare jupimbae rupi vae!
13YandeYa Imbaepuere yae ete vae, mbaeä eteita oyapo ndeparavɨkɨ,
opaete ndeparavɨkɨ okañɨteita tata pe.
14Echa yandeYa iyemboetea regua jërakuata opaete ɨvɨ rupi,
ɨ omotɨnɨe ɨguasu rami.
15¡Paravete, jókuae ombosavaɨpo japicha vae!
¡Paravete, jókuae omee jou jasɨ yae vino vae,
echa ombosavaɨpo, omae vaerä jete inandi oï vae re!
16Nde vi reñemomaraiukata, reguatata osavaɨpo vae rami
reyemboeteuka vaerägüe;
echa yandeYa oiporaraukata ndeve, jare ndeyemboete
oyepoepɨta ñemomarai pe ndeve.
17Ɨvɨtɨ Líbano pe opa remokañɨtei ɨvɨra jare mɨmba vae,
oyerovata ndeve jare rekɨɨyeta mɨmba pochɨ vae güi rami.
Kuae outa reporoyuka jeko pegua,
omboepɨuka vaerä ndeve opaete reyukagüe,
nepïrimbae tëta guasu reta re jare pɨpegua reta re vae re.
18¿Mbaerä pa ikavi jókuae ipöra yae oyeapo vae?
¿Mbaerä pa ikavi jókuae mbae iä oporombotavɨ vaeräño oï vae?
Mbaetɨ ipuere imiari tumpa-raanga, javoi ¿maera pa güɨrovia kuimbae, jembiapo re aeño?
19¡Paravete, ɨvɨra pegua tumpa-raanga pe: “Epa” jei vae
jare ita iñeembae pe: “Epüa” jei vae!
¿Ipuere pa mbae omombeu? ¡Mbaetɨ ko, echa mbaetɨ jekove,
yepe tëi oñeova oro pe jare korepoti pe!
20Ërei yandeYa oï jo ikɨambaea pe:
¡Pekïrii jóvai opaete ɨvɨ pegua reta!
Who We AreWhat We EelieveWhat We Do
2025 by iamachristian.org,Inc All rights reserved.
