SALMOS 18 - Guarani Bible with DC

SALMO 18Yasoropai oñemee oporomoamɨri vae re(2 S 22.1-51)

1¡Roaɨu, cheYa Tumpa!

Chepɨ̈rata nderé vae.

2CheYa, ita guasu cheñepɨ̈roa,

cheñepɨ̈roka,

chereroasayepe vae;

cheTumpa,

chepɨ̈rata nderé vae,

ndereño ayeko vae,

cheyeopiaka,

mbaepuere chereroasayepe vae,

cheñemía ɨvate yae vae.

3Romboeteta cheYa,

jupi ko reyemboeteuka vaerä,

nde chereroasayepeta cherovaicho reta güi.

4Mano chemama rami jɨmasa pe;

¡oporomokañɨtei vae imbaepuere chemongɨɨye yae!

5Omanogüe reta ñogüɨnoia, chemama rami jɨmasa pe,

oñono reta ñuai mano pegua cheve.

6Chepɨatɨtɨ aï yave aenɨi cheYa,

asapúkai cheTumpa pe,

jae oendu cheñee itupao güi.

¡Chesapúkai ojo oväe jae oïa pe, jare oendu!

7Jayave ɨvɨ okana:

Ɨvɨtɨ guasu reta iguapɨka okana,

yandeYa iyarasɨ omokana.

8Tätati oë iñäpɨgua rupi,

tata oporomokañɨtei vae oë iyuru güi,

tätapɨi jendɨ vae oë chugüi.

9Ara reta omoɨ̈vɨi iyeupe jare ogüeyɨ.

Oyembopɨtumimbi jae ipɨ igüɨ pe.

10Opo metei araɨgua querubín re jare oveve,

oveve ɨvɨtu re.

11Iñemikarä oñono pɨtumimbi,

oñemoi pɨpe asoya pe rami,

amapɨtu reta jüu ama okɨta vae rami.

12Jae jembipeasɨ overa iamapɨtu re;

amandau jare tätapɨi jendɨ vae oë iamapɨtu güi.

13YandeYa ombou iñee ara kotɨ güi,

Tuichagüe yae ete vae omoë iñee;

amandau jare tätapɨi jendɨ vae rami.

14Ojäa juvɨ jare opa omoai moai tovaicho reta,

ombou ama-tiriri jare opa omokañɨtei.

15Oyekuaa ɨguasu jugua,

opɨta ikatu pe ɨvɨ iguapɨka reta,

neñeengata rupi cheYa Tumpa,

neäpɨgua rupi nepɨ̈túe remoë vae rupi.

16Ombou ipo ɨvate güi jare chepɨɨ,

cherenoe ɨ tɨpɨ güi.

17Chereepɨ cherovaicho reta imbaepuere yae vae güi,

chemotareɨ vae reta ipo güi,

echa jae reta imbaepuere yae chegüi.

18Opüa reta cheré asusere aï yave,

ërei cheYa chemborɨ.

19Cherenoe jëguambaea pe,

¡chereepɨ, echa ipɨakatu cheré!

20YandeYa omboekovia cheve jupi ayapo rupi,

chereko kavi oime rupi omboekovia cheve;

21echa che aiko yandeYa jemimbota rupi,

¡mbaetɨ ayembosɨrɨ mbaeyoa rupi cheTumpa güi!

22Anoi chepɨa pe opaete iporookuai reta,

¡mbaetɨ apia cheYa iporookuai güi!

23Isɨmbi rupi aiko jae jóvai,

añeñovatu opaete mbae ikavimbae güi.

24Jáeramo, cheYa omboekovia cheve jupi ayapo rupi,

chereko kavi oime rupi omboekovia cheve.

25Iporoparareko vae pe reechaukata ndeporoparareko,

isɨmbi nde, kuimbae jupi vae pe.

26Ikɨambae oiko vae pe reyeechaukata ndekɨambae,

ërei mbaetɨta neɨ̈ro ipɨapochɨ vae pe.

27Echa nde reroasayepeta tëta oiporara vae,

ërei remomichita oyembotuicha vae.

28Nde cheYa Tumpa remee cheve tembipe,

nde remboesape cheve pɨtumimbi vae.

29Ndeporomborɨ rupi amoamɨrita tovaicho,

nde ndive aasata tëta guasu ikësea.

30Tumpa jembiapo ikavigüe yae ko,

yandeYa iñee ikɨambae ko.

¡Yeopiaka ko opaete güɨrovia jese vae pe!

31Echa, ¿oime ye pa ïru Tumpa cheYa Tumpa güi?

¿Oime pa ïru Tumpa ipuere yandereepɨ vae?

32Tumpa ko jae chemomɨ̈rata vae,

jae ombosɨmbi chereko.

33Cheäkua cheapo guasukaka rami,

chemopɨ̈rata jekuaeño ɨvatea rupi.

34Chembopoki ñeraro peguarä,

chemopɨ̈rata amoata vaerä güɨrapa jiero iyu vae pegua.

35Remee cheve yeopiaka ndeporogüɨroasayepe pegua,

ndeakatu pe cheoko,

ndepɨakavi rupi chembotuicha.

36Rembopɨguasu cherape cheve,

jare mbaetɨ apia chugüi.

37Aɨkuemoña cherovaicho reta yave, aupitɨ,

jare opa ayuka yave ayerova ye.

38Ambopere reta yave mbaetɨ opüa ye.

¡Oa reta ɨvɨ re chepɨ igüɨ pe!

39Echa nde chemomɨ̈rata ñoraro peguarä,

remomichi cherovaicho reta cheve.

40Rembotekuarai cherovaicho reta chegüi,

amokañɨtei vaerä chemotareɨ vae reta.

41Osapúkai reta tëi, ërei mbaetɨ kia oepɨ;

yandeYa ave oenɨi reta tëi, ërei mbaetɨ oendu chupe reta.

42¡Amongúiasɨ reta ɨvɨkúi ɨvɨtu opa güɨroveve vae rami!

¡Apɨ̈ro jese reta, tape rupi tuyuapo re oñepɨ̈ro rami!

43Chereroasayepe tëta iñerarose vae güi,

cheñono tëtaguasu reta itenondeguarä.

Tëta aikuaambae yeokuai cheve.

44Oendu reta yave cheregua, oyapo reta cheporookuai,

ketɨgua reta vi chemboete.

45Ketɨgua reta oyembopɨtu,

opa ñogüɨnoe reta iñemika güi.

46¡Toyemboete yandeYa!

¡Toyemboeteuka ita guasu cheñepɨ̈roa!

¡Toyembotuicha cheTumpa chereroasayepe vae!

47Tumpa oyepɨ aiporaragüe re vae,

jare omoamɨri tëta reta cheve,

48chereroasayepe cherovaicho reta güi vae,

jae jekuae chemopüa ou cheve vae reta re,

chereepɨ kuimbae ipɨarai vae reta güi.

49Jáeramo, cheYa Tumpa toromboete opaete vae tëtaguasu reta jóvai

tatairari ndeve.

50Omee che jembiparavo mburuvicha guasu pe, tuicha rupi aporomoamɨri vaerä,

jare mboroparareko,

che David jare cheñemuña reta pe jekuae avei pegua.