1Simón pe jërakua Trifón omboatɨ metei ejército tuicha vae oike vaerä Judea pe opa omboai.
2Oecha yave tëta ipɨandeko jare okɨɨye tuicha oï, ojo Jerusalén kotɨ, joko pe oporomboatɨ,
3jare omoäta ngatu reta körai: “Peikuaa ko peï cherëtara jare cheru iñemuña reta ndive roparavɨkɨ mborookuai jare tupao re vae, jaeramiño vi oreñoraro jare orerembiporara reta.
4Israel re ko omano opaete cherëtara reta, jare añave che ñoete ma apɨta.
5Añave, mbaetɨ etei ma aɨu cherekove aroasayepe vaerä kuae tekorai güi: ¡Cherëtaragüe reta jóvai mbaeä etei ko che!
6Jáeramo, añorarota cherëta re, tupao re, kuña reta re jare pemichia reta re, echa opaetei itumpa ambuae vae reta oñomoïru yandembopaa vaerä.”
7Kuae ñee oendu yave, tëta oñemoäta ngatu ye,
8jare opaete reve osapúkai reta: “¡Nde ko jae oreruvicha, nerëtara Judas jare Jonatán jekovia pe!
9¡Orereroata ñoraro pe, jare nde rerea rupi ore roikota!”
10Jayave Simón omboatɨ opaete ñoraro regua reta, jare jaɨai voiño opa oyapo Jerusalén joguambɨ guasu jare opa kavi omotïi jembeɨ rupi.
11Omondo Jope kotɨ Jonatán, jae ko Absalón taɨ, ejército tuicha vae ndive, joko güi omoë joko pe yogüɨreko vae reta jare jae opɨta joko pe.
Jonatán oyuka reta12Trifón oë Tolemaida güi ejército tuichagüe ndive oike vaerä Judea pe, güɨraja vi jembipɨɨ Jonatán.
13Simón oyembojeyupa ma Hadid pe, ñuu jembeɨ rupi.
14Trifón oikuaa yave Simón oï jëtara Jonatán jekovia pe, jare oïndaivi yae ma oñoraro vaerä jae ndive, omondo ñee jerajaa reta ndive jei vaerä chupe:
15“Tembipɨɨrä rogüɨnoi Jonatán, nerëtara, ipía ramo mburuvicha reta pe, jae oiko yave tuvicharä.
16Jáeramo, embou oreve, tres mil tresciento kilo korepoti jare Jonatán taɨ reta mókoi orerembipɨɨrä, jare roikuaa kavi vaerä vi ropɨta ngaraa ye ma ko opüa oreré vae, jayave ramo royorata.”
17Yepe tëi Simón oikuaa iyapu ko oï chupe vae, omondo ñoi güeruruuka korepoti jare mókoi reve kunumi reta, agüɨye vaerä iñee nguru tëta ikotɨ,
18jare agüɨye vaerä vi güɨramoi Jonatán omano yave omboeko reta mbaetɨ ramo omondo korepoti jare kunumi reta.
19Jökorai, omondo chupe mókoi reve kunumi reta jare tres mil tresciento korepoti, ërei Trifón mbaetɨ oyapo iñee ojäagüe, echa mbaetɨ oyora Jonatán.
20Joko güi Trifón oguata oike vaerä tëta pe jare omboai vaerä, ërei oyere Adoraim rape rupi, echa Simón jare isundaro reta opa jape oyopia chugüi.
21Jökorai yave, sundaro tëta mí Jerusalén pegua reta omondo ñee Trifón pe, ojo vaerä ikotɨ reta ñuu rupi ɨmambae pegua jare omondo vaerä chupe reta tembíu.
22Trifón omboyupavo kavayu regua reta yogüɨraja vaerä jokotɨ, ërei jókuae pɨ̈tu oa mbatee iroɨ ramo mbaetɨ ojo oväe reta. Jayave oñemoaña Galaad kotɨi.
23Oya mí ma ojo Bascama kotɨ yave, oyuka Jonatán, joko pe oñotɨ reta.
24Joko güi Trifón oyerova ye jëta kotɨ.
25Simón omondo güeruruuka jëtara jetegüe jare oñotɨ Modín pe, tamɨigüe reta jëtagüe pe.
26Opaete Israel oäpiroasɨ katu, mbovɨ ara rupi.
27Simón omopüa tu amɨri jare jëtara reta jɨvɨa re, ita guasu tuicha vae oñeopa jova jare ikupe kotɨ reve vae, opaete vae oecha vaerä.
28Omopüa vi chiu pirámide mókoi jɨsɨ, tu peguarä, ichɨ jare irundɨ jëtara reta peguarä.
29Ipoki reve oimama oguambɨ pe kuae pirámide reta, jare iárambo oñono yeopiaka jare tembiporu reta, agüɨye vaerä kia iñakañɨ chugüi. Yeopiaka jare tembiporu reta iyɨpɨ rupi oyapo ɨ rupigua guataka reta iä, opaete ɨguasu rupi oguata vae reta oecha vaerä.
30Kuae ita tëogüe rɨru pegua oyeapo Modín pe vae oime vɨteri oiko añave rupi.
Iñɨ̈ro oyoupe Demetrio II ndive31Trifón oyeapa taɨrusu vae mburuvicha guasu Antíoco re, oyuka
32jare jae oguapɨ jendagüe pe, oñono iñäka re äka-regua Asia pegua. Jeta pɨ̈chɨi vae oyapo jókuae tëta pe.
33Simón omopüa pɨau ye ñepɨ̈roa reta Judea pegua, oñono iyeopiakarä o ɨvate reta, oguambɨ tuicha vae, oke jëguambae vae jare oeya tembíu reta joko pe.
34Oiparavo ñee jeroataa reta jare omondo mburuvicha guasu Demetrio kotɨ, oiporu vaerä chupe oyora impuesto imboepɨ güi, echa Trifón opa ma mbae opɨ̈ro chugüi reta.
35Mburuvicha guasu Demetrio, omondo kuatía rupi ñee chupe körai:
36“Mburuvicha guasu Demetrio omondo tamaraeme sacerdote juvicha Simón pe, mburuvicha guasu reta ivɨaka, arakuaa iya reta jare judío reta jëta guasu pe.
37Ou oväe cheve äka-regua oro pegua jare ñanaroo pembou cheve vae, jare chekɨ̈reɨ yandepɨakatu ete oyoupe, jare ambaekuatiata oparavɨkɨ vae reta pe, agüɨye vaerä oiporu peve impuesto reta.
38Oñemoañete opɨta opaete yemongeta reta yayapo pe ndive vae, jare jekuaeño opɨta pepo pe opaete ñepɨ̈roa reta peyapogüe.
39Cheɨ̈ro vi pembaeyavɨ jare jupimbae vae peyapo peyu peiko vae re. Cheɨ̈ro peve impuesto mburuvicha reta imbaeyekou pegua pepia cheve vae re. Agüɨye yé toyemboepɨ oipotagüe impuesto oyemboepɨse Jerusalén pe vae.
40Oime yave pegüi reta ikɨ̈reɨ oñemoapɨta chesundarorä, toñemoapɨtaño, jare yandepɨakatu mo oyoupe.”
41Año ciento setenta pe, Israel oyeyora itumpa ambuae vae reta ipo güi,
42jayave güive kia ombaekuatía yave omboɨpɨ jembikuatía körai: “Simón iaño tenondegua pe, sacerdote ruvicha guasu, sundaro jare judío reta juvicha.”
Gezer pe oike reta43Jókuae ara rupi, Simón opüa Gezer re jare oikëse isundaro reta pe. Oyapo metei o ɨvate okua jese vaerä, omboya katu tëta re, omondoro oguambɨ guasu o ɨvate ipäu rupi, jare oike jókuae tëta pe.
44Jókuae o ɨvate iyapɨte re ñogüɨnoi vae reta oike jókuae tëta pe, jare maiña oporombokepegua reta,
45jókuae tëtaɨgua reta oyeupi oguambɨ guasu iyapɨte re jembireko jare imichia reta ndive ñavo, jemimonde omondoro reve, jare jäsémbai reve oyembogüɨ reta Simón jóvai,
46jei reta chupe: “¡Agüɨye eyapo mbae oreve orembaeyavɨ rami, eiparareko emae oreré!”
47Simón omboyoupíe yemongeta jae reta ndive jare opoi chugüi reta. Ërei opa güɨnoe jókuae tëta güi jare oikɨayoe o reta tumpa-raanga jenda, joko güi oike jókuae tëta pe oyemongoi jare ombaemboete reve.
48Güɨnoe joko güi opaete mbae ikɨagüe, jare oñono kuimbae reta tembiokuai iyapoa; omotiɨ reta tëta guasu jare oyapo jorä joko pe.
Tëta mí Jerusalén pegua opɨ̈ro reta49Sundaro reta ñogüɨnoi tëta mí pe vae mbaetɨ ramo ipuere oë ikatu kotɨ ani oike yepe japɨpe pe, mbaetɨ ramo ipuere vi ombaegua ani omaemee, omboɨpɨ reta ikaruai tuicha, jáeramo jeta omano reta.
50Jayave oiporu reta Simón pe imiari vaerä këraita ko ipɨta reta oyembogüɨ jóvai yave, jae ikɨ̈reɨ chupe reta; jaema opa güɨnoe reta joko güi oikɨayoe vaerä jókuae tëta mí opaete mbae ikɨagüe güi.
51Ara veintitré mokoía yasɨ pe, año ciento setenta y uno pe, oike Simón jókuae tëta mí pe yemongoi mbaemboete pegua ndive, ñanaroo ndive, jare ombopu reta arpa, platillo jare arpa raɨ, okäta reve, echa Israel oyeyora tovaicho yavaete vae reta güi.
52Simón oporookuai ara ñavo oyemboete vaerä yerovia ndive jókuae ara. Omotïi tupao iyapɨte tëta mí kotɨ oï vae, jare oñemoëta joko pe jupiegua reta ndive.
53Simón oecha yave taɨ Juan okuakuaa ma, ombojee sundaro ruvicharä opaetei ejército reta pe, Gezer pe.
Who We AreWhat We EelieveWhat We Do
2025 by iamachristian.org,Inc All rights reserved.
