2 MACABEOS 11 - Guarani Bible with DC

Lisias ndive ñoraro(1 Mac 4.28-35)

1Ndei ɨma ete mbove, Lisias, jae ko mburuvicha iyangarekoa jare ichëi vi, oyemoambeko yae jókuae oasagüe re;

2omboatɨ ochenta mil kuimbae ɨvɨ rupigua reta jare vi opaetei kavayu regua reta jare oporopeña reta judío reta re. Jae reta iyemongeta jae ko oyapo vaerä Jerusalén, griego reta jëtara.

3Jae reta ikɨ̈reɨ ombaemboepɨuka tupao pe, ïru tëtaguasu pegua reta rupi tupao reta ombaemboepɨ rami, jare ikɨ̈reɨ vi jae reta rami año ñavo kia ipuere oyeapo sacerdote tenondeguarä korepoti rupi.

4Ërei mbaetɨ oyeko Tumpa imbaepuere re, jaeño oyeko isundaro reta ɨvɨ rupigua jare kavayu regua jeta yeyé vae re jare ochenta elefante güɨnoi vae re.

5Oike Judea rupi, oyemboya Bet-sur kotɨ, jare ñepɨ̈roa oï veinticinco kilómetro Jerusalén güi vae, joko güi omboɨpɨ okua jese.

6Macabeo jare isundaro reta oendu yave Lisias okua oï ñepɨ̈roa re, oyomboatɨ reta opaete tëta ndive, jare iyaeo reve oiporu reta yandeYa pe ombou vaerä araɨgua oepɨ Israel.

7Macabeo räri oipɨɨ tembiporu, jare omoäta ngatu opaete vae agüɨye vaerä okɨɨye jare oë vaerä omborɨ jëtara reta. Opaete vae ikɨ̈reɨ ngatu reve omboɨpɨ oguata.

8Jerusalén oyaro ma yave, oyekuaa sundaroäpɨta jenonde, metei kavayu regua jemimonde tïiasɨ vae jare ipo pe güɨraja tembiporu oro pegua.

9Jayave opaete vae omboete Tumpa iporoparareko vae, jare oñemoäta ngatu reta okua vaerä, mbaetɨ kuimbae reta reño, jaeramiño vi opaete mɨmba jesaete vae jare oguambɨ korepoti pegua re ave.

10Oguata reta oñesɨro reve, jókuae iyeepɨka araɨgua ndive jare Tumpa iporoparareko ndive.

11Oporepeña reta yagua jovaicho re oporepeña rami, omboyoa reta ɨvɨ rupi once mil sundaro ɨvɨ rupigua jare mil seiciento kavayu regua reta, ïru reta opa otekuarai.

12Osɨi vae reta opa yogüɨraja ipere reve jare jembiporu mbae. Lisias otekuarai vi imara reve.

Oyeapo mbɨakatu judío reta ndive(1 Mac 6.55-63)

13Ërei Lisias oyembopɨarakuaa, jare oyemongeta iñamɨri vae re, jare oecha hebreo reta mbaetɨ kia ipuere jese echa Tumpa imbaepuere yeyé vae omborɨ reta ramo. Jayave omondo ñee jeroataa reta,

14oeka vaerä iñɨ̈ro oyoupe, jare omondo jei chupe jupi reta oñochëi vaerä mburuvicha guasu ndive.

15Macabeo, oeka ramo teko kavi, ipöra chupe kuae Lisias iyemongeta, jare mburuvicha guasu oyapo Macabeo oiporu Lisias rupi judío reta peguarä vae.

16Tupapire reta oikuatía Lisias judío reta pe vae jei körai:

“Lisias omondo tamaraeme judío reta pe,

17Juan jare Absalón, peremimondo reta, omee cheve tupapire ɨ́vɨkotɨ oyekuatía oï vae, jae reta oiporu cheve chepɨakatu vaerä joko pe jeigüe re.

18Che chemiari mburuvicha guasu pe peiporu chupe vae re, jare chepo pegua reta amboasa chupe.

19Jeiete yave pe reta peechauka kɨ̈reɨ ngatu tëta jembiapo re, che aekata peiko kavi vaerä kuri.

20Ayókuai peremimondo jare chembae reta ipɨa oyoupíe vaerä.

21Ikaviño pekua.

Veinticuatro ara ma Dióscoro iyasɨ re año ciento cuarenta y ocho pe.”

22Mburuvicha guasu itupapire jei körai:

“Mburuvicha guasu Antíoco omondo tamaraeme jëtara Lisias pe.

23Añave cheru ojo ma oiko tumpa reta pɨri ramo, aipota opaete cheɨvɨ pegua reta yogüɨreko kavi, oyemoambeko vaerä jembiapo rei.

24Ërei aendu judío reta mbaetɨ oipota yogüɨreko griego reta jeko rupi, cheru amɨri oipota rami, jae reta ikɨ̈reɨ yogüɨreko ipɨapotaa rupi, jáeramo oiporu yogüɨreko reta jembiokuai guasu jeia rupi.

25Aipota vi jókuae tëtaguasu oikopɨagüive, jáeramo aporookuai oñemee ye vaerä chupe reta itupao jare ipuere vaerä yogüɨreko iñemuñagüe rami.

26Eyapo ikavi vae jare eyókuai kia reta yogüeru vaerä ipɨakatu oyoupe, yogüɨreko pɨagüive vaerä mo jare oyemoambeko vaerä mo jembiapo rei, che jökorai vi aipota yogüɨreko reta.”

27Tëta judío pe mburuvicha guasu oikuatía vae jei körai:

“Mburuvicha guasu Antíoco omondo tamaraeme arakuaa iya reta pe jare tëta judío pe.

28Ikaviño peï opaete vae; che kuae pe ikaviño vi aï.

29Menelao imiari cheve pe kërai peyerova ye perëta kotɨ vae re,

30jáeramo, cheɨ̈rota opaete oyerova ara treinta Xántico yasɨ pe vae reta pe.

31Judío reta ipuere jou jembíu reta jare yogüɨreko iporookuai guasu rupi, ngaraa ye ma kia omoambeko reta tenondegua imbaeyavɨ re.

32Amondo vi Menelao, agüɨye vaerä mbae oasa peve.

33Pekua kavi.

Quince ara ma Xántico yasɨ re jare año ciento cuarenta y ocho pe.”

34Romaɨgua reta omondo vi tupapire judío reta pe körai:

“Quinto Memio jare Tito Manio Roma jekovia pe imiari vae reta, omondo tamaraeme tëta judío pe.

35Lisias, mburuvicha guasu jëtara, omee peve vae re, orepɨakatu vi jese.

36Ërei peyemongeta kavi pemiari vaerä mburuvicha guasu ndive, jae jei peve rami, jare pembou ɨmambaeño orekotɨ peremimondo, ore romborɨ vaerä oremiari mburuvicha guasu ndive peveguarä, echa jaema rojo Antioquía kotɨ.

37Jáeramo peraɨaiño pembou peremimondo reta, roikuaa vaerä mbae ko peyemongeta vae.

38Pekua kavi.

Quince ara ma Xántico yasɨ re jare año ciento cuarenta y ocho pe.”