ECLESIÁSTICO 32 - Guarani Bible with DC

1Metei aretea pe neñono reta tenondeguarä yave, agüɨye eyembotuicha;

ei ïru vae reta ndive oipotagüe ramiño.

Eyemoambeko jese reta agüɨye nde räri ekua eguapɨ mesa pe;

2emae mbae oipota oï vae reta re, jare joko güi ramo nde eguapɨ.

Jökorai nde ndepɨakatuta ndeporomboete renoi ikotɨ reta ramo,

jaema imiari kavi retata ndekotɨ ndeporomboete vae re.

3Nde rekuakuaa yae ma ko yave, oime nemiari vaerä;

ërei nemiari ndearakuaa katu reve jare agüɨye yemongoi emombɨtauka.

4Vino oyeu oïa pe agüɨye puku nemiari,

jare agüɨye ndearakuaa katu eyeapo iarambae reve.

5Aretea pe yemongoi reta

mbae jepɨ vae rubí oyea oï oro ndive vae rami ko.

6Temimbɨ reta ipu yave vino jee ngatu oyeu reve

esmeralda oyea oï oro ndive vae rami ko.

7Ërei ndetaɨrusu ko yave, nemiari oime nemiari vaerä yave

jare nemoñera reta ko mókoi ani mboapɨa ma yave.

8Eiparavo ndeyemongeta reta javoi ere jeta vae rami mbovɨ ñee peño;

eyeapo mbae oikuaa katu yae vae rami ërei nekïriiño epɨta.

9Okuakuaagüe reta ipɨte pe agüɨye eyembotuicha,

jare eporoaporai mburuvicha reta ndive.

10Aravera jaɨkue ko ou amandau,

jare kia oiko ikoiño vae oiparareko ko ïru vae reta.

11Reyupavo ma yave agüɨye ɨma ei,

yepe oime ïru mbae oata ndeve;

12ekua nerëta pe jare joko pe eyapo nde reipotagüe,

Tumpa remboete reve jare rembaeyavɨmbae reve.

13Jare opaete jókuae reta re emboete ndeApoa,

nemotɨnɨe mbaembae pe vae.

Yembosɨmbi jare ñemae ngatu

14Kia Tumpa oeka vae outa ko chupe arakuaa,

jare kia okeä ojo oparandu chupe vae oikuaata ko mbae.

15Kia ñavo mborookuai oeka vae, oväeta ko chupe;

ërei kia iñakañɨ chugüi vae oyepɨɨukata ko chupe.

16Kia ñavo Tumpa omboete vae oikatuta ko isɨmbi rupi oiko

jare oesapeta ïru vae reta pe iporomboe rupi.

17Jeko kavimbae pe ngaraa ipöra emboeta,

jare oyapo mborookuai jae ipɨapotaa rupi.

18Iyarakuaa vae ngaraa oikuaku iyarakuaa,

ërei iyarakuaambae ngaraa oyopiauka.

19Ndei mbae reyapo mbove, eyemongeta kavi räri,

jayave ngaraa reyembopɨaä reyapo vae jaɨkue rupi.

20Kia pe ñuai oïa rupi agüɨye ekua,

jare agüɨye mókoi ye eyererokua jókuae re yeño.

21Metei guata pe agüɨye erovia ngaraa kia opoko nderé vae,

22jare eyeandu kuri outa vae güi.

23Opaete mbae reyapo vae pe emae ngatu ndeyeupe,

echa opaete jókuae reyapo yave reyapo rei mborookuai reta.

24Kia ñavo mborookuai oyapo vae jaeiño ko oyeopia oï,

jare kia ñavo Tumpa re güɨrovia vae ngaraa oñeväe itavɨ ko vae.