ESTER (gr) 2 - Guarani Bible with DC

Ester oyeparavo mburuvicha kuñarä

1Mbovi ara jaɨkue rupi, mburuvicha guasu ipɨa oï kavi ye; ërei omondo ye oeka Astin, imaendúa ramo jae mbae jeigüe vae re jare kërai jae oyepopeyu ko jese vae re.

2Jaema iyɨvɨrigua reta jei chupe:

—Ikavi ko oyeeka mburuvicha guasu pe kuñatai reta ndei kuimbae oikuaa vae jare ikavigüe vae.

3Jare mburuvicha guasu tombojee kia tomondo opaete tëta oï iɨvɨ japɨpe rupi vae rupi, jare opaete oväegüe güeru vaerä mburuvicha kuña iporookuaía pe mburuvicha guasu oime güɨnoi Susa tëta pe vae pe, jare joko pe oyangareko vaerä räri oï jese reta kuimbae mburuvicha guasu güɨrovia katu vae jare oime vi kuña reta iyangarekoa aeño oï vae. Jare topoko tomopöra reta,

4jare oime yave kia nunga kuñatai ipöra ko mburuvicha guasu pe vae toyembojee oiko vaerä mburuvicha kuñarä Astin jekovia pe.

Jare jókuae yemongeta ipöra mburuvicha guasu pe, jare jökorai oyeapo.

5Susa tëta pe oiko metei judío Mardoqueo jee vae, Jair taɨ jae ko Simei jare Cis iñemuña jare Benjamín jëtaɨgua.

6Jókuae Mardoqueo jae ko metei judío jeta ïru vae reta ndive mburuvicha guasu Nabucodonosor güɨraja tembipɨɨrä Jerusalén güi vae.

7Jae güɨreko iyé metei kuñatai, Aminadab tayɨ, jae ko itutɨ ma tu rupi, jare jae omboeuka, tu reta opa omano chugüi yave, jare jae güɨreko vaerä kuri. Jae ko jee Ester, kuñatai ikavigüe vae.

8Jaema mburuvicha guasu iporookuai jërakua yave, jeta ko oyemboatɨ kuñatai reta mburuvicha iporookuaía pe Susa tëta pe, Gai ipo pe, jae ko joko pe kuña reta iyangarekoa oiko vae. Jókuae ipɨte pe oime oï Ester.

9Jókuae kuñatai täta ipöra Gai pe jare oaɨu omae jese, jare jaemai opoko oyangareko jese omongaru kavi vaerä; oñono ipo pe chiu tembiokuai reta jókuae mburuvicha iporookuaía pegua, jaema jese jare opaete tembiokuai reta reve täta ko oyangareko kavi jókuae mburuvicha kuña iporookuaía pe.

10Ester mbaetɨ etei mbae jei iñemuña reta regua, echa jökorai jei chupe Mardoqueo agüɨye vaerä mbae jei.

11Jaema Mardoqueo opa ara rupi ko opoko oyevɨ yevɨ oguata oiko mburuvicha kuña iporookuaía joka rupi, oikuaa vaerä këraita ra ko oï Ester vae.

12Echa opaete vae ko kuñatai reta oñono güɨnoi oyembokavi vaerä vae pe, jae ko doce yasɨ jökoraita yogüɨreko. Tenondegua ova yasɨ pe jae ko jete re oipichɨ aveita mirra ikɨragüe, jare ïru ova yasɨ jaɨkue rupigua re oñono retata iyé yembopichea jare crema kuña reta oiporu vae. Jare opa ma jókuae oyeapo chupe reta yave, metei ñavo kuñatai reta oyoaɨkue ikueta ojo oyeechauka mburuvicha guasu pe,

13jare oñemee chupe reta opaño mbae jae reta oipotagüe güɨraja vaerä mburuvicha kuña iporookuaía güi ïru vae mborookuai tenondegua vae oïa pe.

14Kaaru yave rupi ojo mborookuai tenondegua vae oïa pe, jare pɨareve pe ndeimbove yave oasa ïkotɨa mburuvicha kuña reta iporookuaía renda pe, Gai oyangareko jese reve, jae ko mburuvicha guasu güɨrovia katu yae vae jare jae vi kuña reta iyangarekoara oiko vae; jókuae jaɨkue rupi mbaetɨ ye ma ojo oyeechauka vaerä mbuvicha guasu pe, jae etei omondo ye oekauka regua.

15Jaema Ester, Aminadab tayɨ, jae ko Mardoqueo iyetipe pe, ou oväe ojo ye vaerä oyeechauka mburuvicha guasu pe yave, mbaetɨ etei mbae oeya oyapo vaerä Gai jei chupe rami, jae ko kuimbae mburuvicha guasu güɨrovia katu yae vae jare jae vi kuña reta iyangarekoarä oiko vae. Jökorai yave, Ester re opaete vae ma ipɨakatu omae vae.

16Jare Ester ojo oyeechauka mburuvicha guasu Artajerjes jóvai doce yasɨa pe, Adar iyasɨ re, chiu año ma oiko mburuvichara yave.

17Jare mburuvicha guasu oipota omae Ester re, jare jae oipoaravo opaete vae ïru vae kuñatai reta güi, jare oñono jese mburuvicha kuña iñäka-regua.

18Jupiveiño, omboarete vaerä imenda Ester ndive, oyapo metei arete chiu ara pegua vae, jare oparea opaete ivɨaka reta pe jare ïru vae mburuvicha reta pe, jare ombogüeyɨ ikovara impuesto regua vae iɨvɨ ipo reta pe.

Mardoqueo oikuaa metei yemomburu mburuvicha guasu regua vae

19Mardoqueo oyeokuai oiko mburuvicha iporookuai pe.

20Jare Ester, oyapo oiko Mardoqueo jei chupegüe vae, mbaetɨ kia pe imiari ketɨgua ko jae vae. Echa jae Mardoqueo ipo peño oiko yave, jae jei yepi chupe Tumpa omboete vaerä jare oyapo vaerä jae mborookuai reta omeegüe vae, jare jae jókuae ndive oiko.

21Jaema kuimbae reta mburuvicha guasu güɨrovia katu vae reta jare jae iyangarekoa ruvicha reta opa iyarasɨ Mardoqueo kotɨ oyeupi vae re, jare oyemongeta reta mburuvicha guasu Artajerjes oyuka vaerä.

22Jare Mardoqueo oikuaa jókuae yemomburu yave imiari mburuvicha kuña Ester pe, jare omombeu mburuvicha guasu pe.

23Jaema mburuvicha guasu oeka oparandu jókuae mókoi kuimbae güɨrovia katu vae reta pe, jare opa oyuvɨuka reta. Jupiveiño omondo jei tembikuatía rɨru pe oñeñono vaerä Mardoqueo iporomboete regua jare oyekuaa vaerä joko pe mbae ko oyapo chupe vae re.