ISAÍAS 59 - Guarani Bible with DC

Israel oiporara iyoa re

1YandeYa mbaetɨ ko ipo ombosɨrɨ,

mbaetɨ vaerä oporogüɨroasayepe,

mbaetɨ ko oyopia iyapɨsa,

mbaetɨ vaerä oendu.

2Ërei peyoa reta pemboyao peTumpa güi,

peyoa reta oñovauka Tumpa jova pegüi,

agüɨye vaerä oyeapɨsaka peré.

3Echa pe reta peporoyuka vae ko,

jare pepo reta tugüɨ yepeai,

peapu jare pere ñee ikavimbae.

4Mbaetɨ kia oñeapo jupi rupi,

mbaetɨ vi kia oporojäa añetegüe rupi.

Güɨrovia katu reta apu re,

jare ñee añetembae re;

ipurúa reta rami ikavimbae pe,

jare omoë reta mbaeyoa.

5Pemboyauka mboi jupiagüe,

jare peñope ñanutirapaa;

kia jou jókuae mboi jupía vae omano,

jare kia oumbiri yave jókuae mboi jupía,

mboi raɨ oëta chugüi.

6Jókuae ñanutirapaa mbaetɨ ikavi temimonderä;

mbaetɨ kia ipuere oyemonde pɨpe.

Opaete perembiapo reta yoyuka yepeai,

pemaepɨ̈ro vaeräño peiko.

7Pesɨi katu ikavimbae kotɨ,

peo vaerä peyuka jekombae vae jarembae pegua,

peyemongeta reta ikavimbae reño,

peiko peporomokañɨtei vaeräño.

8Mbaetɨ peikuaa mbɨakatu re,

mbaetɨ vi peiko jupi rupi.

Pereko reta ikaviä etei;

jókuae rupi yogüɨreko vae, mbaetɨ oväe mbɨakatu.

9Isaías jei: Jáeramo osɨrɨ yandegüi jupi vae,

mbaetɨ ou yandeve isɨmbi vae;

ñaäro tëi tembipe, jaeño oime yandeve pɨtumimbi;

ñaäro tëi jembipe katu vae, ërei yaguata pɨtumimbi rupi.

10Yapovɨvɨ yaguata jesambae rami,

ñanepɨ̈sa yeyuka ara pe, pɨ̈tu yave rami;

yaiko pɨtumimbía pe, tëogüe reta rami.

11Opaete yande reta ñanepüae, oso ipüae rami,

ani pɨkasu ipüae rami;

ñaäro tëi jupi vae, ërei mbaetɨ oväe;

ñaäro tëi yeyora, ërei osɨrɨ yandegüi.

12Echa orembaeyoa jeta yae ndekotɨ,

oreyoa aeño oñeapo oï oreré;

echa ore ndive oï oreyoa reta,

roikuaa ikavimbae royapo vae.

13Nde oreYa oreokuai tëi vae mbaetɨ royapo jare oreapu ndekotɨ,

jare rosɨrɨ nde oreYa Tumpa güi,

royangao jare royembopɨapochɨ,

orepɨa güi oë oreapu vaerä.

Roporombotavɨ vaerä.

14Jupi vae rogüɨröɨro,

sɨmbi vae osɨrɨ oregüi,

añete vae rombosɨrɨ oreyeugüi oka guasu pe,

jare mbaetɨ oime mboromboete.

15Añete vae mbaetɨ etei ma,

ikavimbae güi oyembosɨrɨ tëi vae,

oñeñono tembipɨɨrɨru pe.

Nde oreYa pe mbaetɨ ikavi jókuae,

reecha yave mbaetɨ etei jupi vae.

16Jare yandeYa ipɨakañɨ,

oecha yave mbaetɨ kia oyapo kavi kuaekuae;

jayave jae etei oyapo imbaepuere rupi,

jare oporomoamɨri.

17Oyemonde jupi vae pe,

jete regua temimonde ñeraro pegua pe rami,

jare oyemonde mborogüɨroasayepe pe,

äka-ɨru ñeraro pegua pe rami,

yepɨse pe oyemonde, temimonde pe rami,

jare oñeova arasɨ pe,

ñeapevaka pe rami.

18YandeYa omboepɨukata metei ñavo pe, jeko ae re,

oiporaraukata jovaicho reta pe.

Imotareɨa reta pe omboepɨukata jeko oï rupi;

tëtaguasu reta ɨguasu jembeɨ rupigua reta pe ave.

19Opaete ɨvɨ, kuaraɨ oëa kotɨ güive kuaraɨ oikea kotɨ,

omboeteta yandeYa oecha yave iyemboetea.

Echa yogüeruta tovaicho reta, ɨ ɨ̈aka rupi

tuichagüe ou rami.

Ërei yandeYa oñemopüata chupe reta.

20Outa Oporoepɨ vae Sión pe,

jare opaete Jacob iñemuña reta oeya iyoa vae pɨri.

Jökorai yandeYa jei.

21YandeYa jei:

“Kuae jae cheporogüɨrökuavee päve ayapo pe reta ndive vae,

chembaepuere jare cheporomboe

ngaraa oata peve jare peñemuña reta pe.”

Jei yandeYa jekuae avei pegua.