ECLESIÁSTICO 44 - Guarani Bible with DC

Yemboete arakae vae reta regua

1Ambotuichata kuimbae jeko kavi vae reta,

yandetenondegua reta iara ara ae vae reta.

2Ɨvate ete pe oï vae omee chupe reta yamboete reta

jare ombotuicha reta arakae güive ma.

3Mburuvicha guasu reta oporookuai ɨvɨ pe vae,

kuimbae reta mbae tuicha vae oyapo vae rupi jërakua vae,

oporomboarakuaa vae reta arakuaa pe tɨnɨegüe vae,

ñeemombeúa reta opaete mbae oecha vae,

4tëta guasu ruvicha reta arakuaa pe tɨnɨegüe vae,

mburuvicha reta mbae tuichagüe re oyemongeta vae reta,

ipoki oyemongeta vae reta jare tembikuatía oyapo vae reta,

ñeepöra iyapoa reta pɨare rupi oyemboe vae reta,

5yemongoi iyapoa reta, iparavɨkɨ jei rami oyapo vae reta,

mbaekuatía regua reta imbaekuatía rupi oñono iyarakuaa vae,

6kuimbae oikokatu vae reta jare tätagüe reta,

yogüɨreko pɨagüive jo rupi vae.

7Opaete oyemboeteuka iyavei oiko vae reta pe vae

jare iara pe opaete vae omoërakua vae.

8Amogüe oeya jee tuichagüe vae

taɨ reta re oiko vaerä oiko.

9Jare oime vi ïru vae reta mbaetɨ ma kia imaendúa jese vae,

jekove opa yave jaema opaetei vae,

oikove reta oiko yave mbaetɨ oiko rami vae,

joko güi taɨgüe reta jökoraiño vi oasa.

10Ërei jókuae reta, ambuaeyee, jae reta kuimbae iporoparareko vae,

jaema jae reta iporoäro mbaetɨta iyapɨ.

11Imbaembaegüe reta oikota oiko taɨgüe reta ndive,

jare jɨmɨminogüe reta pe oyemombeuta vi mbaembae oeyagüe vae.

12Iñemoïru jupi rupi jeko pegua, oimeño yogüeru yogüeru iñemuña reta,

jare jese reta oiko ye jaɨkue rupi yogüɨreko vae reta.

13Yemomaendúa jesegua oikota ko oiko,

jare ikavi vae oyapogüe güi ngaraa iñakañɨ vae.

14Jetegüe oñeotɨ ko ikavi rupi,

jare jesegua jërakua vae ngaraa ma opa.

15Oyemboatɨ vae reta omboeteta ko jae iyarakuaa,

jare tëta reta omoërakuata jesegua mbaemboete.

Henoc jare Noé

16Henoc oiko Tumpa jemimbota rupi,

jare oeya jeko ñamomoe vaerä opaete taɨkuegua reta pegua.

17Noé ko jupi vae jare ikɨambae vae;

maemegua ou yave, jae ombopɨau opaete oikovegüe reta.

Yasoropai chupe omanopambae opɨta vae re,

jare Tumpa oyapo jae ndive metei ñemoïru, omboasa maemegua;

18mbaemboyekuaa opambae pe oñemomee ete chupe

ngaraa ye vaerä ma oyapo maemegua opaete oikove vae reta pe vae.

Abraham, Isaac jare Jacob

19Abraham jae ko tëta reta jeta vae tu;

jae mbaetɨ ete ko oyemongɨa.

20Oyapo ɨvate ete pe oï vae jeigüe vae

jare oyapo metei ñemoïru.

Jete ae re omboyekuaa ñemoïru oyapogüe vae,

jare Tumpa ojäa yave, jae oechauka iporogüɨrovia.

21Jókuae ramo Tumpa güɨrökuavee chupe añetegüe rupi

iñemuña reta rupi oiko kavita tëta guasu reta,

omboetata ɨvɨkúi rami,

jare iñemuña reta oikota yasɨtata reta rami,

jare imbaeyekou reta güɨnoita ɨguasu embeɨ güi ïru ɨguasu pe iyapɨta,

Éufrates ɨ̈aka güi ɨvɨ jembeɨ rovaicho rupi iyapɨta.

22Isaac pe jökorai vi güɨrökuavee

tu Abraham pe oyapo rami.

23Omombeu chupe ñemoïru tenonde oiko vae regua,

jare jökorai opɨta vaerä Israel re oiko kavi vaerä re.

Tumpa omombeu chupe jae ko taɨ tenondegua vae,

omee chupe imbaeyekou reta

jare oñono oiko vaerä payandepo mókoi iarambogua tëta reta,

metei ñavo iɨvɨ ndive.