SALMOS 50 - Guarani Bible with DC

SALMO 50Tumpa ojäata ɨvɨ pegua reta

1YandeYa, Tumpa imbaepuere tumpa-raanga reta güi vae, imiari;

oenɨi opaetei ɨvɨ pegua reta.

2Sión, ipöra yae vae güi Tumpa oyemboyekuaa.

3Outa ñaneTumpa, ërei ngaraa kïriiño ou;

jenonde outa tata oporomboai vae,

iyɨ́vɨri rupi, ɨvɨtuai imbaepuere yae vae.

4Oenɨita ara jare ɨvɨ,

jóvai reta ojäa vaerä tëta imbae vae:

5“Pemboatɨ cheve tëta chembae vae,

morogüɨrökuavee päve oyapo che ndive

mɨmba oyeyuka oñemee vae rupi vae.”

6Jare ara reta omombeuta jupi ko vae,

echa Tumpa jae ko oporojäa vae.

7“Eyeapɨsaka tëta chembae, chemiarita;

eyeapɨsaka tëta Israel, amoërakuata mbae ndekotɨ.

¡Che ko jae neTumpa!

8Ngaraa amboeta ndeve mɨmba oyeyukagüe re,

jare mɨmba oyeyukagüe opaetei oyeapɨ vae

remee avei cheve vae re.

9Ngaraa aeka ndeve toro taɨrusu vae nderɨmba pɨte güi,

kavara kuimbae ave ngaraa aeka nderɨmba rókai güi,

10echa chembae ko opaete mɨmba ñana rupigua,

jökoraiño vi opaete mɨmba reta ɨvɨtɨ rupigua;

11chembae ko opaete ɨvɨtɨ rupi oveve vae,

jare opaete oikove kaa rupi vae.

12Cheyɨmbɨaɨ yave, ngaraa amombeu ndeve,

echa ɨvɨ chembae ko, jare opaete pɨpegua.

13¿Jau yera toro isoogüe,

ani aaɨu yera kavara kuimbae jugüɨgüe re?

14¡Emee mbaemboete che neTumpa pe;

embopo reñererökuavee vae Tuichagüe yae vae pe!

15Jare eyerure cheve ndepɨatɨtɨ yave;

che roepɨta jare nde chemboeteta.”

16Ërei jeko kavimbae pe Tumpa jei:

“¿Kërai pa nde ndepuere nemiari cheporookuai reta re,

jare remombeu cheporogüɨrökuavee päve?

17Echa mbaetɨ reipota rombosɨmbi

jare mbaetɨ reendu cheñee reta.

18Imonda vae reecha yave reo jupíe;

¡reñemoïru menda re oyuvanga vae reta ndive!

19Ndeyuru reñono ikavimbae peguarä

jare nekü oporombotavɨ vaerä.

20Nemiari kaviä avei nerëtara kotɨ.

¡Ndesɨ imembɨ kotɨ rere mbae ikavimbae!

21Opaete kuae reyapo,

ërei che chekïriiño;

nde reyemongeta, che nde ramiño.

Ërei che amboetata ndeve,

¡jaeta ndeve nderova pe etei!”

22“Peikuaa kavi kuae, pe reta peakañɨ Tumpa güi vae,

agüɨye vaerä opa pombojaɨ jaɨ, javoi mbaetɨ kia pereepɨ vaerä;

23mbaemboete omee cheve vae, chemboete ko.

Jupi rupi kavi oiko vae pe,

aechaukata cheporogüɨroasayepe.”