1CheYa, asapúkai ndeve,
¡eyu jarembae chekotɨ!
¡Eyeapɨsaka cheñee re roenɨi yave!
2Cheyeyure tojo nderóvai ikäti kavi vae incienso rami,
jare chepo aupi vae, kaaru yave mbota oñemee ndeve vae rami.
3CheYa Tumpa, eñono cheyuru iyangarekoarä;
eyangareko cheyuru re.
4Agüɨye emaeño tayemongeta ikavimbae re;
agüɨye emaeño tayapo jupimbae iyoa vae reta ndive,
agüɨye takaru jae reta ndive iarete pe.
5Jaekavi ko, jupi vae oiporarauka cheve yave,
omboeta cheve vae, asaite oñemokäti kavi vae ramita ko cheve,
jókuae ngaraa aröɨro,
ërei jókuae ikavimbae oyapo vae reta kotɨ tayerure maratu vaerä.
6Juvicha reta oyeitɨukata ɨ̈vavira pe,
jare oikuaa retata cheñee añetete ko vae.
7Ombaeara vae ɨvɨ oara rami,
ikägüe reta toñemoai tɨvɨa jöke rupi.
8Jáeramo cheYa Tumpa, ndereño amae,
ndereño ayeko, agüɨye chereeya.
9Cheövatu ñuai oñono reta cheregua vae güi,
chereepɨ iyoa vae reta iñuai güi.
10Jupimbae reta toa iñuai pe aeño,
che aja ramboeve tenonde.
Who We AreWhat We EelieveWhat We Do
2025 by iamachristian.org,Inc All rights reserved.
