1Pɨareve pe, Holofernes omee ñee opaete isundaro reta pe jare opaete jae ndive ñogüɨnoi vae reta pe yogüɨraja vaerä Betulia kotɨ, ipuere vaerä jae reta räri yogüɨraja oñeñono kavi ñogüɨnoi ɨvɨtɨ ɨvatea rupi jare joko pe omboɨpɨ reta vaerä ñoraro Israel-ɨgua reta ndive.
2Jókuae ara voi, opaete isundaro reta opa yogüɨraja. Yogüɨraja ko ciento setenta mil sundaro ɨvɨ rupigua reta jare doce mil kavayu regua reta, yaipapambae reve voɨta iyangarekoa reta jare jeta kuimbae reta ojo ɨvɨ rupi jae reta ndive vae.
3Yogüɨraja oyembojeyupa reta ɨvɨtɨ päu köiño oï Betulia güi vae pe, ɨesaɨ oïa pe; teyupa ipɨgüe Dotán güi, ojo oväe Ibleam pe, jare pukugüe Betulia güi ojo oväe Ciamón pe, jókuae ko opɨta Esdrelón jóvai.
4Jare Israel-ɨgua reta oecha jeta yae kuimbae reta yogüeru yave, täta okɨɨye reta jare jei reta oyoupe: “Kuae yogüeru vae reta opaeteita mbae omokañɨtei yandegüi, yandepuere rapeä jese reta.”
5Jaema metei ñavo oipɨɨ tembiporu ñoraro pegua, jare omoendɨ reta tata o iyapɨte re jaema opɨta reta oyangareko opaete pɨ̈tu.
6Pɨareve pe, Holofernes omoñesɨro opaete isundaro kavayu regua reta Israel-ɨgua reta Betulia pe ñogüɨnoi vae oecha vaerä,
7omae reta tëta kotɨ oike vaerä re, jare omae reta vi ɨesaɨ oï joko pe vae re jare jaemai oyemombae reta jese, oñono reta joko pe sundaro oyangareko vaerä jese, jare jae oyerova ye ïru reta oïa kotɨ.
Asiriaɨgua oyemongetagüe8Jayave oyemboya jese Edom jare Moab pegua mburuvicha reta, jare opaete jembeɨ rupigua reta, jaema jei reta chupe:
9“Oreruvicha eyeapɨsaka oreré, agüɨye vaerä ndesundaro reta opa yogüɨraja osusere.
10Kuae Israel-ɨgua reta mbaetɨ ko oyerovia juvɨ re jae reta oyerovia ko ɨvɨtɨ ɨvate vae re, echa täta ko yavai yaja vaerä ñaväe iyapɨte re.
11Jayave, cheruvicha agüɨye toiko ñoraro yayeokendauka vaerä chupe reta, echa jökorai yave, ngaraa metei ave sundaro omano ndegüi mburuvicha.
12Nde epɨtaño teyupa pe enoindaivi toï ndesundaro reta. Topɨ̈ro reta ɨesaɨ reta ñogüɨnoi ɨvɨtɨ igüɨ pe vae,
13echa joko güi Betulia pegua reta ojo ɨ güeru. Jayave ko opa ma ɨuve oyaporai reta yave, omee retata jëta. Ërei, ore reta opaete ndive royeupita iyapɨte kotɨ, jare joko pe roïta, romae vaerä roï agüɨye vaerä metei äve osɨi tëta güi vae.
14Jare jae reta jare ikuña reta jare imichia reta opata ko yɨmbɨaɨ oyaporai, jare ndei kɨse yamboasa mbove jupi reta opata o ogüɨapi reta oka rupi.
15Jaema jökorai yave ko nde cheruvicha jasɨ katu rupi remboepɨukata chupe reta oyemongeta ñogüɨnoi ndekotɨ vae jare oëmbae nerövaiti ikavi rupi vae.”
16Jare Holofernes pe jare ïru reta pe jaekavi yae jókuae ñee, jare omondo jei oyeapo vaerä jökorai.
17Jaema sundaro moabita pegua reta, cinco mil sundaro Asiriaɨgua reta ndive, opa yogüɨraja joko güi, jare opa ye ojo oyembojeyupa ɨvɨtɨ päu pe jare oyemombae reta ɨrɨru re jare ɨesaɨ reta Israel-ɨgua reta imbae re.
18Jaema Edom-ɨgua reta jare amonita reta opa oyeupi oyembojeyupa ɨvɨtɨ re, Dotán jóvai, jare omondo reta mbovɨ sundaro reta arayevɨ kotɨ, Egrebel jóvai, opɨta köiño Cus güi vae, jae ko köiño oï Mocmur ɨ̈aka jembeɨ güi vae. Jare ïru sundaro Asiriaɨgua reta oyembojeyupa ñuu pe, omotɨnɨe opaete jókuae ñuu reta. Opaete imbaembae reta peño oyeapo teyupa tuichagüe vae, echa oasa ete jeta reta.
Betulia kërai ipɨa angeko vae19Jaema Israel-ɨgua reta, oecha opa ma tovaicho reta oikëse güɨnoi yave jare mbaetɨ ipuere otekuarai reta, oñemoäteɨ reta jare oiporu reta yemborɨ Tumpa pe.
20Ërei Asiriaɨgua sundaro, kavayu regua reta, jare ɨvɨ rupigua reta, treinta y cuatro ara oikëse reta güɨnoi. Jare Betuliaɨgua reta güi opa ɨ;
21ɨrɨru rɨru reta pe opa ma ɨ. Mbaetɨ ma ɨ omoangapɨɨ reta.
22Michia reta opa ma ipɨtu, jare kuña reta jare kunumi reta jaenunga vi opa ma jesagüɨrɨ reta oyoa ma oagüe reta tëta joka rupi jare öke rupi.
23Jaema jayave opaete tëta reta, kunumi reta, kuña reta jare michia reta, ojo ma yatɨ reta Ozías re jare tëta ruvicha reta re jare jóvai osapúkai reta täta, jare opaete ndechi reta jóvai jei reta:
24“¡YandeYa toecha kuae kia ra ko añete jei vae, pe ra ko ani ore ra ko! Pe reta ko peyapo peï ikavimbae vae oreve mbaetɨ peipota peï kaviño Asiriaɨgua reta ndive.
25Añave mbaetɨ ma kia yandemborɨ vaerä. ¡Tumpa ñanemee ma oï jae reta ipo pe! ¡Iɨuve opata yandeyuka oï jae reta jóvai, jare opata ñanemokañɨtei!
26Peenɨi Asiriaɨgua reta jare pemee chupe reta opaete tëta, jare Holofernes isundaro reta topa toyemombae jese.
27Täta ko jaekavi opa vaerä yapɨta jae reta ipo pe. Yaiko tembipɨɨrä, ërei yaikoveta yaiko, jare ngaraa yaecha kërai ñanemichia omano yanderóvai vae jaeramiño vi yanderembireko reta.
28¡Ara re jare ɨvɨ re; yandeYa Tumpa, jare yandetenondegua reta, yandeyoa jeko pegua yaiporara ñaï jare yandetenondegua reta iyoa jeko pegua, roiporu Tumpa pe añave agüɨye vaerä körai oyeapo!”
29Metei rami, opaete yatɨ vae reta omboɨpɨ oyaeo täta rupi, jare oiporu reta yemborɨ Tumpa pe.
30Jayave Ozías jei chupe reta: “¡Peñemoata ngatu, cherëtara reta! Pandepo ara ñaäro ye räri, yandepararekota ko ñaneTumpa. ¡Jare ngaraa yandereeya etei!
31Jókuae ara rupi mbaetɨ ko yemborɨ ou oväe yandeve yave, ayapota pe peipota vae.”
32Jayave jei opaete vae pe opa ye vaerä oñemoai jare yogüɨraja ye ñogüɨnoi oïa rupi: jare kuimbae reta opa ye yogüɨraja ñogüɨnoi igüembɨ rupi jare oɨvate rupi, kuña jare michia reta opa ye omondo jëta rupi. Oï mbɨatɨtɨ tuichagüe vae tëtaguasu pe.
Who We AreWhat We EelieveWhat We Do
2025 by iamachristian.org,Inc All rights reserved.
