SAN MARCOS 2 - Guarani Bible with DC

Jesús ombogüera kuimbae jete jëogüe vae(Mt 9.1-8; Lc 5.17-26)

1Mbovɨ ara rupi Jesús ojo ye Capernaum pe, jare jërakua jae oime oï jo pe.

2Jupivei jeta vae oyemboatɨ joko pe, tɨnɨe o jare öke rupi ave. Jare Jesús omombeu Tumpa iñee chupe reta.

3Jare güeru reta metei kuimbae imbaerasɨ jete jëogüe vae. Irundɨ kuimbae reta ovoɨ güeru.

4Ërei jókuae güeru vae reta ipuereä güɨroike Jesús oïa pe, jeta yae vae ramo. Jáeramo güɨroyeupi o iárambo jare oipea reta chupe Jesús oïa re katu. Jokoropi ombogüeyɨ reta jókuae kuimbae jete jëogüe vae jupa reve.

5Jesús oecha jae reta iporogüɨrovia yave, jei jókuae kuimbae jete jëogüe vae pe:

—Cheraɨ, ndeyoa reta re cheɨ̈ro ma.

6Amogüe mborookuai re oporomboe vae reta oguapɨ ñogüɨnoi joko pe, jae reta ipɨa pe oyemongeta, körai:

7“¿Maera pa jei körai kuae kuimbae? Jei ko ikavimbae yae vae Tumpa kotɨ. Tumpaño ko ipuere iñɨ̈ro mbaeyoa reta re.”

8Jare Jesús oikuaa voi ipɨa pe jae reta iyemongeta ramo, jei chupe reta:

—¿Maera pa pepɨa pe peyemongeta jökorai?

9¿Mbae pa yavaiä jae vaerä kuae jete jëogüe vae pe: “Ndeyoa reta re cheɨ̈ro ma”, ani “epüa, evoɨ nderupa jare eguata”?

10Ërei peikuaa vaerä che Kuimbaerä ayeapo vae anoi ko mbaepuere cheɨ̈ro vaerä mbaeyoa reta re kuae ɨvɨ pe.

Jayave jei kuimbae jete jëogüe vae pe:

11—Che jae ndeve: Epüa, evoɨ nderupa jare ekua nerëta pe.

12Jayave kuimbae opüa jupivei, ovoɨ jupa jare oë ojo opaete joko pe ñogüɨnoi vae reta jovake. Jare opaete vae ipɨakañɨ jare omboete reta Tumpa jei reve:

—Mbaetɨi yaecha kuae nunga.

Jesús oenɨi Leví(Mt 9.9-13; Lc 5.27-32)

13Jayave Jesús ojo ye ɨguasu jembeɨ kotɨ. Jeta vae reta oyemboatɨ jae oïa pe, jare jae omboe reta.

14Jare joko güi ojo yave, oecha Alfeo taɨ Leví jee vae oguapɨ oï mburuvicha peguarä okovara ñogüɨnoia pe, jare jei chupe:

—¡Eyu cherupíe!

Jayave Leví opüa, jare ojo jae jupíe.

15Jare Jesús okaru oï ramboeve Leví jëta pe, jeta mburuvicha peguarä okovara vae reta jare jeko ikavimbae vae reta okaru vi ñogüɨnoi Jesús jare jemimboe reta ndive. Echa jeta vae yogüɨraja Jesús jupíe.

16Jayave mborookuai re oporomboe vae reta jare fariseo reta oecha Jesús okaru oï okovara vae reta jare jeko ikavimbae vae reta ndive yave, jei jemimboe reta pe:

—¿Maera pa pemboe vae okaru okovara vae reta jare jeko ikavimbae vae reta ndive?

17Jesús kuae oendu yave, jei chupe reta:

—Oikove katu vae reta mbaetɨ oeka oporopoano vae. Imbaerasɨ vae retaño oeka. Che ayu aeka vaerä iyoa vae reta. Mbaetɨ ayu aeka jupi vae reta.

Yekuaku tembíu güi vae regua(Mt 9.14-17; Lc 5.33-39)

18Jare Juan jemimboe reta jare fariseo jemimboe reta oyekuaku ñogüɨnoi tembíu güi. Jayave amogüe vae yogüeru, jare oparandu Jesús pe:

—¿Maera pa Juan jemimboe reta jare fariseo jemimboe reta oyekuaku tembíu güi, ërei nderemimboe reta mbaetɨ oyekuaku chugüi?

19Jayave Jesús jei chupe reta:

—Mendaa pe ñogüɨnoi vae reta ¿oyekuaku ra tembíu güi, omenda vae jae reta ndive oï ramboeve? Echa omendata vae jae reta ndive oï ramboeve, ngaraa oyekuaku reta tembíu güi.

20Ërei outa oväe ara omenda vae oyererajauka vaerä chugüi reta. Jayave ramo oyekuaku retata tembíu güi.

21Ngaraa ikavi yamboya vaerä temimonde indechi vae mbaemboyaa ipɨau vae pe. Echa mbaemboyaa ipɨau vae omoatata temimonde indechi vae, jare jeieteta osoro.

22Jaeramiño vi ngaraa ikavi yamboɨru vaerä vino ipɨau vae, vino jɨru mɨmbapire pegua indechi vae pe. Echa jökorai yave, omondorota jare vino oyepɨyereta, jare jókuae jɨru opa osoro. Jáeramo yamboɨru vino ipɨau vae jɨru ipɨau vae pe.

Jesús jemimboe reta oipoo trigo ara mbutuu pe(Mt 12.1-8; Lc 6.1-5)

23Ara mbutuu pe Jesús oasa kó rupi jemimboe reta ndive. Jare oasa ramboeve jokoropi jemimboe reta oipoo trigo.

27Jayave Jesús jei chupe reta:

—Ara mbutuu oyeapo ko ikavi vaerä kuimbae pe. Kuimbae mbaetɨ ko oyeapo ara mbutuu peguarä.

28Jáeramo che Kuimbaerä ayeapo vae anoi mbaepuere ara mbutuu re ave.