ECLESIÁSTICO 21 - Guarani Bible with DC

Mbaeyoa iyapɨ reta

1Cheraɨ michi, ¿ndeyoa pa? Agüɨye ye mo eyapo,

jare eiporu ñemoɨ̈ro ndereko reta oasagüe re.

2Esɨi mbaeyoa güi metei mboi güi rami,

echa reeya jese yave, ndesuuta.

Yaguapope jäi rami ko jäi

kuimbae reta oyuka vaerä.

3Opaete ikavimbae kɨsepuku jaimbeyoyavi vae rami ko;

iporomboperegüe mbaetɨ ma ko okuera.

4Kia mbae tuicha vae re oñeengata vae jare yembotuicha mbaeyekou omokañɨtei vae ko;

jare oyembotuicha vae jo opata ko oyemboai.

5Tumpa oendu ko paravete vae iyerure

jare jarembae omee chupe yembojupi.

6Kia ñavo yembosɨmbi güɨröɨro vae ojota ko imbaeyoa vae ojoa rupi,

ërei kia Tumpa omboete vae ipɨa reve kavi ko oyembopɨambuaeta.

7Mombɨrɨ peve ko yaikuaa imiari pota vae,

ërei ipɨarakuaa vae imaendúa imbaeyavɨ reta re.

8Metei o yayapo korepoti ambuae pe vae,

ita yamboatɨ ñaneñeotɨ aerä vae rami ko.

9Metei atɨ jeko kavimbae vae reta yepea yɨpi katu vae rami ko:

Jare iyapɨta tataendɨ pe.

10Iyoa vae reta jape yavaiä ko jare ipe kavi,

ërei ojo iyapɨ mano iporookuaía pe.

Iyarakuaa vae jare iyarakuaambae

11Kia ñavo mborookuai oyapo vae oyangareko iyé;

Tumpa yamboete vae yandereraja arakuaa kotɨ.

12Kia ñavo ipɨarakuaambae vae ngaraa ipuere oikuaa,

ërei oime metei mbɨarakuaa mbɨatɨtɨ katuai vae.

13Iyarakuaa vae mbae oikuaagüe metei ituicha vae rami ko,

jare iporomboarakuaa reta ɨesaɨ opambae rami ko.

14Iyarakuaambae iñäka metei vaso opu rami ko:

Mbaetɨ oipɨɨ mbae oikatugüe.

15Metei kuimbae ipɨarakuaa vae oendu metei ñee yembojaanga pegua yave,

ombotuicha jare ïru omboyoapɨ;

ërei metei iyarakuaambae oendu yave,

jova pochɨ oyeapo jare mbaetɨ oyeapɨsaka jese.

16Metei iyarakuaambae re yayeapɨsaka vae mbae yavoɨ yaraja ketɨ rami ko;

¡ërei ngatu yaenduta, täta ikavi imiari metei ipɨarakuaa katu vae!

17Tëta reta oyemboatɨ yave, oiporu iyarakuaa vae pe iyemongeta

jare oyemongeta reta opɨta jeigüe vae re.

18Arakuaa iyarakuaambae pegua metei o jaema opata osururu oï vae rami ko;

opaete mbae oikuaa jei vaerä vae ñee añetembae vae ko.

19Yemboe iyarakuaambae pe ipire karena oï rami ko,

ani ramo ipo iyakatu kotɨgua re jiero poapɨ regua oï rami ko.

20Yarakuaambae ipukaɨvate ko;

ërei yarakuaa vae, ma opuka yave, opukavɨi mbegüe kavi.

21Yemboe yarakuaa vae pegua metei ñemopöranga oro pegua rami ko,

yɨva akatu kotɨgua re poapɨ regua oï rami ko.

22Yarakuaambae oikeraita ojo metei o pe;

ërei ipɨarakuaa vae opɨtata oporomboete reve.

23Yarakuaambae, öke güive, omae vɨarita o rapɨpe kotɨ;

ërei oyemboe kavi vae oka peño ko opɨtata.

24Yemboe pɨ̈chɨi vae ko ñañono yandeapɨsa öke re vae;

metei kuimbae ipɨarakuaa vae omanota ko imara güi.

25Imiari pota vae jendɨvanga rupi ave ko imiari;

ërei iyarakuaa vae ojäa metei ñavo ñee.

26Yarakuaambae jei opaete oyemongetagüe;

ërei iyarakuaa vae oyemongeta opaete jeigüe vae.

27Metei jeko kavimbae vae oyepopeyu jovaicho re yave,

iyeiño ko oyepopeyu.

28Indaye pota vae iyeupegua aeño ko güeru ikavimbae

jaema oñemotareɨuka ma opaete jëta-ɨpɨ rupigua reta pe.