SABIDURÍA 5 - Guarani Bible with DC

1Jókuae ara jeko kavi vae oyemboɨta joko pe, okɨɨyembae reve,

oiporaraukase chupe vae,

jare jembiapo güɨröɨrose chugüi vae reta jóvai.

2Oecha reta rupive, tätata okɨɨye reta jare ipɨakañɨta,

echa ko jae reta mbaetɨ tëi güɨrovia jókuae oasayepe ko vae.

3Jare jei retata oyoupe, oyembopɨaä reve,

jare mbae jasɨ oï chupe reve:

4“Kuae jae ko ïru ara rupi yayoyaise vae,

yayuvangase jese vae.

¡Täta pa ko yandearakuaa!

Yayemongeta ko imbokereecha yandeve

jare imano metei ñemomarai echa.

5¡Pe mase añave joko Tumpa taɨrä ma oï

jare joko oï jëta reta imbaeyekou pe!

6¡Aa jae matɨ jei vae yaiko mbae añetegüe güi vae!

¡Tembipe mbae jupi vae pegua yandeveguaä ndipo,

jare kuaraɨ ave ndipo mbaetɨ yandemboesape!

7Yaiko pɨ̈chɨi vae rupi jare ñemokañɨtei rupi,

yaguata yaiko ɨvɨ ipombae rupi jare tapembae vae rupi,

echa mbaetɨ yaikuaa Tumpa jape.

8¿Mbaerä yera oë yandeve yayembotuicha vae?

¿Mbaerä yera oë yandeve yayemboikokatu vae?

9Opaete jókuae reta oasa metei küaraɨa ramiño,

ɨvɨtu rupíe ñee ojo vae ramiño,

10barco ɨguasu rupi oasa ojo vae

jaɨkuere ave oyekuaambae ojo vae rami

ipɨtiakɨse jaɨkueregüe ave mbaetɨ oyeecha ɨaparúa rupi vae rami;

11güɨra ɨvate rupi ovevegüe

mbaetɨ jaɨkuere oyeecha vae rami;

ipepo ɨvɨtu omopepe vae,

iñeeäta vae pe omboasavi,

japerä oveve reve,

jare jökorai reve mbaetɨ oeya jaɨkueregüe oveve vae güi;

12uvɨ mbae re ñajäa vae rami;

ara oyepeka, jare jupivei oya ye oyoe rami,

jökorai ko uvɨ jape mbaetɨ oyeecha.

13Jökoraiño vi ko yande reta: Ndei ɨma yaa mbove joko ñamano ye ma ñaï;

mbaetɨ ave ma mbae yepe yaeya yanderaɨkuere rupi,

yayeyuka yandereko pɨ̈chɨigüe pe.”

14Ërei añetete, jeko kavimbae oäro mbae oiko vaerä kuri vae

kapii güɨroveve vae rami ko,

ani ramo itɨrɨyɨigüe ɨvɨtuai güɨraja vae rami ko;

ani ramo tätati opa ɨvɨtu jupíe ojo vae rami

jaema jökorai opa oasa oguata oiko vae imaenduagüe rami

echa metei pɨ̈tuño opɨta joko pe.

Jeko kavi vae reta oiko puku vae

15Jeko kavi vae reta oiko puku yae ko;

jae reta mbae oipɨɨ vaerä kuri Tumpa ipo pe ko oï;

Ɨvate ete pe oï vae ko oyangareko jese reta.

16Jaeramiño vi, oipɨɨta Tumpa güi tëta ikavigüe vae

jare äka-regua ipöragüe vae;

jae ko oyopiata ipo pe

jare oepɨta iyɨva pe.

17Tumpa oyemondeta ko kuri iyarasɨ pe, metei temimonde ñoraro pegua rami,

jare oñonota iyé mbae oimegüe, oiporarauka vaerä jovaicho reta pe;

18oyemondeta yembojupi pe, temimonde ñoraro pegua vae rami;

oñonota iñäka re oporojäa vaerä añetegüe rupi,

19oñonota iyeopiakarä mbae oasambae vae,

20kɨsepuku rami oimbeeta iyarasɨ oporoparavombae vae

jare opaete oïrarota jae ndive iyarakuaambae vae reta.

21Amapɨtu güi ko oëta aravera jare ararɨapu täta vae,

metei güɨrapa oñemoata kavi oï vae rami,

jare jae reta ko oata ou mbae oata jese vae pe;

22jaeramiño vi amandau reta outa vi

täta rupi ita rami.

Jare ɨguasu iyɨaparúa opüata ikotɨ reta,

jaema ɨ opata güɨraja reta;

23metei ɨvɨtu tätagüe vae opüata

jare ɨvɨtuai rami opata otupei oeya.

Jare jökoraita mbae ikavimbae oeya opaete ɨvɨ ipombae,

jare jökoraita vi mbae ikavimbae opa oitɨ imbaepuere vae reta jëta.