ESTER (gr) 7 - Guarani Bible with DC

Amán oyeyukauka

1Mburuvicha guasu Amán ndive opa yogüɨraja aretea pe,

2jare jókuae mókoi araa pe, aretea pe, mburuvicha guasu jei Ester pe:

—¿Mbae pa ko kuae reipota rere, mburuvicha Ester? ¡Eiporuño cheve mbae reipotagüe, ameeta ko ndeve, yepe cheɨvɨ mbɨte reiporu cheve!

3Jare Ester jei chupe:

—Cheruvicha cheparareko ko yave, jaeño ma aipota jare aiporuta cheruvicha iñɨ̈ro vaerä cheve cherekove pe jare cherëtaɨgua reta jekove pe;

4echa opaete cherëtaɨgua reta jare che vi opa oremee roï opa roñemokañɨtei vaerä, jare opata mbae peekɨ oregüi, jare jaema tembiau roiko vaerä; ore opaete oremembɨ reta reve. ¡Orerovaicho jae ko oporomboetembae vae oï ndeporookuaía pe vae cheruvicha!

5Jaema jayave mburuvicha guasu oparandu:

—¿Kia etei pa ko jókuae ikavimbae vae oyapo?

6—¡Jókuae tovaicho jae ko kuae Amán avaete! —jei Ester.

Jare jókuae oendu rupive, Amán ou opaetei täta oguapɨ oï okɨɨye güi mburuvicha guasu jóvai jare mburuvicha kuña jóvai.

7Jaema mburuvicha guasu opüa aretea güi ojo mbaepotɨ renda kotɨ. Ërei Amán, oecha ma jökorai oï yave, opoko oiporu mburuvicha kuña pe oipararekoño vaerä.

8Jare mburuvicha guasu ou ye ma mbaepotɨ renda güi yave, oecha Amán itindɨ oï Ester iguapɨa iárambo, oiporu oï chupe oipararekoño vaerä. Jare jökorai rupive mburuvicha guasu iñeeäta reve jei:

—¿Ani reipota vi ko kuae chero pe mbae reyapo reï cherembireko pe?

Jókuae oendu rupive, Amán oyerova omae täta imara reve.

9Jaema Bugatán, jae ko metei mburuvicha guasu järoa reta juvicha, jare jae jei:

—Amán oime oyapouka jëta pe metei yeyuvika veintidó metro vae Mardoqueo peguarä, jókuae kuimbae imiari kavi yae mburuvicha guasu pe vae.

—¡Jayave jae pembosagüiu joko pe! —jei mburuvicha guasu.

10Jare jökorai Amán oyembosagüɨuuka jókuae Mardoqueo pe oyapouka tëi vae re. Jaema jayave ramo mburuvicha guasu iyarasɨ poi opɨta.