1Mburuvicha guasu Ezequías oendu kuae yave, omondoro jemimonde ipɨatɨtɨ güi, jare oñeapeva temimonde mbɨatɨtɨ pegua pe, jare oike yandeYa jo pe.
2Javoi omondo Eliaquim jae imbaembae iyangarekoa, jare Sebna ombaekuatía vae, jare sacerdote ñɨma ma vae reta, oñeapeva yogüɨraja reta temimonde mbɨatɨtɨ pegua pe, Tumpa iñeemombeúa Isaías kotɨ,Is 1.1. jae ko Amoz taɨ,
3jei reta vaerä chupe: Körai jei Ezequías: “Kuae ara ko jae mbɨatɨtɨ iara, mbaeporara iara jare yeangao iara; echa kuña imembɨrasɨ oï yave, opa jete jëogüe, jökorai ko roï.
4Güɨramoi yandeYa Tumpa oendu opaete Rabsaces iñee reta, iya mburuvicha guasu Asiria pegua ombou iñeenguruasɨ katu vaerä Tumpa oikove avei vae kotɨ, oiporarauka vaerä iñee rupi; kuaekuae yandeYa Tumpa oendu. Jáeramo eyerure oimeño opɨtagüe reta re.”
5Yogüɨraja mburuvicha guasu Ezequías jembiokuai reta Isaías pɨri.
6Jare Isaías jei chupe reta: Köraita pere peya pe: “Körai jei yandeYa: ‘Agüɨye ekɨɨye ñee reta reendugüe güi, jókuae mburuvicha guasu Asiria pegua jembiokuai reta cheangao pɨpe vae güi.
7Mase, che amondota aenduka chupe mbae, amboyerovauka ye vaerä jëtaguasu kotɨ, joko pe ayukaukata.’ ”
8Jare Rabsaces oyerova ye ma ou yave oväe mburuvicha guasu Asiria pegua oñeraro oï tëta Libna pegua reta ndive; echa oendu ojo ye ma Laquis güi vae.
9Joko pe mburuvicha guasu Asiria pegua oendu Tirhaca mburuvicha guasu Etiopía pegua ou oporepeña jese vae. Jare omondo ye jekovia pe kuimbae reta imiari vaerä Ezequías pe, jei reve:
10Körai pere Ezequías mburuvicha guasu Judá pegua pe:
“Agüɨye tandembotavɨ neTumpa nde rerovia jese vae, jei yave ndeve: ‘Jerusalén mbaetɨta oa mburuvicha guasu Asiria pegua ipo pe.’
11Nde reikuaa mburuvicha guasu reta Asiria pegua oyapo vae, opaete tëtaguasu reta omboai vae reta ndive vae. Jare ¿nde reyereroasayepeta ra?
12¿Güɨroasayepe yera tumpa-raanga reta jëtaguasu reta cheñemuñagüe reta opa omboai vae: Tëta Gozán, Harán, Resef jare Edén pegua reta Telasar pe yogüɨreko vae?
13¿Ketɨ pa oime ñogüɨnoi mburuvicha guasu reta Hamat pegua, Arfad pegua, Sefarvaim pegua, Hena pegua jare Iva pegua?”
14Ezequías omongeta tupapire mburuvicha guasu jekovia pe kuimbae reta imiari vae omee chupe vae jare opa omongeta güire oyeupi yandeYa jo kotɨ, jare jókuae tupapire omopüa yandeYa jóvai.
15Javoi oyerure yandeYa pe, jei körai: “CheYa, Israel iTumpa, araɨgua reta querubín iä ipäu pe reiko vae,Ex 25.18-22; 1 S 4.4; Sal 80.1; Is 37.16; Ez 1.26-28. ndeño ko jae opaete mborookuaía reta ɨvɨ pegua iTumpa, nde reyapo ara jare ɨvɨ.
16Eyeapɨsaka cheYa jare eendu, emae cheYa jare eecha Senaquerib iñee reta, echa ombou ndeangaouka vaerä, nde cheYa reikove vae.
17CheYa, añetete ko mburuvicha guasu reta Asiria pegua omboai tëtaguasu reta jare iɨvɨ reta vae,
18jare oapɨ itumpa-raanga reta, echa tumpa eteä ko, kuimbae reta jembiapoño ko, ɨvɨra jare ita pegua. Jáeramo opa omboai reta.
19Añave oreYa Tumpa, romoñera orereroasayepe vaerä ndembaepuere pe, oikuaa vaerä opaete mborookuaía reta ɨvɨ pegua, ndeño ko jae oreYa Tumpa vae.”
20Jayave Isaías Amoz taɨ omondo jei Ezequías pe: “Körai jei yandeYa Israel iTumpa: ‘Che aendu reyerure cheve Senaquerib, mburuvicha guasu Asiria pegua re vae.’ ”
21Kuae ko jae ñee reta yandeYa jei mburuvicha guasu Asiria pegua re vae:
“Senaquerib, tëta guasu Sión, ndeyóyai yóyai metei kuñatai rami,
Jerusalén oñeäkambovava ndeyóyai yóyai,
nde resɨrɨ ye yave.
22¿Kia pa reyangao jare neñeeasɨ katu ikotɨ?
¿Kia kotɨ pa mbae rere jare neñeeäta reyembotuicha reve?
¡Israel pegua Iyoambae kotɨ ko!
23Neñee jerajaa reta rupi neñeeasɨ katu chekotɨ.
Rere:
‘Jeta yeyé chekäretou reta ramo ayeupi ɨvɨtɨ guasu reta iyapɨte re,
Líbano pe ɨvɨtɨ ɨvate yae vae re.
Ayasɨa iɨ̈vɨrare ɨvate yae vae reta,
ɨvɨra pino jee vae ipöra yae vae.
Aja aväe ɨvɨtɨ reta iyapɨte re,
kaa reta mbaepotɨ renda reta ramía pe.
24Ɨvɨ ambuae pe ayoo ɨkua jare joko güi jau ɨ,
chepɨ pe amotini opaete ɨ̈aka reta Egipto pegua.’
25¿Mbaetɨi pa peikuaa che, Tumpa arakae güiveño mai ko ayapo kuaekuae vae,
jare ɨmaño mai ko ayemongeta aiko jese vae?
Jáeramo añave rogüeruruka, nde opa vaerä remboai tëta guasu reta oñekëse kavi yae vae,
jare opata reeya tëtagüerä.
26Pɨpegua reta mbaetɨ imbaepuere;
okɨɨye reta jare ipɨajopa reta,
ñana, ko rupigua rami yogüɨreko reta,
kapii jovɨ vae rami,
ovapɨa re ñana jokɨ vae rami
opa ipiru ɨvɨtuakuvo omombiru rami.
27Che aikuaa ko kërai reiko vae, jare opaete reyapogüe;
che aikuaa ko ndearasɨ chekotɨ vae.
28Ndearasɨ chekotɨ jeko pegua, jare ndepɨayemboete aendu jeko pegua,
añonota netï re argolla mɨmba re oñeñono rami,
rombokayurupeguata,
jare romboyerova yeta romondo jókuae tape reyúa rupi.”
29Jayave Isaías jei Ezequías pe:
“Kuae ko jae mɨakañɨ oyeapota vae:
Kuae año re jare ïru año re peuta
trigo äre ia,
ërei mboapɨa año re peñotɨta jare peipoota,
peñotɨta uva jare peuta iagüe.
30Jare Judá iñemuña reta güi oasayepegüe,
jokɨ yeta temitɨ rami jare oñemuña reta yeta.
31Echa Jerusalén güi ñogüɨnoeta jembɨregüe reta;
ɨvɨtɨ Sión güi oasayepegüe reta.
YandeYa imbaepuere yae ete vae,
oporoaɨu yae vae jeko pegua oyapota kuae.
32Ërei ngatu, yandeYa jei körai mburuvicha guasu Asiria pegua kotɨ:
‘Ngaraa oike Jerusalén pe,
ngaraa oyapi uvɨ pe ave,
ngaraa ou jóvai yeopiaka ndive,
ngaraa vi iyɨ́vɨri rupi omopüa yeupika.
33Jókuae tape oúa rupi yeño ojo yeta,
mbaetɨta oike kuae tëta guasu pe.
¡Che, peYa ko jae körai!
34Echa che ayangarekota kuae tëta guasu re, aepɨ vaerä,
che ayeaɨu jeko pegua,
jare cherembiokuai David aɨu jeko pegua.’ ”
35Jókuae pɨ̈tu voi yandeYa iaraɨgua oë, jare oyuka Asiriaɨgua reta jeyupa pe ciento ochenta y cinco mil kuimbae; köe yave opüa reta yave, oecha reta opaete tëogüe yepeaiño ma.
36Jayave Senaquerib, mburuvicha guasu Asiria pegua oyerova ye Nínive kotɨ jare opɨta joko pe.
37Metei ara jae omboete oï itumpa Nisroc itupao pe yave, taɨ Adramelec jare Sarezer oyuka kɨsepuku pe, jare otekuarai reta ɨvɨ Ararat kotɨ. Jaɨkue rupi taɨ Esar-hadón oguapɨ jekovia pe mburuvicha guasurä.
Who We AreWhat We EelieveWhat We Do
2025 by iamachristian.org,Inc All rights reserved.
