SALMOS 55 - Guarani Bible with DC

SALMO 55Oñemuñauka tovaicho reta pe vae iyerure

1CheRu Tumpa, eendu cheyerure,

agüɨye emaeiño cheyerure re.

2-3Eïndaivi eï jare emboyevɨ cheve;

chepɨatɨtɨ ayerure.

Chepɨakaviä cherovaicho reta jeko pegua,

jupimbae vae reta.

Echa chembopɨatɨtɨ yae reta,

oporepeña reta cheré iyarasɨ yae reve.

4Chepɨa onduku cheɨvɨte pe;

jare kɨɨye mano pegua ou cheré.

5Akɨɨye yae jare arɨrɨi aï,

¡kɨɨye yavaetegüe cheöva!

6Jare jae:

“Mbae mona chepepo, aveve vaerä pɨkasu rami;

aveveta jare aputuuta tëi ko.

7Atekuaraita tëi mombɨrɨ;

apɨtata aiko ñuu pe.

8Jarembae voi atekuaraita añemi vaerä,

ama ɨvɨtuai reve yavaetegüe güi.”

9CheYa, emboai reta, embojopa iñee reta,

echa jaeño aecha tekorai jare ñomotareɨ tëtaguasu pe.

10Ara pe jare pɨ̈tu yave oyere tëta guasu ikësea iárambo rupi,

ikavimbae jare omaepɨ̈ro vae oime pɨpe.

11Ikavimbae oime pɨpe,

mbaembotavɨ mbaetɨ osɨrɨ ikaye reta güi.

12Mbaetɨ chemomarai metei tovaicho

jókuae aropɨata tëi ko,

mbaetɨ ave ipo omopüa chekotɨ chemotareɨ vae,

chepuere añemi chugüi vae.

13¡Ërei nde cheïru köiño yae vae etei ko reyapo cheve,

nde cherëtara, cheguataïru,

14ñanemiari ngatuse opaño mbaembae re vae,

yaguata pävese yaja Tumpa jo pe vae!

15¡Tomanoɨvɨ cherovaicho!

¡Tojo omanogüe reta ñogüɨnoia pe jekove reve,

echa oime ikavimbae ipɨa pe jare jo pe!

16Ërei che, ayerureta Tumpa pe;

cheYa chereroasayepeta.

17Kaaru yave jare ndeimbove yave, jare kuaraɨ ara mbɨte pe

chepɨatɨtɨ yae reve ayerure,

jare jae oenduta cheve.

18Jae chereepɨta, güɨroasayepeta cherekove ñeraroa pe,

yepe tëi jeta cherovaicho.

19Tumpa oiko avei vae oenduta, jare omomichita;

echa jae reta mbaetɨ oyepoepɨ

jare mbaetɨ oipoɨu Tumpa güi.

20Jae reta omopüa ipo iñeïru mbaetɨ teko güɨnoi vae kotɨ,

mbaetɨ ombopo ñererökuavee päve oyapo jae ndive vae.

21Ñee oë iyuru güi vae, neche kɨra ipɨuasɨ kavi rami,

ërei ngatu ipɨa pe oï ñeraro.

Iñee kaviasɨ, asaite iïchɨi kavi rami,

ërei ngatu jae ko kɨse oyeimbee kavi vae rami.

22Eeya ndeyemoambeko yandeYa pe,

jae neñono kavita;

jae ngaraa omaeño ogüɨapi kuimbae jupi vae.

23CheRu Tumpa, nde remondota kañɨtei pe jókuae oporoyuka jare iyapu vae,

ngaraa kërai ave ɨma oikove oiko,

ërei che ndereño ayeko.